Londonda keçirilən «WTM 2012» Beynəlxalq turizm sərgisi ilə bağlı Ermənistan KİV-ində yayılmış məlumatlar Azərbaycana qarşı növbəti təxribatdan və uydurmadan başqa bir şey deyildir

Xəbər verildiyi kimi, noyabrın 5-dən 8-dək Londonda keçirilən "WTM 2012" Beynəlxalq turizm sərgisində Azərbaycan Respublikası geniş nümayəndə heyəti ilə təmsil olunmuşdur.

Mədəniyyət və Turizm Nazirliyinin mətbuat xidmətindən AzərTAc-a bildirmişlər ki, sərgi günlərində Ermənistanın müxtəlif kütləvi informasiya vasitələrində guya Azərbaycan stendində bu ölkəyə qarşı təbliğat-təşviqat materiallarının paylanılması və Ermənistan nümayəndələri və sərginin təşkilat komitəsi tərəfindən bu kampaniyanın qarşısının alınması barədə bir sıra uydurma məlumatlar öz əksini tapmışdır.

Qeyd olunanlarla bağlı Mədəniyyət və Turizm Nazirliyi bildirir ki, ölkəmizin təmsil olunduğu hər bir beynəlxalq turizm sərgisində nazirlik tərəfindən Azərbaycanın Ermənistan tərəfindən işğal edilmiş Dağlıq Qarabağ bölgəsinin ayrıca stendlə təmsil olunmasının qarşısı alınır. Bu məsələdə Ermənistan tərəfindən hər hansı bir cəhd olunduğu təqdirdə Mədəniyyət və Turizm Nazirliyinin nümayəndələri və ya həmin ölkədə akkreditə olunmuş Azərbaycan səfirliyi sərgi təşkilatçılarına dərhal məlumat verir və onlar tərəfindən müvafiq tədbirlər görülür.

Ölkəmizin stendindəki bütün çap məhsullarında verilən məlumatlar isə dünya ictimaiyyəti tərəfindən dəstəklənən respublikamızın ərazi bütövlüyü çərçivəsində təqdim olunur və buna görə də onların paylanılması ilə bağlı heç vaxt sərgi təşkilatçıları tərəfindən hər hansı sualla qarşılanmır.

Hər il olduğu kimi, bu il də "WTM 2012" Beynəlxalq turizm sərgisində Azərbaycanın Dağlıq Qarabağ bölgəsi ayrıca stendlə təmsil olunmamışdır (Ermənistan stendində "Karabakh" adlı şirkət iştirak etmişdir). Ölkəmizə aid stenddə isə Azərbaycanın digər turizm potensiallı regionları ilə yanaşı, Qarabağ və Şuşa ilə bağlı bukletlər də ziyarətçilərə paylanılmış və bu zaman sərginin təşkilatçıları ilə ölkəmizin nümayəndə heyəti arasında tərəfindən hər hansı bir xoşagəlməz hadisə baş verməmişdir.

Mədəniyyət və Turizm Nazirliyinin bəyanatı bu sözlərlə bitir: "Bütün bunları nəzərə alaraq Ermənistanın kütləvi informasiya vasitələrində yayılan məlumatları tamamilə əsassız hesab edirik və bu iftiraların həmin ölkənin daxili siyasətində müəyyən dividendlərin qazanılması məqsədi ilə hazırlanması kimi qiymətləndiririk".

Azərbaycan.-2012.- 13 noyabr.- S.11.