Mədəniyyət və Turizm Nazirliyində Qazaxıstanın mədəniyyət və informasiya naziri ilə görüş keçirilmişdir

Noyabrın 19-20-də Bakıda Qazaxıstan Respublikasının mədəniyyət günləri keçirilir. AzərTAc xəbər verir ki, bu münasibətlə Azərbaycan Mədəniyyət və Turizm Nazirliyində Qazaxıstanın mədəniyyət və informasiya naziri Mınbay Darxan Kamzabekulının başçılıq etdiyi nümayəndə heyəti ilə görüş keçirilmişdir.

Qonaqları salamlayan Azərbaycanın mədəniyyət və turizm naziri Əbülfəs Qarayev ölkəmizin mədəni həyatı haqqında məlumat verərək bildirmişdir ki, son illər Azərbaycanda teatr və qalereyalar bərpa edilir, yeniləri tikilir və açılır, dünya miqyaslı tədbirlər keçirilir. Bu da Azərbaycanın inkişaf səviyyəsindən, onun dünyada nüfuzunun artmasından xəbər verir. Hazırda Beynəlxalq Mədəniyyətlərarası Foruma hazırlıq gedir. Forum gələn il mayın 29-dan iyunun 1-dək Bakıda keçiriləcəkdir.

Qazaxıstanın mədəniyyət və informasiya naziri Mınbay Darxan Kamzabekulı TÜRKSOY-un yaradılması təşəbbüsünə və qurumun işində fəal iştirakına görə Əbülfəs Qarayevə minnətdarlığını bildirərək xatırlatmışdır ki, Azərbaycan və qazax xalqlarının tarixi dostluğunun kökləri əsrlərin dərinliyinə gedib çıxır. Hazırda iki ölkənin prezidentlərinin şəxsi dostluğu və səyləri sayəsində həmin münasibətlərə yeni təkan verilmişdir.

Qonaq bildirmişdir ki, UNESCO-nun qərarı ilə bu il "Mədəniyyətlərin yaxınlaşması ili" elan edilmişdir. Bu il Astana MDB-nin və TÜRKSOY-un mədəni paytaxtıdır. Mədəniyyətlər hərəkatının 10 illiyi BMT çərçivəsində də qeyd ediləcəkdir.

Görüşdə elektron kitabxanaların, virtual muzeylərin yaradılması istiqamətində təcrübə mübadiləsinin genişləndirilməsinin zəruri olduğu vurğulanmışdır.

Azərbaycan.-2012.- 20 noyabr.- S.7.