ABŞ-ın nüfuzlu «CNBC» televiziyasının saytında Azərbaycandakı tolerantlıq haqqında material dərc edilmişdir

Xəbər verdiyimiz kimi, noyabrın 8-də Londonda, Böyük Britaniya parlamentində Heydər Əliyev Fondunun vitse-prezidenti Leyla xanım Əliyevanın təşəbbüsü, bu ölkədə fəaliyyət göstərən İngiltərə-Azərbaycan Cəmiyyətinin və "Odlar Yurdu" qurumunun təşkilatçılığı ilə "Avropa multikulturalizminin perspektivləri: Dinlərarası dialoq və dini tolerantlığın Azərbaycan modeli" mövzusunda konfransın keçirilməsi dünyanın bır sıra ölkələrinin mətbuatında geniş əks-səda doğurmuşdur.

AzərTAc xəbər verir ki, Amerika Birləşmiş Ştatlarında yayımlanan "CNBC" televiziya kanalının internet saytında konfrans haqqında geniş material yerləşdirilmişdir.

Materialın müəllifi qeyd etmişdir ki, Londonda keçirilən konfrans Azərbaycanda həqiqətən də, Avropaya nümunə ola biləcək tolerant cəmiyyət qurulmuşdur. Burada bir çox dinlərin nümayəndələri mehriban şəraitdə yaşayırlar və onlara dini ayinləri yerinə yetirmək üçün nəinki maneə olunmur, əksinə, kömək göstərilir. Konfransda iştirak edən Böyük Britaniyanın nüfuzlu siyasi və din xadimləri bildirmişlər ki, Azərbaycan dini dözümlülük sahəsində böyük uğurlar əldə etmişdir.

Qeyd olunmuşdur ki, Azərbaycanda əhalinin 95 faizinin müsəlman olmasına baxmayaraq, burada yaşayan yəhudilər də bu ölkəni özlərinin doğma vətəni hesab edirlər.

Məqalənin müəllifi onu da qeyd etmişdir ki, Azərbaycanda müsəlmanlarla yanaşı katoliklər, provoslavlar, protestantlar və başqa dinlərin nümayəndələri mehriban şəraitdə yaşayır və əməkdaşlıq edirlər. Bakıda 3 senaqoqla yanaşı yəhudi icması, yəhudi mədəniyyət mərkəzi də fəaliyyət göstərir. Sovet İttifaqı dağıldıqdan sonra buradakı sinaqoqlar hökumətin vəsaiti hesabına bərpa edilmişdir ki, bunun da dünyada analoqu yoxdur. Sovet İttifaqının tərkibində 70 il repressiyaya məruz qalmasına baxmayaraq, Azərbaycan xalqı başqa dinlərə qarşı tolerant münasibətini qoruyub saxlamışdır. Təsadüfi deyildir ki, cəmi 9 milyon əhalisi olan Azərbaycanda ötən 20 il ərzində 500 müxtəlif dini icma meydana gəlmişdir.

Məqalədə Heydər Əliyev Fondunun vitse-prezidenti Leyla Əliyevanın konfransdakı çıxışından sitat gətirilərək bildirilir ki, "...bu gün Azərbaycan bütün dünyaya göstərir ki, müsəlmanlar yəhudilər və xristianlar birlikdə sülh və əmin-amanlıq şəraitində yaşaya bilərlər. Biz buna nail olmuşuq və bununla fəxr edirik".

Materialda göstərilir ki, Sovet İttifaqının dağılmasından sonra Azərbaycanı tərk edən yəhudilər artıq geri dönməyə başlamışlar. Bu da ölkənin sosial-iqtisadi inkişafı ilə əlaqədardır. Azərbaycanda istər dövlət, istərsə də qeyri-dövlət idarə və müəssisələrində müxtəlif dinlərə mənsub olanlar çalışırlar və onlara qarşı dini ayrı-seçkilik halları müşahidə edilmir. Onlar özlərini tam təhlükəsizlikdə hiss edirlər.

"CNBC" televiziyasının saytındakı yazıda Lord Frayzerin, Dini Qurumlarla İş üzrə Dövlət Komitəsinin sədri Elşad İsgəndərovun, yəhudi icmasının rəhbəri Moşe Bekkerin və başqalarının çıxışlarının maraqlı məqamları yer almışdır.

Azərbaycan.-2012.- 13 noyabr.- S.11.