Bakıda IDEA və UNEP-in təşəbbüsü ilə «Yaşıl həftə» kampaniyası başlanmışdır

Noyabrın 12-də Azərbaycan Diplomatik Akademiyasında Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən Ətraf Mühitin Mühafizəsi üzrə Beynəlxalq Dialoq Təşəbbüsü - IDEA kampaniyası və BMT-nin Ətraf Mühit üzrə Proqramının (UNEP) birgə layihəsi olan beynəlxalq "Yaşıl həftə"yə start verilmişdir.

AzərTAc xəbər verir ki, layihənin birinci günü "Rio+20 bizə nə verdi?" mövzusunda Beynəlxalq Gənclər Forumu keçirilmişdir. Forumda dövlət və hökumət rəsmiləri, Milli Məclisin deputatları, yerli və xarici qeyri-hökumət təşkilatlarının nümayəndələri, gənc liderlər iştirak etmişlər.

Tədbirdə çıxış edən Azərbaycanın ekologiya və təbii sərvətlər naziri Hüseynqulu Bağırov demişdir ki, IDEA-nın təşəbbüsü ilə reallaşan "Yaşıl həftə" kampaniyası yalnız Azərbaycanda deyil, bütün dünyada təbiətin mühafizəsinə töhfə verəcəkdir. Nazir bu tədbirin "Rio+20" konfransının nəticələrinin müzakirəsinə həsr edilməsini yüksək qiymətləndirmişdir. "Yer kürəsində resurslar tükənir. Ətraf mühit getdikcə qarşısıalınmaz proseslərlə əhatə olunur. Lakin ətraf mühitlə bağlı problemlərin əksəriyyətini insanların dünyagörüşünü, bu məsələlərə baxışını dəyişməklə həll etmək olar" - deyə nazir vurğulamışdır.

H.Bağırov bildirmişdir ki, ətraf mühiti qorumaq üçün dövlətlər, şirkətlər "yaşıl iqtisadiyyat" qurmağa çalışmalıdır. "Yaşıl iqtisadiyyat" o vaxt mümkündür ki, mövcud iqtisadi qüvvələr təbiət üçün çalışmağa başlasın. Tullantıların yenidən emalına daha çox diqqət yetirilsə, ətraf mühitin qorunmasına, "yaşıl iqtisadiyyat" qurulmasına töhfə vermək olar" - deyə nazir qeyd etmişdir.

Azərbaycanda bu sahədə bir sıra layihələrin həyata keçirildiyini bildirən nazir demişdir ki, Abşeronda neftlə çirklənmiş ərazilərin təmizlənməsi, min hektar sahədə yaşıllaşdırma məqsədilə zeytun bağlarının salınması bu sıradan olan layihələrdəndir. Bu istiqamətdə IDEA hərəkatı çərçivəsində vacib layihələr həyata keçirilir. Ətraf mühitin qorunması istiqamətində məhz gənclərin bir ideya ətrafında birləşməsi çox əhəmiyyətli məsələdir. Çünki gələcək məhz gənclərin əlindədir və onların səyləri təbiətin qorunmasına, resursların düzgün istifadə edilməsinə lazımi töhfə verə bilər. Nazir forum iştirakçılarına və "Yaşıl həftə" layihəsinə uğurlar arzulamışdır.

Tədbirdə təbiətin qorunması, davamlı inkişaf, ekoloji mühitin indiki və gələcək vəziyyəti barədə təqdimatlar edilmiş, müzakirələr aparılmışdır.

Məruzəçilər İDEYA təşəbbüsü və UNEP proqramı çərçivəsində həyata keçirilən layihələrdən danışmış, gənclərin təbiətin mühafizəsində fəal rolunu qeyd etmişlər. Bildirilmişdir ki, 2030-cu ilədək dünyada böyük ekoloji problemlər, su, qida çatışmazlığı yarana bilər. Bütün bunların qarşısını almaq üçün artıq indidən iqtisadi və sosial sistemlərdə dəyişikliklər edilməlidir.

Noyabrın 16-dək davam edəcək "Yaşıl həftə" çərçivəsində müxtəlif tədbirlər, aksiyalar keçiriləcəkdir.

Azərbaycan.-2012.- 13 noyabr.- S.11.