Elektron elm problemləri üzrə I Respublika elmi-praktik konfransı öz işinə başlamışdır

 

Noyabrın 15-də Rabitə və İnformasiya Texnologiyaları Nazirliyi, Azərbaycan Milli Elmlər Akademiyasının (AMEA) İnformasiya Texnologiyaları İnstitutunun təşkilatçılığı ilə Elektron elm problemləri üzrə I Respublika elmi-praktik konfransı öz işinə başlamışdır.

Tədbiri açan AMEA prezidenti akademik Mahmud Kərimov yaşadığımız dövrdə informasiya texnologiyalarının dinamik inkişafının və tətbiqinin zəruri olduğunu, dünyada gedən bu proseslərin elmin müxtəlif sahələrinə təsir etməklə yeni reallıqları meydana çıxardığını bildirmişdir.

Qeyd olunmuşdur ki, Azərbaycan Prezidentinin gələcəklə bağlı əhəmiyyətli çağırışları ölkədə biliyin ön plana keçməsi, əmək fəaliyyətinin informasiya-kommunikasiya texnologiyalarının (İKT) imkanlarından istifadə etməklə daha yüksək səviyyədə qurulması  elektron elmin (e-elmin) formalaşması üçün geniş zəmin yaratmışdır.

Beynəlxalq səviyyədə e-elmlə bağlı müxtəlif konsepsiyalar, proqramlar qəbul olunmuşdur. İnformasiya cəmiyyəti məsələləri üzrə  2005-ci ilin noyabrında Tunisdə keçirilən beynəlxalq sammitdə qəbul olunan qərarların e-elmin formalaşmasında və inkişafında böyük  əhəmiyyəti vardır. Azərbaycanda da bu istiqamətdə müəyyən işlər görülmüşdür. UNESCO-nun xüsusi komissiyasının tövsiyəsi ilə Trans-Avropa Elmi Tədqiqat və Təhsil Şəbəkəsi Assosiasiyasında (TERENA) qeydiyyata alınmış e-elmin şəbəkə platforması olan "AzScienceNet Elm Kompyuter" şəbəkəsi fəaliyyət göstərir, GRİD texnologiyaları əsasında hesablama mühitlərinin yaradılması istiqamətində də mühüm işlər görülmüşdür.

Bugünkü e-elmin problemlərinə həsr olunmuş elmi-praktik konfrans ölkəmizdə formalaşan informasiya cəmiyyətinə elmi dəstək verilməsi, e-elmin məqsəd, vəzifə və inkişaf perspektivlərinin müəyyən olunması, elmi qurumların fəaliyyətində informasiya texnologiyalarının geniş tətbiqi problemlərinin müzakirəsi, həlli yollarının axtarılması baxımından mühüm əhəmiyyət kəsb edir.

Rabitə və İnformasiya Texnologiyaları naziri akademik Əli Abbasov ölkəmizdə dövlət quruculuğu, güclü iqtisadiyyatın yaradılması, cəmiyyətin demokratikləşməsi, əhalinin rifahının yüksəldilməsi istiqamətlərində aparılan məqsədyönlü işlərdən danışmışdır.

Qeyd olunmuşdur ki, müəssisə və təşkilatların fəaliyyətində şəffaflığın təmin edilməsi üçün informasiya cəmiyyətinin (İC) qurulması vacibdir. Elektron elm "Elektron Azərbaycan" Dövlət Proqramı çərçivəsində formalaşmaqda olan e-hökumətin tərkib hissəsidir. Son illərdə İC quruculuğu sahəsində böyük uğurlar əldə olunmuş, elmi qurumların fəaliyyətində informasiya texnologiyalarının tətbiqi genişlənmişdir.

Ə.Abbasov həmçinin e-elmin formalaşması istiqamətində qarşıda duran vəzifə və perspektivlərdən ətraflı söhbət açmışdır.

Ölkəmizdə informasiya cəmiyyətinin formalaşması prosesinin uğurla inkişaf etdiyini qeyd edən təhsil naziri Misir Mərdanov e-təhsil və e-elmin inteqrasiyasının zəruriliyini önə çəkmiş, təhsilin inkişafında informasiya texnologiyalarının aparıcı rolundan danışmışdır.

Azərbaycan Respublikasının Prezidenti yanında Elmin İnkişafı Fondunun icraçı direktoru Elçin Babayev bildirmişdir ki, hazırda dünyada qloballaşma prosesi gedir. Keçid dövrünü uğurla başa vuraraq davamlı inkişaf mərhələsinə qədəm qoyan Azərbaycan bu qloballaşma proseslərinə öz dəst-xətti ilə inteqrasiya olunmaqdadır. Bu isə Azərbaycanda ən yeni texnologiyaların tətbiqini elmin inkişafı kontekstində zəruri edir. Son dövrdə Azərbaycanda bu sahədə sürətli və dinamik inkişaf müşahidə olunur. Artıq informasiya texnologiyalarının tətbiqi genişlənmiş, internet sürətlə inkişaf etmiş, radio-televiziya yayımlarının keyfiyyəti yüksəlmiş, mobil telefon və kompyuter istifadəçilərinə görə Azərbaycan dünya dövlətləri arasında öncül yer tutmuşdur.

"Azərbaycan Respublikasında 2009-2015-ci illərdə elmin inkişafı üzrə Milli Strategiyanın həyata keçirilməsi ilə bağlı Dövlət Proqramı"nın əhəmiyyətini vurğulayan Elçin Babayev bildirmişdir ki, strategiyada nəzərdə tutulmuş əsas hədəflərdən biri də elmi fəaliyyətdə islahatların aparılması, İKT-nin geniş tətbiqi, e-elmin formalaşması prosesinin inkişaf etdirilməsidir.

Azərbaycan Respublikasının  Prezidenti yanında Ali Attestasiya Komissiyası sədrinin müavini Vəli Hüseynov respublika üzrə elmi kadrların hazırlanması və ekspertizası prosesində "AzScienceNet" şəbəkəsinin rolu və milli elektron elmi resurslarının yaradılması və qiymətləndirilməsində bu şəbəkənin potensial imkanları haqqında danışmışdır.

Tədbirdə çıxış edən AMEA İnformasiya Texnologiyaları İnstitutunun direktoru, AMEA-nın müxbir üzvü, professor Rasim Əliquliyev e-elmin aktual elmi-nəzəri və texnoloji problemlərini nəzərə çatdırmışdır. "E-elm" proqramının yaradılmasında əsas məqsədin respublikanın elmi idarə və təşkilatlarında aparılan elmi-tədqiqat işlərinin bütün mərhələlərində nəticələrin səmərəliliyini yüksəltmək, onların bu sahədəki fəaliyyətini əlaqələndirmək və istiqamətləndirmək, milli elmin inkişafına kömək etmək və Azərbaycanın ümumdünya elektron informasiya məkanına inteqrasiya olunmasını təmin etməkdən ibarət olduğunu diqqətə çatdırmışdır.

Konfransda e-elmin nəzəri və texnoloji problemləri, şəbəkə infrastrukturu, informasiya təhlükəsizliyi, elmmetriya, bibliometriya, vebometriya, paylanmış hesablama sistemləri və buludları, həmçinin e-elm və sosial şəbəkələr ətrafında məruzələr dinlənilmişdir.

Konfrans işini seksiyalar üzrə noyabrın 16-da davam etdirəcəkdir.

 

 

AzərTAc

 

Azərbaycan.-2012.- 16 noyabr.- S.3.