İmişli rayonu ərazisində məcburi köçkünlər üçün inşa edilmiş yeni müasir tipli qəsəbə istifadəyə verilmişdir

Azərbaycan Prezidentinin tapşırığına əsasən respublikanın şəhər və rayonlarında məskunlaşmış qaçqın və məcburi köçkünlərin həyat şəraitinin yaxşılaşdırılması uğurla davam etdirilir. Fin tipli qəsəbələrdə müvəqqəti məskunlaşmış məcburi köçkün ailələri üçün bütün infrastrukturu olan yeni müasir qəsəbələr salınır.

Ümumiyyətlə, 2001-2012-ci illər ərzində 26294 ailə və yaxud da 130400 nəfərdən çox daimi məskunlaşmamış qaçqın və məcburi köçkünlər üçün 76 qəsəbə, hündürmərtəbəli evlərdən ibarət məhəllə və fərdi evlər inşa edilmişdir.

Bundan başqa, Maliyyə Nazirliyi tərəfindən ayrılmış vəsait hesabına 1047 ailə və ya 4600 nəfər məcburi köçkün yaşayış üçün hər cür zəruri şərtlərə cavab verən mənzillərə köçürülmüşdür.

Hazırda bu istiqamətdə işlər intensiv şəkildə davam etdirilir.

AzərTAc xəbər verir ki, noyabrın 14-də məcburi köçkünlər üçün İmişli rayonunda inşa olunmuş daha bir qəsəbənin açılışı olmuşdur.

Açılış mərasimində Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov, Nazirlər Kabineti Aparatının qaçqınların, məcburi köçkünlərin və miqrasiya problemləri üzrə şöbəsinin müdiri Qurban Sadıqov, Milli Məclisin deputatları, məcburi köçkün və ətraf rayonların icra hakimiyyətlərinin başçıları və digər rəsmi şəxslər iştirak etmişlər.

Mərasim iştirakçıları əvvəlcə evlərə baxmış, Baş nazirin müavini Azərbaycan Prezidenti İlham Əliyevin adından tam təmirli, mebel və digər məişət avadanlığı ilə təmin olunmuş üçotaqlı evin açarlarını Füzuli rayonundan olan məcburi köçkün Camal Sadıqovun ailəsinə təqdim etmişdir. Evin sahibəsi, qəsəbə qadınlar şurasının sədri Əsli Sadıqova göstərilən diqqət və qayğıya görə məcburi köçkünlər adından dövlət başçısına dərin minnətdarlıq etmişdir.

Sonra tədbir qəsəbədəki tam orta məktəbdə davam etmişdir. Burada məktəbin özfəaliyyət kollektivinin ifa etdiyi xalq mahnıları iştirakçılara xoş ovqat bəxş etmişdir.

Baş nazirin müavini Əli Həsənov məcburi köçkünləri Prezident İlham Əliyevin adından yeni qəsəbənin açılışı münasibətilə təbrik etmişdir.

Əli Həsənov, həmçinin Yeni Azərbaycan Partiyasının yaranmasının 20-ci ildönümü münasibətilə partiya üzvlərini və bu siyasi partiyanı dəstəkləyən bütün insanları təbrik etmişdir.

Baş nazirin müavini demişdir ki, Azərbaycan xalqının böyük oğlu Heydər Əliyev qaçqın və məcburi köçkünlərin problemlərinin həllini daim diqqətdə saxlamışdır. Ulu öndərin siyasi kursunu ləyaqətlə davam etdirən Prezident İlham Əliyev də qaçqın və məcburi köçkünlərə daim diqqət və qayğı göstərir, onların problemlərinin həllinə çalışır. Son bir neçə ildə qaçqın və məcburi köçkünlər üçün müasir tipli, hər cür şəraiti olan 72 yeni qəsəbə salınmış, 120 minə yaxın məcburi köçkün həmin qəsəbələrdə məskunlaşmışdır. Cari ilin sonunadək daha 4 yeni qəsəbə istifadəyə veriləcəkdir. Bu qəsəbələrdə daha 20 min məcburi köçkün məskunlaşacaqdır. Məcburi köçkünlər üçün yeni qəsəbələrin tikintisi növbəti illərdə də davam etdiriləcəkdir. Torpaqlarımız işğaldan azad olunduqdan sonra isə "məskunlaşdırma prosesi" "qayıdış proqramı" ilə əvəz olunacaqdır.

Prezident İlham Əliyevin rəhbərliyi altında ölkəmizin daim inkişaf etdiyini deyən Baş nazirin müavini bildirmişdir ki, Azərbaycanın BMT Təhlükəsizlik Şurasına qeyri-daimi üzv seçilməsi, bir sıra mühüm beynəlxalq tədbirlərin Bakıda keçirilməsi bir daha sübut edir ki, dövlətimizin nüfuzu bütün dünyada artmış, mövqeləri daha da möhkəmlənmişdir.

Bildirilmişdir ki, Azərbaycan Prezidentinin rəhbərliyi altında həyata keçirilən məqsədyönlü siyasət nəticəsində Dağlıq Qarabağ münaqişəsi öz ədalətli həllini tapacaq, qaçqın və məcburi köçkünlər öz doğma torpaqlarına qayıdacaqlar. Bu cür və bundan yaxşı evlər işğaldan azad olunacaq torpaqlarda inşa olunacaqdır.

Ə.Həsənov demişdir: "Ümummilli liderin siyasi kursunu uğurla davam etdirən, onun ideyalarını dönmədən həyata keçirən İlham Əliyevin digər siyasətçilərdən əsas fərqi ondadır ki, o, öz millətinin xoşbəxt gələcəyini düşünür. Xalqını parlaq gələcəyə aparır. Qədirbilən xalqımız da bu əməlləri layiqincə qiymətləndirir və onun siyasətini dəstəkləyir. Əminik ki, xalqımız növbəti seçkilərdə də öz düzgün seçimini edəcək və ulu öndərin layiqli davamçısına səs verəcəkdir".

Əli Həsənov işğalçı Ermənistanda baş verən proseslərə də toxunmuş, son 15 ildə 1,5 milyon, təkcə bu ilin 9 ayında isə 90 min insanın Ermənistanı tərk etdiyini bildirmişdir. Baş nazirin müavini demişdir ki, Ermənistan dövləti tam iflasa uğramışdır və bu dövlətin rəhbərliyi bunu yaxşı başa düşür. Lakin onlar xarici havadarlarının həm təzyiqi, həm də köməyi qarşısında öz çirkin əməllərindən əl çəkə bilmirlər. Azərbaycan dövləti isə daha da möhkəmlənir və inkişaf edir. Bu inkişaf isə bizə öz problemimizi həll etməyə imkan verir.

Sonra Füzulu rayonundan olan məcburi köçkün Camal Sadıqov qaçqın və məcburi köçkünlər adından çıxış etmiş, göstərilən diqqət və qayğıya görə Prezident İlham Əliyevə, Azərbaycanın birinci xanımı, Heydər Əliyev Fondunun prezidenti Mehriban Əliyevaya minnətdarlığını bildirmişdir.

Qəsəbədə ev ilə təmin olunmuş məcburi köçkün Ümidvar Ağayev və İradə Miriyeva da onlara göstərilən diqqət və qayğıya görə minnətdarlıqlarını bildirmişlər.

Daha sonra qəsəbənin açılışı olmuşdur. Baş nazirin müavini, dövlət və hökumət nümayəndələri məktəbin birinci və ikinci mərtəbələrində ümummilli lider Heydər Əliyevin, eləcə də Prezident İlham Əliyevin müxtəlif dövrlərdə qaçqın və məcburi köçkünlərin məskunlaşdığı bölgələrə səfərlərini, keçirdikləri görüşləri əks etdirən fotoguşələrə baxmışlar.

Məlumat üçün bildirilmişdir ki, yeni qəsəbə Azərbaycan Prezidentinin 2004-cü il 1 iyul tarixli sərəncamı ilə təsdiq edilmiş "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"na Azərbaycan Prezidentinin 2007-ci il 31 oktyabr tarixli sərəncamı ilə təsdiq edilmiş əlavənin müvafiq bəndinə əsasən tikilmişdir.

İmişli rayonu ərazisindəki fin tipli qəsəbələrdə müvəqqəti məskunlaşmış 550 məcburi köçkün ailəsindən birinci mərhələdə 325 ailə üçün yeni yaşayış qəsəbəsi salınmışdır.

Yeni qəsəbəyə 325 ailə və ya 1462 nəfər məcburi köçkün (Füzuli rayonundan 301, Ağdam rayonundan 20, Xocavənd rayonundan 2 və Cəbrayıl rayonundan 2 ailə) köçürüləcəkdir.

Qəsəbənin ərazisi 100 hektar sahəni əhatə edir ki, bundan 32,54 ha qəsəbənin tikintisi üçün, 44,96 ha isə həmin qəsəbəyə köçürüləcək məcburi köçkünlərə pay torpaqları kimi nəzərdə tutulmuşdur.

Bu qəsəbədə inşa edilmiş 325 evdən 30-u birotaqlı, 163-ü 2 ikiotaqlı, 115-i üçotaqlı, 17-si isə dördotaqlıdır.

Bundan əlavə, qəsəbənin ərazisində 360 yerlik məktəb, 50 yerlik uşaq bağçası, klub-icma mərkəzi, inzibati bina, feldşer-mama məntəqəsi tikilmişdir.

Tikintinin sifarişçisi Məcburi Köçkünlərin Sosial İnkişaf Fondudur.

Qəsəbənin elektrik və qaz təchizatı şəbəkələri İmişli rayonunun kommunikasiyalarına qoşulmuşdur.

Qəsəbədə qazanxana, istirahət parkı, su anbarı, eləcə də pay torpaqlarını və həyətyanı sahələri suvarmaq üçün 2,7 kilometr uzunluğunda qapalı suvarma şəbəkəsi, qrunt sularını kənarlaşdırmaq üçün isə qəsəbə ərazisində 4 kilometr uzunluğunda drenaj şəbəkəsi tikilmişdir.

Bu qəsəbə qaçqın və məcburi köçkünlər üçün indiyədək salınmış sayca 73-cü yaşayış məntəqəsidir.

Baş nazirin müavini qəsəbədə aparılmış tikinti-abadlıq işlərindən, məcburi köçkünlər üçün yaradılmış şəraitdən razılığını bildirmişdir.

Azərbaycan.-2012.- 15 noyabr.- S.3.