Gəncədə Nizami Rayon Məhkəməsinin yeni inzibati binasının açılışı olmuşdur

Gəncədə Nizami Rayon Məhkəməsinin yeni inzibati binasının açılışı olmuşdur. Açılış mərasiminin iştirakçıları əvvəlcə mərkəzi meydanda ümummilli lider Heydər Əliyevin abidəsini ziyarət etmiş, abidə önünə gül dəstələri qoymuş, ulu öndərin xatirəsinə ehtiramlarını bildirmişlər.

Ədliyyə naziri, Məhkəmə-Hüquq Şurasının sədri Fikrət Məmmədovun, Ali Məhkəmənin sədri Ramiz Rzayevin, Gəncə Şəhər İcra Hakimiyyətinin başçısı Elmar Vəliyevin, eləcə də hüquq-mühafizə orqanları rəhbərlərinin, ədliyyə işçilərinin və ictimaiyyət nümayəndələrinin iştirakı ilə keçirilən açılış mərasimində çıxış edənlər bildirmişlər ki, Azərbaycan Prezidenti İlham Əliyevin tapşırıqlarına əsasən son illər ədalət mühakiməsinin səmərəliliyinin artırılması və məhkəmə fəaliyyətinin təkmilləşdirilməsi üzrə aparılan genişmiqyaslı islahatlar nəticəsində ölkəmizdə məhkəmə sistemi əsaslı şəkildə yaxşılaşdırılmış, infrastrukturun müasirləşdirilməsi istiqamətində ardıcıl tədbirlər görülmüşdür.

Keçən il Oğuz rayonunda, bu günlərdə Bakı şəhəri Yasamal rayonunda, indi isə Gəncə və Gədəbəy məhkəmələri üçün inşa edilən yeni inzibati binalar bu sahədə aparılan islahatların davamı olduğunu diqqətə çatdıran natiqlər demişlər ki, vətəndaşların müraciətlərinin asanlaşdırılması, məlumatlılığın və şəffaflığın təmin edilməsi məqsədilə inşa edilən bu binalarda ən son rabitə və informasiya texnologiyaları tətbiq edilmiş, məhkəmə zallarında proseslərin daha dəqiq və sürətlə protokollaşdırılmasına xidmət edən, audio-video yazılışları aparan "Femida" sistemi, elektron sənəd dövriyyəsi üçün bütün zəruri avadanlıqlar quraşdırılmışdır. Sahəsi 3 min 700 kvadratmetr olan binada konfrans və iclas zalları, kitabxana, təlim, maddi sübutlar otaqları, arxiv, təqsirləndirilən şəxslərin müvəqqəti saxlanma kameraları və digər əlavə sahələr də yaradılmışdır. Bununla yanaşı burada vətəndaşlara bank, tibb və poçt xidmətlərindən istifadə etmək imkanı yaradılmışdır.

Qeyd edilmişdir ki, Ədliyyə Nazirliyi ilə Dünya Bankı arasında "Ədliyyə sisteminin müasirləşdirilməsi" birgə layihəsi çərçivəsində ümumilikdə respublikamızda 30-dək məhkəmə binasının tikintisi nəzərdə tutulmuşdur. Hazırda həmin layihəyə uyğun olaraq Bakının Sabunçu, habelə Şəki və Quba rayonlarının məhkəmələri üçün inzibati binaların tikintisi davam etdirilir.

Sonra ədliyyə naziri, Məhkəmə-Hüquq Şurasının sədri Fikrət Məmmədov, Ali Məhkəmənin sədri Ramiz Rzayev, Gəncə Şəhər İcra Hakimiyyətinin başçısı Elmar Vəliyev və digər qonaqlar Gəncə Şəhər Nizami Rayon Məhkəməsinin üçmərtəbəli yeni inzibati binasına baxış keçirmiş, burada yaradılmış şəraitlə tanış olmuşlar.

AzərTAc

Azərbaycan.-2012.- 20 noyabr.- S.6.