Uruqvay parlamentinin nümayəndə heyətinin Azərbaycanın işğal altındakı Dağlıq Qarabağ bölgəsinə səfəri pislənilmişdir

"Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyi Uruqvay parlamentinin nümayəndə heyətinin Yerevandan Azərbaycanın işğal altındakı Dağlıq Qarabağ bölgəsinə getməsini pisləyən bəyanat yaymışdır.

AzərTAc xəbər verir ki, bəyanatda ictimai birlik Uruqvayın vitse-prezidenti, Baş Assambleya və Senatın sədri Danilo Astoriyə parlament nümayəndə heyətinin ölkələrimiz arasında çox qısa bir vaxtda formalaşmış əlaqələrə zidd olan hərəkəti ilə bağlı qəti etirazını bildirmişdir.

Bəyanatda qeyd edilir ki, artıq 20 ildir ki, Ermənistan Azərbaycanın Dağlıq Qarabağ bölgəsini və ona bitişik yeddi rayonu işğal altında saxlayır. Bütün beynəlxalq təşkilatların, xüsusilə də BMT, ATƏT, Avropa Şurası, o cümlədən Avropa Parlamentinin qəbul etdiyi sənədlərdə Azərbaycanın ərazi bütövlüyü, müstəqilliyi və suverenliyi tanınır. Eyni zamanda, beynəlxalq təşkilatlar Azərbaycanın ərazi bütövlüyünü dəstəkləyir və Dağlıq Qarabağı Azərbaycanın ərazisi hesab edir. Lakin Ermənistan BMT Təhlükəsizlik Şurasının Azərbaycan ərazilərindən işğalçı qüvvələrin çıxarılması haqqında qəbul etdiyi dörd qətnaməsinə hələ də məhəl qoymamışdır. Azərbaycan ərazilərinin işğal altında saxlanılması beynəlxalq hüququn normalarına və prinsiplərinə ziddir.

Bəyanatda bildirilir ki, "Dağlıq Qarabağ Respublikası" adlanan qondarma qurum heç bir dövlət tərəfindən tanınmamış və Uruqvay parlamentinin nümayəndə heyətinin bu ərazilərə səfər etməsi qeyri-qanunidir: "Bir daha sizdən xahiş edirik ki, Azərbaycan ilə Uruqvay arasında formalaşmış dostluq əlaqələrini nəzərə alaraq bu məsələ ilə bağlı siyasi iradənizi nümayiş etdirəsiniz. Çünki bu cür addımlar münaqişənin sülh yolu ilə həll olunması istiqamətində aparılan danışıqlar prosesinə zərər gətirməklə yanaşı, regionun gələcək statusuna və inkişafına da ciddi xələl gətirə bilər".

Azərbaycan.-2012.- 17 noyabr.- S.6.