BMT-nin Baş Məclisinin III Komitəsində Azərbaycanın qaçqın və məcburi köçkün problemindən danışılmışdır

BMT-nin Baş Məclisinin III Komitəsində "BMT-nin qaçqınlar üzrə ali komissarının hesabatı" bəndi ilə bağlı müzakirələr keçirilmişdir.

Azərbaycan Respublikasının BMT yanında Daimi Nümayəndəliyindən AzərTAc-a bildirmişlər ki, müzakirələrdə Daimi Nümayəndəliyin III katibi Leyla Məmmədəliyeva mövzu ilə əlaqədar çıxış etmişdir.

Qaçqınlar və məcburi köçkünlər məsələsinin qlobal problemə çevrildiyini diqqətə çatdıran L.Məmmədəliyeva məcburi köçkünlərin öz evlərinə qayıtmasının təmin edilməsinin əhəmiyyəti barədə danışmışdır. Bildirilmişdir ki, silahlı münaqişələr və işğal zamanı siyasi məsələlərdə razılığın əldə edilməməsinin beynəlxalq humanitar hüquq pozuntularının aradan qaldırılmamasının səbəbi kimi göstərilməsi yolverilməzdir.

Daimi nümayəndəliyin III katibi Ermənistanın təcavüzü nəticəsində ölkəmizdə yaranmış qaçqın və məcburi köçkün problemi, Azərbaycanın ermənilər tərəfindən işğal olunmuş ərazilərində həyata keçirilən etnik təmizləmə siyasəti və hazırda aparılan qeyri-qanuni məskunlaşdırma barədə məlumat vermişdir. Həmçinin BMT Təhlükəsizlik Şurasında qəbul olunmuş qətnamələr və baş katibin məcburi köçkün şəxslərin insan hüquqları üzrə nümayəndəsinin hesabatları xüsusilə vurğulanmışdır. Eyni zamanda, Azərbaycan hökuməti tərəfindən qaçqın və məcburi köçkünlərin ehtiyaclarının və problemlərinin aradan qaldırılması istiqamətində görülmüş mühüm tədbirlərlə bağlı məlumat verilmişdir.

Diqqətə çatdırılmışdır ki, Azərbaycan münaqişənin danışıqlar yolu ilə və beynəlxalq hüquqa əsaslanan həllinə sadiqdir. Bu, öz növbəsində, məcburi köçkünlərin evlərinə qayıtması hüquqlarının reallaşmasını təmin edərdi. Lakin Ermənistan sülh danışıqlarını pozur, işğalla bağlı hazırkı status-kvonu saxlamağa çalışır, mühacirlərin Azərbaycan ərazilərində qeyri-qanuni məskunlaşdırılmasını davam etdirir.

Çıxışda regionda davamlı sülhün və sabitliyin bərqərar olması məqsədilə Ermənistan tərəfindən Azərbaycan ərazilərinin işğalına son qoyulması, etnik nifrət siyasətinin dayandırılması və qonşu dövlətlərlə sivil münasibətlər qurmasının vacibliyi vurğulanmışdır.

Azərbaycan.-2012.- 16 noyabr.- S.8.