Tanınmış qələm sahibinin ömür yolu «Aqşin Babayev – 75» kitabında

Mədəniyyət və Turizm Nazirliyinin dəstəyi ilə "Aqşin Babayev - 75" adlı nəfis tərtibatlı kitab çapdan çıxmışdır.

AzərTAc xəbər verir ki, yazıçı-dramaturq, filologiya elmləri doktoru, professor Aqşin Babayevin 75 illiyi münasibətilə işıq üzü görmüş kitabda ədibin həyat və yaradıcılığı, müxtəlif illərdə nəşr olunmuş əsərləri barədə məqalələr, eyni zamanda, yubilyar haqqında yazılmış portret oçerklər yer almışdır.

Kitaba Aqşin Babayevin ulu öndər Heydər Əliyevə həsr etdiyi, Türkiyədə, Gürcüstanda və Rusiyada uğurla tamaşaya qoyulmuş "Xilaskar" pyesi, habelə "Bir parça həyat", "Olmuş əhvalat", "Kim nə deyər", "Yaralar" və başqa dram əsərləri haqqında yazılmış maraqlı fikirlər daxil edilmişdir. Topluda, həmçinin Mirzə İbrahimov, Əkrəm Cəfər, Həmid Araslı, Ənvər Nəsrəddinoğlu, Aslan Kavlak (Türkiyə), Bəxtiyar Vahabzadə, Vaqif Bəhmənli və digər tanınmış qələm sahiblərinin Aqşin Babayevə həsr etdikləri məqalələr yer almışdır.

Kitabda yubilyarın Azərbaycan Radiosunda, Milli Məclisdə, Türkiyədə işlədiyi illərdə və hazırda çalışdığı Azərbaycan Dövlət Mədəniyyət və İncəsənət Universitetində əmək fəaliyyətini, müxtəlif görüşlərini əks etdirən fotoşəkillər də verilmişdir.

Aqşin Babayevin ilk hekayəsi 1958-ci ildə "Oktyabr işıqları" almanaxında çap olunmuşdur. 1964-cü ildə ədibin "Cazibəli üfüqlər" ilk hekayələr kitabı çapdan çıxmışdır. O, ədəbiyyatsevərlərin həvəslə oxuduqları "Həmişəbahar", "Bir parça həyat", "Ağ ulduzlar", "Bir ürəyin hərarəti", "Ayrılıq", "Söz gülləsi", "Dünyanın axırı" adlı kitabların müəllifidir. Moskvanın "Sovetski pisatel" nəşriyyatı tərəfindən 30 min nüsxə tirajla nəşr edilən "Kişilər az yaşadı" kitabı isə müəllifinə daha böyük şöhrət gətirmişdir.

Azərbaycan.-2012.- 13 noyabr.- S.12.