Yeni Azərbaycan Partiyası ölkəmizin reallıqlarının dünyaya çatdırılması istiqamətində səylərini bundan sonra da genişləndirəcəkdir

Asiya Siyasi Partiyaları Beynəlxalq Konfransının VII Baş Assambleyasının ölkəmizdə keçirilməsi Azərbaycanın beynəlxalq aləmdə nüfuzunun artması və dünyanın ən aktual problemlərinin həllinə öz töhfələrini verməsi ilə bağlıdır. AzərTAc xəbər verir ki, bu sözləri jurnalistlərə Yeni Azərbaycan Partiyasının sədr müavini - icra katibi Əli Əhmədov demişdir.

Yeni Azərbaycan Partiyasının Asiya Siyasi Partiyaları Beynəlxalq Konfransının VII Baş Assambleyasına ev sahibliyi etməsini və bu Assambleyanın Azərbaycanda keçirilməsini bütövlükdə ölkəmizin beynəlxalq aləmdə nüfuzunun artmasının təzahürü olduğunu vurğulayan Ə.Əhmədov bildirmişdir ki, tədbirdə Asiya regionu ölkələrində böyük nüfuz sahibi olan çoxsaylı siyasətçilər iştirak edirlər. Hesab edirəm ki, bunun özü də Azərbaycana göstərilən dəyərin və hörmətin ifadəsidir.

İcra katibi diqqətə çatdırmışdır ki, bütün bunlar Azərbaycanın beynəlxalq aləmdə nüfuzunun yüksək olduğunu təsdiqləməklə bərabər, Yeni Azərbaycan Partiyasının artan və genişlənən beynəlxalq əlaqələrinin təzahürüdür. Yeni Azərbaycan Partiyası ölkəmizin reallıqlarının dünyaya çatdırılması istiqamətində səylərini bundan sonra da genişləndirəcəkdir. "Bizim dostlarımız artır. Bu isə Azərbaycanın maraqlarının beynəlxalq aləmdə daha geniş və qətiyyətlə müdafiə edilməsi imkanlarının yaranması deməkdir", - deyə Ə.Əhmədov qeyd etmişdir.

Azərbaycan.-2012.- 23 noyabr.- S.2.