Naxçıvanda Yeni Azərbaycan Partiyasının 20 illiyi qeyd edilmişdir

Azərbaycanın son dərəcə ağır bir dövründə - ötən əsrin 90-cı illərində Naxçıvanda ulu öndər Heydər Əliyevin yaratdığı Yeni Azərbaycan Partiyası dövlət müstəqilliyimizin möhkəmləndirilməsinin və ölkəmizin hərtərəfli yüksəlişinin əsas təminatçısı olmuşdur. Ötən müddətdə Yeni Azərbaycan Partiyası böyük yol keçmiş, əsas hərəkətverici siyasi təşkilata çevrilmişdir. Partiyanın yubiley tədbirləri ölkəmizin hər yerində olduğu kimi, muxtar respublikada da silsilə tədbirlərlə qeyd edilmişdir.

Noyabrın 14-də Naxçıvanda Yeni Azərbaycan Partiyasının yaradılmasının 20 illiyi münasibətilə təntənəli tədbir keçirilmişdir.

Tədbir iştirakçıları əvvəlcə Yeni Azərbaycan Partiyasının və müstəqil Azərbaycan Respublikasının qurucusu və memarı, ümummilli lider Heydər Əliyevin Naxçıvan şəhərinin baş meydanında ucaldılan abidəsi önünə gül qoymuş, ulu öndərin xatirəsini ehtiramla yad etmişlər.

Sonra tədbir 1992-ci ildə Yeni Azərbaycan Partiyasının ilk təsis konfransının keçirildiyi Cəlil Məmmədquluzadə adına Naxçıvan Dövlət Musiqili Dram Teatrında davam etdirilmişdir.

Yubiley tədbirində çıxış edən Naxçıvan Muxtar Respublikası Ali Məclisinin Sədri Vasif Talıbov xatırlatdı ki, Yeni Azərbaycan Partiyası ölkəmizin siyasi həyatında gərgin proseslərin getdiyi bir dövrdə yaranmışdır. Partiyamızın sədri, ölkə Prezidenti cənab İlham Əliyev həmin dövrdə mövcud vəziyyət, Azərbaycanın parçalanmasına yönəlmiş cəhdlər barədə danışaraq demişdir: "Azərbaycan xalqı ölkəmiz üçün həlledici məqamda bir yumruq kimi Heydər Əliyevin ətrafında birləşdi və Heydər Əliyevin ideyalarına, onun siyasətinə, onun dünyabaxışlarına, onun fəlsəfəsinə sadiqliyini bir daha göstərdi".

Bu tarixi yubiley günündə partiyanın və müstəqil Azərbaycan dövlətinin qurucusu, ümummilli lider Heydər Əliyevin əziz xatirəsini dərin ehtiramla yad edirik. Qədim Şərq filosofları deyirdilər ki, dövlətin inkişafı iki amildən asılıdır: onlardan birincisi xalqın dəstəyini qazanan müdrik şəxsiyyətin olmasıdırsa, ikincisi xalqı arxasınca aparan sağlam ideologiyanın olmasıdır. Xalqın dəstəyini qazanan ümummilli lider müstəqilliyimizi qorumaq və daha da möhkəmlətmək, ölkənin parçalanmasının qarşısını almaq və düşdüyü ağır sosial-iqtisadi böhrandan xilas etmək üçün möhkəm təmələ söykənən ideologiya əsasında Yeni Azərbaycan Partiyasını siyasi fəaliyyət müstəvisinə çıxardı. Partiyanın qarşısına qoyduğu məqsədlərdən danışan ulu öndərimiz həmin dövrdə deyirdi: "Yeni Azərbaycan Partiyası mövcud vəziyyətdə bütün Azərbaycan xalqının mənafelərinə xidmət etmək üçün və xalqın ağır dövründə ölkəmizin qarşısında duran məsələlərin həll edilməsi üçün zamanın tələblərinə uyğun olaraq yaranmış bir partiyadır".

Partiyanın yaradılmasından ötən 20 il tam sübut etmişdir ki, müstəqil Azərbaycanın inkişafı ulu öndərin müəyyənləşdirdiyi siyasi-hüquqi konsepsiya və sosial-iqtisadi tərəqqi modeli əsasında mümkündür. Bu inkişaf modelinin əsası ötən əsrin 70-ci illərindən qoyulmuşdur. Ümummilli lider o dövrdə yaranan imkanlardan istifadə etməklə Azərbaycanı özünə qaytarmış, ölkəmiz ittifaq dövlətinin aqrar əlavəsindən sənaye kompleksinin, tikintinin, elmin, təhsilin, səhiyyə və mədəniyyətin yüksək inkişaf həddinə çatdığı qabaqcıl respublikaya çevrilmişdi. Ulu öndərin Azərbaycanda hakimiyyətinin birinci dövrünü əhatə edən 14 il ərzində 300-ə yaxın zavod, fabrik, istehsalat sahələri tikilib istifadəyə verilmişdi. Kimya və neft maşınqayırma sənayesi müəssisələri tamamilə yenidən qurulmuş, mikrorayonlar, qəsəbə və şəhərlər salınmışdı. Qısa müddətdə elektronika, radiotexnika, kosmos, aviasiya, hesablama texnikası istiqamətli obyektlərin yaradılması Azərbaycanın gələcəyinə istiqamətlənmiş müdrik siyasətin nəticəsi idi. Ümummilli liderin partiya və dövlət rəhbəri kimi siyasi fəaliyyətinin ikinci dövrü Yeni Azərbaycan Partiyasının yaranması, hakim partiya statusu qazanması və müstəqil dövlət quruculuğu məsələləri ilə bağlıdır.

Ali Məclisin Sədri ulu öndərin "Vəziyyət elə təhlükəli xarakter almışdı ki, 1991-ci ildə yaranmış müstəqil dövlətimiz qəsdən və yaxud səriştəsizlikdən yaranan idarəsizlik nəticəsində real itirilmək təhlükəsi ilə üz-üzə qalmışdı" - fikirini xatırladaraq dedi ki, dövlət müstəqilliyinin itirilməsi təhlükəsi Azərbaycanda yeni siyasi hərəkatın yaranmasına, yeni siyasi gücə böyük ehtiyac doğurmuşdu. Bu siyasi gücü ortaya Azərbaycan xalqının qətiyyəti qoymuşdu. Ötən əsrin 90-cı illərində öz liderinin ətrafında birləşən xalqımızın siyasi iradəsi o vaxtlar Naxçıvan Muxtar Respublikası Ali Məclisinin Sədri işləyən ulu öndərə ünvanlanmış 1992-ci il 16 oktyabr tarixli "Azərbaycan sizi gözləyir" müraciətində öz əksini tapmışdı. Tanınmış elm və mədəniyyət xadimləri, ziyalılar tərəfindən imzalanmış həmin müraciətdə deyilirdi: "İndiki vəziyyətdə bu çətin, məsuliyyətli işi öz öhdəsinə götürməyə qadir yeganə şəxs Sizsiniz! Siz bu gün siyasi, iqtisadi, hərbi və mənəvi blokadada olan Naxçıvan Muxtar Respublikasını məhz öz şəxsi nüfuzunuz və uzaqgörən diplomatik səriştənizlə qoruyub saxlayır və idarə edirsiniz... İstərdik ki, bu işləri bütün Azərbaycan üçün görəsiniz... Azərbaycan Sizin sözünüzü və qəti qərarınızı gözləyir". Ümummilli lider bu müraciətə 8 gündən sonra "Yeni, müstəqil Azərbaycan uğrunda" çağırışı ilə başlayan tarixi cavab verdi. 1992-ci il oktyabrın 24-də mətbuatda dərc olunmuş cavab məktubunda dahi öndər yaranmış vəziyyətdən çıxış yolunu milli dövlətçiliyin, müstəqilliyin bərqərar olunmasında, Azərbaycanın suverenliyinin, təhlükəsizliyinin təmin edilməsində və vətəndaşlara azad, xoşbəxt, firavan həyat şəraitinin yaradılmasında görürdü. Cavab məktubunda deyilirdi: "Müstəqil Azərbaycan dövlətinin gələcək həyatının və fəaliyyətinin əsasını təşkil edən demokratiya və plüralizm şəraitində sizin müraciətinizdə göstərilən Yeni Azərbaycan Partiyasının yaradılması obyektiv zərurətdən doğur".

Bundan sonra, 1992-ci il noyabrın 21-də Naxçıvan şəhərində Yeni Azərbaycan Partiyası təsis olundu. Xalq Cəbhəsi-Müsavat cütlüyü partiyanın Bakı şəhərində təşkilatlanmasına imkan vermədiyindən, ölkəmizin müxtəlif bölgələrindən gəlmiş 550-dən artıq nümayəndənin iştirak etdiyi təsis konfransı blokada vəziyyətinə görə kəskin enerji çatışmazlığı şəraitində yaşayan Naxçıvanda keçirildi. Ulu öndər həmin günü belə xatırlayırdı: "Biz 1992-ci ilin şaxtalı bir günündə, istilik olmayan bir zalda, Naxçıvan Dövlət Teatrının binasında paltoda və çoxları papaqda oturaraq ilk konfransımızı keçirirdik. Üşüyürdük, əlimizi əlimizə sürtürdük. Amma iradəmiz yüksək idi, iradəmiz güclü idi. Gələcəyə çox nikbinliklə baxırdıq... Məni sevindirən odur ki, ağır şəraitdə Naxçıvanda keçirdiyimiz konfrans ölkənin və partiyanın böyük inkişaf yolunu təmin etdi".

Xalqımızın və dövlətimizin taleyinin həll olunduğu bir dövrdə meydana çıxan Yeni Azərbaycan Partiyası milli dövlətçiliyimizin inkişafı üçün son dərəcə əhəmiyyətli olan yeni tarixi mərhələnin əsasını qoydu. Güclü sosial bazası, praqmatik və gerçəkliyə əsaslanan bitkin proqramı, ulu öndər Heydər Əliyev kimi lideri olan Yeni Azərbaycan Partiyasının siyasi səhnəyə çıxması XX əsr Azərbaycan tarixinin mühüm hadisəsi idi. Yeni Azərbaycan Partiyasının təsis edilməsindən 7 ay sonra dahi liderin ali hakimiyyətə ikinci qayıdışı ölkənin düşdüyü ağır problemlərdən xilasının başlanğıcı oldu. Yeni Azərbaycan Partiyası yarandığı gündən ölkəmizin müstəqilliyinin qorunması, dövlətçiliyin möhkəmləndirilməsi, iqtisadiyyatın inkişaf etdirilməsi, demokratik təsisatların bərqərar olunması istiqamətində ardıcıl mübarizə aparmışdır. Bu partiya qısa zamanda sabitliyi bərqərar edən, demokratik dəyərlərə üstünlük verən, hüquqi, demokratik, dünyəvi Azərbaycan dövləti və vətəndaş cəmiyyəti quruculuğu prosesini həyata keçirən real siyasi qüvvə kimi özünü təsdiq etdi, müxalifət partiyasından hakim partiyaya, siyasi partiyadan ümumxalq partiyasına çevrildi.

Bu gün ölkəmizdə Yeni Azərbaycan Partiyası qədər geniş sosial bazaya malik olan kütləvi və dayanıqlı, siyasi proseslərə həlledici təsir imkanı olan ikinci bir partiya mövcud deyil. Yeni Azərbaycan Partiyasının gücü nədədir? Ölkə Prezidenti, partiyamızın sədri cənab İlham Əliyev bu barədə belə deyir: "Yeni Azərbaycan Partiyasının gücü ilk növbədə onun əvəzsiz lideri Heydər Əliyevdir. Yeni Azərbaycan Partiyasının gücü bundadır ki, onun təməlində duran prinsiplər əməli surətdə həyata keçirilir. Yeni Azərbaycan Partiyasının gücü ondan ibarətdir ki, Yeni Azərbaycan Partiyası liderinin daxili və xarici siyasətini xalq bəyənir və dəstəkləyir". Yeni Azərbaycan Partiyasının gücü həm də onun ideyalarının və cəmiyyət həyatının ən müxtəlif məsələlərinə dair konseptual baxışlarının məhdud zaman çərçivəsində deyil, uzun bir dövrə və tarixi proseslərə hesablanmasındadır. Məhz bu amili əsas götürərək ümummilli lider deyir: "Yeni Azərbaycan Partiyası Azərbaycanın dünəninin, bu gününün və gələcəyinin partiyasıdır".

Ulu öndərin və onun qurucusu olduğu partiyanın ən böyük uğurlarından biri də siyasi varislik probleminin uğurla həll edilməsi, Azərbaycanın işıqlı gələcəyinə təminat yaradılmasıdır. Böyük dövlət xadimi Heydər Əliyev 2003-cü il oktyabrın 1-də Azərbaycan xalqına müraciətində yazırdı: "Mənim hələ tamamlanmamış çox perspektivli planlarım var. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcəkdir... Həm İlham Əliyev, həm də Yeni Azərbaycan Partiyası bundan sonra da xalqımızın layiqli övladlarını öz ətrafında birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər".

Yola saldığımız ötən illər göstərdi ki, Yeni Azərbaycan Partiyasının qüdrəti öz əksini ulu öndərin tarixi prosesləri qabaqlayan müdrikliyində və ölkə Prezidenti cənab İlham Əliyevin liderlik keyfiyyətlərində tapmışdır. Ölkə rəhbəri tərəfindən gerçəkləşdirilən böyük iqtisadi layihələr, beynəlxalq aləmdə qazanılan nailiyyətlər, dünya azərbaycanlılarının birliyinin daha da möhkəmləndirilməsi, həyata keçirilən uğurlu milli dirçəliş və dövlətçilik siyasəti, eyni zamanda, Yeni Azərbaycan Partiyasının real gücünün ifadəsidir. Məhz Heydər Əliyev yolunun, ulu öndərin milli dövlətçilik konsepsiyasının uğurla davam etdirilməsi müstəqil Azərbaycanı əsl tərəqqiyə qovuşdurmuş, regionda lider dövlətə çevirmişdir. 20 illik şanlı tarixi ərzində Yeni Azərbaycan Partiyasının əldə etdiyi nailiyyətlər partiyanın Naxçıvan Muxtar Respublikası Təşkilatının fəaliyyətində də özünü göstərməkdədir. Ötən dövr ərzində ümummilli lider Heydər Əliyevin müəyyənləşdirdiyi prinsiplərə sadiq qalan Yeni Azərbaycan Partiyasının Naxçıvan Muxtar Respublika Təşkilatı yüksək inkişaf və təşkilatlanma yolu keçmiş, partiyanın sıraları cəmiyyətin bütün təbəqələrindən olan üzvlər hesabına xeyli genişlənmişdir. Əgər 1992-ci ildə partiyanın Naxçıvan Muxtar Respublikasındakı təşkilatlarının sırasında 1118 üzv vardırsa, hazırda partiyanın muxtar respublika təşkilatının sıralarında 49 minə yaxın üzv birləşmişdir. Başqa sözlə, partiyanın muxtar respublika təşkilatı üzvlərinin sayı 44 dəfə artmışdır. Bu, ilk növbədə, ulu öndər Heydər Əliyevin zəngin dövlətçilik irsinə, siyasi fəlsəfəsinə sədaqət və ehtiramın, bu gün ölkə Prezidenti tərəfindən həyata keçirilən siyasətə dərin inamın və etibarın ifadəsidir.

Müdriklərin "Əsl siyasi yol inkişaf və tərəqqi hədəfinə atılmış bir oxdur. Əgər doğru bir niyyətlə düzgün nişan alınsa, hədəf vurulmuş, ölkə isə rifaha qovuşmuş olar" - fikirini xatırladan Ali Məclisin Sədri demişdir ki, partiyanın yarandığı gündən ötən 20 il ərzində əldə olunan nailiyyətlər qəbul olunmuş siyasi xəttin düzgünlüyünün, Heydər Əliyev quruculuq xəttinin xalqımızın rifahına xidmət etdiyinin daha bir təsdiqidir. Bu dövrdə Naxçıvan Muxtar Respublikasında ümumi daxili məhsul istehsalının həcmi 61 dəfə çoxalmışdır. Öz növbəsində sənaye məhsulu istehsalının həcmi 121 dəfə, kənd təsərrüfatı məhsulunun həcmi 13 dəfə, əsas kapitala investisiya qoyuluşu 367 dəfə, rabitə xidmətlərinin həcmi 156 dəfə, xarici ticarət dövriyyəsi 78 dəfə artmış, muxtar respublikanın enerji təhlükəsizliyi təmin olunmuşdur. 20 il ərzində muxtar respublikada 9 min 947 müxtəlif təyinatlı obyekt tikilərək və ya əsaslı təmir olunaraq istifadəyə verilmiş, sahibkarlığın inkişafına diqqət artırılmış, 1130 yeni istehsal və xidmət sahəsi yaradılmışdır. Bunlar bir tərəfdən muxtar respublikada 304 növdə məhsula olan tələbatın daxili imkanlar hesabına ödənməsinə şərait yaratmışdırsa, digər tərəfdən, məşğulluq səviyyəsinin yüksəlməsinə də öz təsirini göstərmişdir. Qeyd olunan dövrdə 77 mindən çox yeni iş yeri açılmışdır ki, onun da 50 mini, yaxud 65 faizi daimi iş yerləridir. Partiyamızın yaranmasından ötən 20 il ərzində sosial sahənin inkişafı da artan xətt üzrə getmiş, 77 min 814 şagird yerlik 193 orta məktəb binası, 191 səhiyyə müəssisəsi tikilərək və ya yenidən qurularaq istifadəyə verilmiş, infrastrukturun formalaşması sahəsində görülən tədbirlər davam etdirilmiş, 128 körpü tikilmiş və ya əsaslı təmir olunmuş, ən müasir tələblərə cavab verən yeni yollar salınmışdır.

Biz əldə olunanlarla kifayətlənməməli, fəaliyyətimizi inkişaf edən həyatın reallıqlarına uyğun qurmalıyıq. Yeni Azərbaycan Partiyasının, Heydər Əliyev Partiyasının üzvü kimi şərəfli adı öz işimizlə doğrultmalıyıq. Yeniləşən cəmiyyətdə partiya işi də yeniləşməli və inkişaf etməlidir. Təkcə son beş ildə təşkilatımıza 4 mindən artıq gənc üzv qoşulmuşdur. Hazırda partiya üzvlərinin 42 faizdən çoxunu gənclər təşkil edir. Gənc və yaradıcı qüvvələrin partiya sıralarına cəlb edilməsi davam etdirilməli, onlarla məqsədyönlü iş aparılmalı və sağlam mühitdə gənc siyasətçilər nəsli yetişdirilməlidir.

Çıxışının sonunda Ali Məclisin Sədri ulu öndər Heydər Əliyevin "Yeni Azərbaycan Partiyasına xidmət etmək Vətənə, millətə, müstəqil Azərbaycan dövlətinə xidmət etmək deməkdir" kəlamını xatırlatmış, bu yolda partiya üzvlərinə və fəallara yeni uğurlar arzulamışdır.

Sonra tədbir iştirakçıları Naxçıvan Dövlət Televiziyasının hazırladığı "Yeni Azərbaycan Partiyası - 20: dünənin, bu günün və gələcəyin partiyası" adlı sənədli televiziya filminə baxmışlar.

Tədbir Naxçıvan Dövlət Filarmoniyası kollektivinin ifasında konsert proqramı ilə başa çatmışdır.

Elxan MƏMMƏDOV

Azərbaycan.-2012.- 15 noyabr.- S.4.