Azərbaycan idman şöhrətini daim yüksəklərdə saxlayır

Bu gün dünyada gedən qlobal inteqrasiya proseslərinin sürətləndirilməsində əhəmiyyəti, irqindən, dinindən asılı olmayaraq, müxtəlif millətlərin nümayəndələrini bir araya toplayaraq onların ədalətli oyun prinsipləri əsasında idman mübarizəsinə qoşulmasını təmin etməsi ilə seçilən beynəlxalq Olimpiya hərəkatı müasir həyatın ayrılmaz tərkib hissəsidir. İndi heç bir dövlət Olimpiya oyunlarından kənarda qalmır, dünyanın ən mötəbər idman tədbirində layiqincə təmsil olunmağa çalışır.

Prezident İlham Əliyevin qeyd etdiyi kimi, Olimpiya oyunlarında göstərilən nəticə təkcə ölkənin idman həyatının deyil, onun iqtisadi potensialının, ictimai, sosial-mədəni həyatının göstəricisidir. Olimpiya oyunlarında qazanılan uğurlar beynəlxalq miqyasda ölkənin imicini yaxşılaşdırmaqla yanaşı, onun imkanlarını nümayiş etdirir.

1997-ci ildə cənab İlham Əliyevin Milli Olimpiya Komitəsinin (MOK) prezidenti seçilməsi ilə ölkəmizdə Olimpiya hərəkatının və bütövlükdə idmanın inkişafında yeni mərhələ başladı. İlk növbədə, Azərbaycan Olimpiya hərəkatının real vəziyyəti öyrənildi, mövcud problemlər aşkara çıxarıldı, işə əngəl törədən amillər müəyyənləşdirildi və onları aradan qaldırmaq üçün təxirəsalınmaz tədbirlər görüldü.

Azərbaycanın Olimpiya oyunlarında layiqincə təmsil olunmasını təmin etmək, beynəlxalq əlaqələri qurmaq və MOK-nın beynəlxalq Olimpiya ailəsinin nüfuzlu üzvünə çevirmək, idmanın bütün növlərini inkişaf etdirmək, idmançılar üçün təlim-məşq toplanışlarını təşkil etmək, onların sosial vəziyyətini yaxşılaşdırmaq, idmançı uğurunu və əməyini qiymətləndirmək, idmanın maddi-texniki bazasını möhkəmlətmək, ölkədə beynəlxalq yarışların təşkilini təmin etmək, beynəlxalq idman qurumlarının tədbirlərinə fəal qoşulmaq, idmanın və bədən tərbiyəsinin kütləviliyini artırmaq, uşaq və yeniyetmələri idmana cəlb etmək kimi məsələlər MOK-nın fəaliyyətinin əsas istiqamətləri oldu.

Beləliklə, cənab İlham Əliyevin MOK-nın prezidenti seçilməsindən sonra ölkədə bədən tərbiyəsi və idmanın inkişafı geniş vüsət aldı, respublikamız beynəlxalq Olimpiya hərəkatına qoşuldu, bu sahədə sistemli şəkildə işlər görüldü.

Azərbaycanın yeniyetmə idmançılarının beynəlxalq turnirlərə göndərilməsi, onların Beynəlxalq Olimpiya Komitəsinin (BOK) və Avropa Olimpiya Komitəsinin (AOK) himayəsi altında keçirilən böyük idman yarışlarında iştirakı təmin olundu. Eyni zamanda ölkədə yeniyetmələr arasında qitə və dünya miqyaslı yarışların təşkili istiqamətində məqsədyönlü işlər həyata keçirildi.

İndi artıq bu tədbirlər silsilə xarakter almışdır. Cənab İlham Əliyevin sayəsində Azərbaycan başda BOK və AOK kimi nüfuzlu təşkilatlar olmaqla dünyanın bütün idman qurumları ilə sıx əlaqə saxlayır. Son illər bu əməkdaşlıq daha da genişlənmişdir. Bunu beynəlxalq idman təşkilatlarının rəhbərlərinin Bakıya müntəzəm səfərləri və ölkəmizdə keçirilən mötəbər idman yarışları da təsdiqləyir.

1997-ci ildən bu günədək BOK, AOK və digər idman təşkilatları ilə sıx əməkdaşlığın qurulması ölkəmizin dünya Olimpiya hərəkatında fəal iştirakını nümayiş etdirir. Bir sözlə, MOK cənab İlham Əliyevin rəhbərliyi altında ideal Olimpiya qurumuna çevrilmişdir.

Ümumiyyətlə, Milli Olimpiya Komitəsinin tarixi müstəqilliyimizin tarixi ilə təxminən üst-üstə düşür. Milli müstəqilliyin bərpasından bir il sonra - 1992-ci ildə Milli Olimpiya Komitəsi yaradıldı. Bu gün Milli Olimpiya Komitəsi 20-ci il dönümünü qeyd edir.

Cari ayın 7-də MOK-nın 20 illik yubileyi münasibətilə təntənəli mərasim keçirilmişdir. Tədbirdə çıxış edən dövlət başçısı İlham Əliyev idmanımızın tarixinə qısa nəzər salaraq görülən işlərdən söz açdı, onların mahiyyət və məqsədlərinə toxundu. Prezident qeyd etdi ki, dövlət siyasəti idmanın təbliği, idmanla məşğul olmaq üçün şəraitin yaradılması, maarifləndirmə, gənc nəslin yetişdirilməsi kimi mühüm istiqamətləri əhatə edir. Görülən işlər arasında yeni idman infrastrukturunun yaradılması xüsusi əhəmiyyət kəsb edir: "Mən çox şadam ki, vaxtilə Milli Olimpiya Komitəsinin təşəbbüsü kimi yaranmış bu proqram artıq ölkə üzrə geniş vüsət almışdır. Birinci Olimpiya idman kompleksi Milli Olimpiya Komitəsi tərəfindən 2000-ci ildə Bakıda ucaldılmışdır. Ondan sonra Azərbaycanda 35 regional Olimpiya Kompleksi tikilib istifadəyə verilib, 8 kompleksin tikintisi davam edir. Beləliklə, yaxın gələcəkdə elə bir şəhər qalmayacaqdır ki, orada müasir, ən yüksək standartlara cavab verən Olimpiya idman mərkəzi olmasın. Bu mərkəzlərdə həm peşəkar idmançılar məşq edirlər, eyni zamanda, bölgə gəncləri, uşaqlar, yeniyetmələr idman bölmələrinə gələrək öz peşəkarlığını artırırlar".

Prezident İlham Əliyevin qeyd etdiyi kimi, böyük idman turnirlərində qazanılan qələbə sadəcə olaraq uğur deyildir: "Hər dəfə milli bayrağımız qaldırılanda, dövlət himnimiz səslənəndə hər bir vətənpərvər Azərbaycan vətəndaşı qürur hissi ilə bu gözəl anları yaşayır. Çünki ölkənin qələbəsi, idmançıların qələbəsi, bizim uğurlarımız hər bir vətənpərvər vətəndaşı sevindirir. Ancaq idman sadəcə olaraq idman yarışlarında əldə edilən qələbə deyildir. İdmanın cəmiyyətdə çox geniş, çoxşaxəli təsiri vardır. Adətən, inkişaf etmiş ölkələrdə idman da inkişaf edir. Yəni, idmanın inkişafı ölkələrin ümumi inkişafının göstəricisidir". Dövlət başçısı belə bir məqamı xüsusi olaraq vurğulamışdır ki, hər bir Olimpiadanın yekunları, uğurları və bəzi hallarda yaşanan məyusluq, eyni zamanda, gələcək fəaliyyətimiz üçün də bir yol göstəricisidir: "Hesab edirəm ki, London Yay Olimpiya oyunları medalların sayına, idmançılarımızın çıxışlarına görə, doğrudan da, böyük qiymətə layiqdir. On medal qazanılıb. Ancaq hamımız yaxşı bilirik ki, ən azı beş medal da qazanılmalı idi. İdmançılarımız buna yaxın idi. Bəzi medalların əyarları daha da üstün olmalı idi. Biz bunu, bəzi Olimpiya oyunlarındakı məqamları yaxşı xatırlayırıq. Ancaq bəzi hallarda ədalətsizlik bizi yoldan çəkindirməməlidir. Biz daha böyük əzmlə və iradə ilə çalışmalıyıq ki, uğurlarımızı artıraq".

Bu gün Azərbaycan dünyada idman ölkəsi kimi tanınır. İdman sahəsində gerçəkləşdirilən dövlət siyasəti, Olimpiya ideallarının təbliği, idmanın maddi-texniki bazasının möhkəmləndirilməsi, müasir Olimpiya komplekslərinin inşası və digər tədbirlər nəticəsində ölkəmiz mötəbər beynəlxalq idman yarışlarının keçirildiyi məkana, dünyanın idman mərkəzlərindən birinə çevrilmişdir. Azərbaycan təkcə müəyyən kateqoriyalı beynəlxalq yarışların deyil, eyni zamanda, qitə və dünya çempionatlarının keçirildiyi ölkədir.

Hazırda ölkəmizdə elə bir mühit formalaşmışdır ki, idmançı olmaq çox şərəfli bir peşədir. Cəmiyyətdə idmana və idmançıya hörmət və məhəbbət yüksək səviyyədədir. Bu, dövlətin yeritdiyi idman siyasətinin birbaşa nəticəsidir.

Elçin CƏFƏROV

Azərbaycan.-2012.- 20 noyabr.- S.4.