Şahdağın ətəyində abadlaşan məkan

Ölkəmizdəki sürətli tərəqqinin Qusar rayonunun timsalında da aydın görmək olar. Son bir neçə il ərzində bu diyarın da siması gözəlləşib, burada xeyli yeni sosial obyekt istifadəyə verilib. Bunun da əsas səbəbi rayonun inkişafına Prezident İlham Əliyev tərəfindən göstərilən diqqət və qayğıdır.

Ölkə rəhbərinin təşəbbüsü ilə inşa edilən obyektlər əhalinin yaşayış səviyyəsinin, sosial rifahının yüksəldilməsində mühüm rol oynayıb. Digər tərəfdən, iqtisadiyyatın liberallaşdırılması müasir standartlara cavab verən yeni texnika və texnologiyaların tətbiqi, bazar iqtisadiyyatının tələblərinə uyğun, rəqabətədavamlı məhsulların istehsal həcminin artması ilə müşayiət olunur.

Rayon iqtisadiyyatının aparıcı sahəsi kənd təsərrüfatıdır. Cari ildə rayonda 33384 hektar dənli bitkilər əkilmiş, 566038 sentner məhsul yığılmışdır. Bu da əvvəlki illərdə olduğundan çoxdur. Belə ki keçən ilin eyni dövrü ilə müqayisədə 4,9 ton çox ət, 45,8 ton çox süd, 9 min ədəd çox yumurta istehsal olunmuşdur.

Qusarlılar əkib-becərdikləri məhsulun bir hissəsini ölkənin paytaxtı Bakı şəhərində keçirilən kənd təsərrüfatı yarmarkalarına göndərirlər. Əvvəlki illərdə bir qədər çətinliklər meydana çıxsa da, hazırda bu sahədə işlər öz yoluna düşməkdədir. Satış yarmarkalarına 34 sahibkar tərəfindən 435,2 ton kənd təsərrüfatı məhsulları çıxarılmışdır. Sahibkarlara istehsal etdikləri məhsulları başqa rayonlara daşınmasında və satışında da kömək göstərilir. Öncə həmin bölgələrdə hansı məhsullara ehtiyac olduğu öyrənilir, daha sonra şənbə və bazar günləri satış təşkil edilir.

Rayonda kommunal xidmətlərin səviyyəsinin yüksəldilməsi sahəsində də bir sıra işlər görülmüşdür. Əhalinin fasiləsiz elektrik enerjisi ilə təminatı məqsədilə elektrik xətlərində təmir işləri görülmüş, yararsız dayaqlar, 12 kilometrdən çox naqil təzələnmişdir. Yeri gəlmişkən, Qusarda qış soyuq keçdiyi üçün əhali enerjidən daha çox istifadə edir. Transformatorların vaxtaşırı yararsız hala düşməsi isə problemlər yaradır. Bunun qarşısını almaq üçün transformator yarımstansiyalarında təmir işlərinə sentyabrdan başlanıb. Xürel, Xudat, Ukur, Yeni Həyat kəndlərində ümumilikdə 5 transformator daha güclüləri ilə əvəzlənib. Əhalinin üzləşdiyi əsas problemlərdən biri də dirəklərarası xətlərin qırılması idi. Artıq bu problem demək olar ki, aradan qaldırılmışdır.

Sakinlərin təbii qazla təminatının yaxşılaşdırılması üçün də çox iş görülür. Hazırda Gedəzeyxur-İmamqulukənd, Balaqusar-Urva magistral qaz xətlərinin keçən ildən yarımçıq qalmış hissələrində, Qusarçayın sol sahilində, Aerodrom və Balaqusar yeni yaşayış massivlərində çəkiliş işləri aparılır. Bunlarla yanaşı, kəndlərə gedən qaz xətləri əlaqədar təşkilatın əməkdaşları tərəfindən yoxlamalardan keçirilir. Mütəxəssislərin verdiyi rəyə görə, rayonda qış aylarında qazla bağlı problem olmayacaq.

Görülən işlərdə bir sıra xarici şirkətlər də iştirak edirlər. Məsələn, Yaponiya Beynəlxalq Əməkdaşlıq Agentliyi ilə birgə maliyyələşdirilən "Kiçik şəhərlərdə su təchizatı və kanalizasiya layihəsi" çərçivəsində Qusar şəhərinin və ətraf 7 kəndin içməli su təchizatının yaxşılaşdırılması məqsədilə Qusarçayda 700 paqonmetrlik suqəbuledici qurğunun, yeni su anbarlarının tikintisinə başlanmışdır. Layihə çərçivəsində növbəti ildə küçələrdə su və kanalizasiya xətlərinin çəkilməsinə başlanacaq.

Qusarda yolların rahatlığına xüsusi fikir verilir. 22 kilometrlik Həzrə-Zuxul yolunda son tamamlama işləri görülür. Eyni zamanda, "Şahdağ" Qış-Yay Turizm Kompleksinə gediş-gəliş yollarının çəkilişinə ötən il başlanılmış Bakı-Gəndob-Rusiya Federasiyası ilə dövlət sərhədi avtomobil yolunun rayon ərazisindən keçən hissəsinin və Qusar-Əniğ-Ləzə avtomobil yolunun tikintisi davam etdirilmişdir.

Rayon mərkəzində bir sıra küçələrin asfaltı dəyişdirilmiş, səkilər, piyada keçidləri sahmana salınmış, bir çox yerlərdə divarlar dekorativ daşla üzlənmiş, elektrik və rabitə dirəkləri dəyişdirilmiş, digər təmir işləri görülmüşdür.

Ümumiyyətlə desək, Şahdağın qarlı zirvəsinin ətəklərində yerləşən, qışı soyuq keçən bu bölgədə şaxtalı aylara əvvəlcədən ciddi hazırlaşmaq lazımdır. Odur ki, əlaqədar təşkilatlar qışa hazırlığa yay aylarından başlayırlar. Bu məqsədlə rayon icra hakimiyyəti tərəfindən təsdiq edilmiş xüsusi proqram tərtib olunmuş və işlər icra strukturları tərəfindən ciddi nəzarətə götürülmüşdür. Müəssisə və təşkilatların oduna olan tələbatının ödənilməsi üçün ayrıca fond yaradılmış, meşələrin qanunsuz qırılmasının qarşısını almaq üçün əlaqədar təşkilatlara göstərişlər verilmiş, bu sahədə çalışanlar oktyabr ayından xüsusi iş rejiminə keçmişlər. Qış mövsümünə hazırlıqla əlaqədar birləşmiş qazanxanalar və istilik şəbəkəsi sahəsində hazırlıq işləri isə nəzərdə tutulan vaxtda başa çatdırılmışdır.

Rayonda fəaliyyət göstərən yol istismar idarəsi qış mövsümü ilə əlaqədar avtomobil yollarında maşınların hərəkətinin təhlükəsizliyini təmin etmək üçün bir sıra işlər görmüşdür.

Onu da qeyd edək ki, qışa hazırlıqla bağlı rayon icra hakimiyyəti sentyabr ayında bütün müəssisə və təşkilatlara tövsiyələr göndərib. Bundan sonra qışa hazırlıq planı hazırlanıb. Qarlı-çovğunlu günlərdə rayon mərkəzi ilə uzaq dağ kəndləri arasında əlaqələrin kəsilməməsi üçün rabitə vasitələrinin işini fasiləsiz təmin etmək üçün komissiya da yaradılmışdır.

Qış mövsümündə ortaya çıxan problemlərdən biri də məktəb və xəstəxanalarla bağlı olur. Odur ki, Qusarda qışa hazırlaşarkən səhiyyə və təhsil müəssisələrinin fəaliyyəti daim diqqətdə saxlanılır və bu il həmin müəssisələrin maddi-texniki təchizatı xeyli yaxşılaşdırılıb.

Akif ƏLİYEV

Azərbaycan.-2012.- 13 noyabr.- S.10.