Braziliyanın «Correio Braziliense» qəzetinin xüsusi buraxılışında dərc olunmuş məqalədə Azərbaycana da yer ayrılmışdır

Braziliyanın nüfuzlu "Correio Braziliense" qəzetinin 18 noyabr tarixli xüsusi buraxılışında bu il noyabrın 10-da Braziliyada keçirilən ənənəvi xeyriyyə tədbirinə həsr olunmuş məqalədə Azərbaycanın həmin tədbirdə iştirakından da bəhs edilmişdir.

Azərbaycanın Braziliyadakı səfirliyindən bildirmişlər ki, məqalənin müəllifi Zuleyka Souza qeyd edir ki, tədbirin parlaq hadisəsi bu yaxınlarda Braziliyada fəaliyyətə başlamış Azərbaycan səfirliyinin iştirakı olmuşdur. Səfirlik Braziliya ictimaiyyətinə tanış olmayan Azərbaycan mətbəxinin plov, qutab və paxlava kimi ləziz yeməklərini təqdim etmişdir.

Tədbirdə Azərbaycan mətbəxinin nümunələri ilə yanaşı, milli geyimlərimiz, suvenirlər, xalçalar, kəlağayılar və ölkəmiz haqqında müxtəlif materiallar yerli ictimaiyyətə və diplomatik korpusa təqdim olunmuşdur.

AzərTAc

Azərbaycan.-2012.- 21 noyabr.- S.11.