Məcburi köçkünlərin başqalarına məxsus mənzillərdən köçürülməsi mövcud qanunvericiliyə və beynəlxalq standartlara uyğun həyata keçirilməlidir

BMT Baş katibinin məcburi köçkünlərin insan hüquqları üzrə nümayəndəsinin də dediyi kimi, real alternativlər təklif olunmadan bu cür hallar yolverilməzdir

Ölkəmizdə qaçqın və məcburi köçkünlük probleminin yarandığı ilk dövrdə postsovet məkanında belə ağır problemlə üzləşən Azərbaycan bu gün əhalisinin sayına görə dünyada ən çox qaçqın və məcburi köçkünü olan ölkədir! Bu yaxınlarda respublikamızda keçirilən İkinci Bakı Beynəlxalq Humanitar Forumunda da dövlətimizin başçısı bir daha bəyan etmişdir ki, hazırda dünyada adambaşına düşən qaçqınların ən yüksək sayı məhz Azərbaycandadır. Bir milyondan artıq qaçqın və məcburi köçkün soydaşımızın bu gün də öz doğma torpaqlarına qayıda bilmədiklərini önə çəkən Prezident İlham Əliyev belə ağır problemlə üzləşməsinə baxmayaraq, ölkəmizin müstəqillik dövründə bu sahədə də böyük uğurlara imza atdığını, qaçqın və məcburi köçkünlərin problemlərinin həlli istiqamətində bundan sonra da müvafiq tədbirlərin həyata keçiriləcəyini vurğulamışdır.

Qeyd edək ki, bu gün Azərbaycanda ötən müddət ərzində qaçqın və məcburi köçkünlərin istər sosial müdafiəsini, statusunu, istərsə də bütün hüquqlarını müdafiə edən və beynəlxalq hüququn norma və prinsiplərinə uyğun olan kifayət qədər qanunvericilik bazası yaradılıb. Belə ki, indiyədək imzalanmış çoxsaylı fərman və sərəncamlar, qəbul edilmiş qanunlar, problemin kompleks həllini əhatə edən dövlət proqramları və əlavələr, bunlara uyğun olaraq həyata keçirilən tədbirlər və digər genişmiqyaslı işlər deyilənləri təsdiq etməklə yanaşı, nüfuzlu beynəlxalq qurumların da böyük marağına səbəb olmuş, görülən bu işlər həmin qurumların ölkəmizdə səfərdə olmuş rəhbərləri tərəfindən də başqa ölkələr üçün nümunə kimi dəyərləndirilmiş, dünyanın da bu faktı etiraf etməsinin vacibliyi önə çəkilmişdir.

Məcburi köçkünlüyün özünü haqlı olaraq insan hüquqlarının pozulması kimi dəyərləndirən BMT Baş katibinin məcburi köçkünlərin insan hüquqları üzrə nümayəndəsi Valter Kalin ölkəmizə səfəri zamanı görülən işlərlə tanışlıqdan sonra Azərbaycan hökumətinin məcburi köçkünlərin həyat şəraitinin yaxşılaşdırılması üçün davamlı və əhatəli tədbirlər gördüyünü xüsusi vurğulayaraq demişdir: "Mən bu sahədə Azərbaycan hökumətinin fəaliyyətini yüksək qiymətləndirirəm. Çünki Azərbaycandakı məcburi köçkünlər digər ölkələrdəki qaçqın və məcburi köçkünlərlə müqayisədə ən yüksək səviyyədə bütün sosial-iqtisadi layihələrlə əhatə olunublar".

BMT-nin qaçqınlar üzrə ali komissarı Antonio Quterreş isə istər ötən il ölkəmizə ikinci səfərinin yekunlarına həsr olunmuş mətbuat konfransında, istərsə də bu günlərdə BMT-nin Qaçqınlar üzrə Ali Komissarlığının İcraiyyə Komitəsinin Cenevrədə keçirilmiş və həmin komitənin tamhüquqlu üzvü kimi Azərbaycanın nümayəndə heyətinin də ilk dəfə iştirak etdiyi 63-cü sessiyasında ölkəmizdə bu sahədə görülən işləri yüksək dəyərləndirərək fikirlərini belə ümumiləşdirmişdir: "Azərbaycan hökumətinin qaçqın və məcburi köçkünlərin həyat şəraitinin yaxşılaşdırılması və onların hüquqlarının təmin edilməsi sahəsində atdığı addımlar oxşar problemlə üzləşən ölkələr üçün bir nümunədir".

Lakin bütün bunlar o demək deyil ki, artıq Azərbaycanda bu problem həll olunub. Ölkəmizdə hələ də müxtəlif məskunlaşma obyektlərində ağır şəraitdə yaşayan yüz minlərlə soydaşımız var və təbii ki, qaçqın və məcburi köçkünlərin bütün problemlərinin həlli, onların həyat şəraitinin tam yaxşılaşdırılması bilavasitə Ermənistan-Azərbaycan, Dağlıq Qarabağ münaqişəsinin beynəlxalq hüquq normaları əsasında həllindən asılıdır. Bu baxımdan qaçqın və məcburi köçkünlərin hüquqlarının bərpa olunması, onların doğma ocaqlarına qaytarılması istiqamətində hələ çox iş görülməlidir ki, Azərbaycan dövləti də bu baxımdan fəaliyyətini beynəlxalq hüquq normalarına uyğun qurmaqla problemin həllini gündəlik diqqət mərkəzində saxlayır və bütün bunların nəticəsidir ki, bu gün ölkədəki qaçqın və məcburi köçkünlər dövlətin tam himayəsi ilə təmin olunmuşlar.

Yuxarıda da qeyd etdiyimiz kimi, onların mənzil-məişət şəraitlərinin yaxşılaşdırılması istiqamətində indiyədək həyata keçirilən genişmiqyaslı tədbirlərə baxmayaraq, hələ də çoxsaylı məcburi köçkün digər şəxslərə məxsus mənzillərdə müvəqqəti məskunlaşıb ki, onların da münaqişə həll olunanadək mənzil-məişət şəraitlərinin yaxşılaşdırılması istiqamətində tədbirlər həyata keçirilir. Lakin bütün bunlara baxmayaraq, son vaxtlar xüsusilə başqalarına məxsus mənzillərdə müvəqqəti məskunlaşmış məcburi köçkünlərin həmin mənzillərdən köçürülməsinə dair məhkəmələrə, həmçinin İnsan Hüquqları üzrə Avropa Məhkəməsinə müraciətlər edilməkdədir və indiyədək 32 məcburi köçkün ailəsi məhkəmələrin müvafiq qərarları ilə başqalarına məxsus mənzillərdən çıxarılaraq yeni yaşayış sahələri ilə təmin olunub. Bəs bu sahədə indi vəziyyət necədir, qaçqın və məcburi köçkünlərin bütün problemləri, xüsusən onların hüquqlarının qorunması ilə birbaşa məşğul olan Dövlətqaçqınkom tərəfindən nə kimi tədbirlər həyata keçirilmişdir?

Dövlətqaçqınkomun baş məsləhətçisi - hüquqşünası Vüqar QARAYEVlə söhbətimiz də bu və buna bənzər digər məsələlərə aydınlıq gətirmək məqsədi daşıyır.

- Vüqar müəllim, bəllidir ki, son vaxtlar başqalarına məxsus mənzillərdə müvəqqəti məskunlaşmış məcburi köçkünlərin mənzillərdən köçürülməsinə dair məhkəmə proseslərinin sayı artmaqdadır. Təbii ki, Azərbaycan ərazisinin 20 faizinin işğal olunması nəticəsində evlərindən didərgin düşmüş məcburi köçkünlərin yaşayış problemlərinin başqa mülkiyyətçilərin hesabına həll edilməsi də təqdirəlayiq hal deyil. Amma onlar məcburiyyət qarşısında qalıb bu mənzillərdə məskunlaşıblar. Belə olan halda hazırda məcburi köçkünlərin bu baxımdan hüquqlarının qorunması və onların yeni yaşayış sahəsi ilə təmin olunanadək bu cür mənzillərdən çıxarılmasının qarşısının alınması istiqamətində nə kimi işlər görülür?

- Əvvəlcə qeyd edim ki, qaçqın və məcburi köçkünlərin hüquqlarının və qanuni maraqlarının müdafiəsinə, pozulmuş hüquq və vəzifələrinin bərpasına qanunvericiliklə müəyyən olunmuş qaydada yardım etmək Dövlətqaçqınkomun əsas fəaliyyət sahələrindən biridir. Komitə yarandığı dövrdən, xüsusilə son illərdən başlayaraq bu sahədə tərəfimizdən qanunvericiliyə uyğun olaraq zəruri tədbirlər və hüquqi hərəkətlər həyata keçirilmiş, fəaliyyətimiz zamanı qanunvericiliyin tələbləri rəhbər tutulmuşdur.

Məlumdur ki, Azərbaycan Respublikası Prezidentinin 2004-cü il 1 iyul tarixli 298 nömrəli sərəncamının 2-ci bəndinə əsasən aidiyyəti dövlət orqanlarına tapşırılmışdır ki, məcburi köçkünlər öz doğma yurdlarına qayıdana və yaxud müvəqqəti yaşamaq məqsədilə tikilmiş yeni qəsəbələrə və evlərə köçürülənədək mülkiyyət formasından asılı olmayaraq 1992-1998-ci illərdə müvəqqəti məskunlaşdıqları ictimai binalardan, mənzillərdən, torpaq sahələrindən və digər obyektlərdən çıxarılması hallarına yol verməsinlər. Ölkə başçısının qeyd olunan tapşırığının icrası ilə bağlı son beş ildə başqa şəxslərin xüsusi mülkiyyətində olan mənzillərdə və digər yaşayış sahələrində müvəqqəti məskunlaşmış məcburi köçkünlərin hüquqlarının qorunması məqsədilə həmin şəxslər tərəfindən komitəyə daxil olmuş 2962 müraciətə baxılmış və kömək göstərilməsi məqsədilə aidiyyəti orqanlara göndərilmişdir.

Komitənin və məcburi köçkünlərin hüquq və mənafeyinin təmin edilməsi ilə bağlı komitənin nümayəndələri müxtəlif məhkəmələrdə bu məqsədlə aparılmış 759 prosesdə iştirak etmişlər ki, həmin proseslərdən 546-sı başqa şəxslərə məxsus mənzillərdə müvəqqəti məskunlaşmış məcburi köçkünlərin çıxarılması ilə bağlı olmuşdur. Keçirilmiş məhkəmə proseslərində nümayəndəmiz tərəfindən məcburi köçkünlərin hüquqlarının qorunması məqsədilə bu sahədə mövcud olan qanunvericiliyin tələbləri məhkəmələrin diqqətinə çatdırılmış və mövcud qanunvericiliyə əsasən məcburi köçkünlərin başqa yaşayış sahəsi verilmədən çıxarılmasının yolverilməz olduğu qeyd edilib və əksər hallarda bu məsələdə məhkəmə orqanları ilə ümumi razılığa gəlinib.

Eyni zamanda İnsan Hüquqları üzrə Avropa Məhkəməsinin "Akimova Azərbaycana qarşı" işi üzrə 27 sentyabr 2007-ci il tarixli qərarına qədər məhkəmələr tərəfindən ölkə Prezidentinin 2004-cü il 1 iyul tarixli 298 nömrəli sərəncamının 2-ci bəndi rəhbər tutularaq məcburi köçkünlərin müvəqqəti məskunlaşdıqları yerlərdən çıxarılmasına möhlət verilməsi barədə qərarlar qəbul edilmişdir. Avropa Məhkəməsinin bu qərarından sonra qəbul edilmiş məhkəmə qətnamələrinin, demək olar ki, 90 faizində onların çıxarılması qərara alınmışdır.

- Belədirsə, onda gəlin məsələyə başqa prizmadan yanaşaq: əgər evləri məcburi köçkünlər tərəfindən zəbt olunmuş bütün mülkiyyətçilər Avropa Məhkəməsinə müraciət etsələr, onda nə baş verər və problemdən çıxış yolu nədir?

- Mən bir məsələni diqqətə çatdırım ki, müharibə şəraitində yaşayan ölkəmiz üçün bu, ümumi problemdir. Məcburi köçkünlər də bu ölkənin vətəndaşıdır, mənzilləri müvəqqəti olsa da zəbt edilənlər də. Və ən başlıcası, burada hər iki tərəfin mülkiyyət hüququ pozulub. Ermənistanın hərbi təcavüzü məcburi köçkünləri şəxsi mülkiyyətindən məhrum edib, insanlar illərlə qurub-yaratdıqları ev-eşiklərindən didərgin salınıb, mənzilləri onlar tərəfindən, belə deyək, qeyri-qanuni zəbt olunan vətəndaşlar da illərlə səbirsizliklə gözlədikləri mənzillərində yaşamaq hüququndan məhrum olublar və təbii ki, onların hər birinin mənzillə təmin olunmaq, öz mənzillərində rahat yaşamaq hüququ var. Bunlar etiraf olunmalıdır və yuxarıda da qeyd etdiyim kimi, müharibə şəraitində yaşayan bir ölkədə belə problemin qısa zaman kəsiyində həlli qeyri-mümkündür. Ancaq burada təəssüf doğuran hal odur ki, vaxtilə məcburi köçkün soydaşlarımıza ürək yanğısı ilə yanaşan, onların dərdinə şərik olan vətəndaşlarımız indi onlardan Avropa Məhkəməsinə müraciət edirlər. Avropa Məhkəməsi isə oxşar hallarda adətən Azərbaycandakı reallığın, məcburi köçkünlərin düşdükləri ağır vəziyyətin mahiyyətinə varmadan əsas mülkiyyətçinin tərəfindən çıxış edir və zəbt olunmuş mənzilin sahibinə qaytarılması ilə bağlı qərar çıxarır. Halbuki məcburi köçkünün köçürülməsi üçün yaşayış yeri olmalıdır, onun üçün şərait yaradılmalıdır, sonra köçürülmə həyata keçirilməlidir. Artıq bu işlərə başlanılmışdır. Belə ki, məcburi köçkünlər tərəfindən zəbt olunmuş evlərlə bağlı məsələ dövlət proqramına cənab Prezidentin 21 fevral 2011-ci il tarixli sərəncamı ilə təsdiq olunmuş Əlavələrdə də nəzərdə tutulub və qeyd edək ki, bu cür mənzillərin sayı çoxdur. Ona görə də şəxsi mənzillərdə məskunlaşanlar da mərhələli şəkildə köçürüləcəklər.

Bütün bunları nəzərə alan Azərbaycan hökuməti Avropa Məhkəməsinə başqalarına məxsus mənzillərdə məskunlaşan məcburi köçkünlərlə bağlı məsələlərə baxmamaq üçün müraciət edib. Baş nazirin müavini - Dövlətqaçqınkomun sədri Əli Həsənov bununla bağlı mətbuata açıqlamasında da bildirmişdir ki, Azərbaycan Avropa Məhkəməsi tərəfindən indiyədək bununla bağlı qəbul olunan qərarların hamısını icra edib. Hökumət özü problemi yoluna qoymaqda maraqlıdır və artıq bu prosesi həyata keçirir. Hesab edirik ki, İnsan Hüquqları üzrə Avropa Məhkəməsi ayrı-ayrı şəxslərə məxsus mənzillərdə müvəqqəti məskunlaşmış məcburi köçkünlərin həmin yaşayış sahəsindən köçürülməsi barədə işlərə baxarkən mənzillərin sahiblərinin mülkiyyət hüququ ilə məcburi köçkünlərin yaşayış yerinə malik olmaq hüququ arasındakı tarazlığın qorunması məsələsinə də xüsusi diqqət yetirməlidir. Yəni bir tərəfin hüququnu bərpa edirsə, digər tərəfi də nəzərə almalıdır.

BMT Baş katibinin məcburi köçkünlərin insan hüquqları üzrə nümayəndəsi cənab Valter Kalinin 19-24 may 2010-cu ildə Azərbaycan Respublikasına səfərinə dair hazırlanmış hesabatında da qeyd edildiyi kimi, "İnsan Hüquqları üzrə Avropa Məhkəməsi tərəfindən ayrı-ayrı şəxslərə məxsus mənzillərdə müvəqqəti məskunlaşmış məcburi köçkünlərin həmin yaşayış sahəsindən köçürülmələri barədə qəbul edilmiş qərarların icrası olaraq məcburi köçkün ailələrinin mənzillərdən çıxarılmaları beynəlxalq insan haqları hüququna əsasən qadağan edilmir. Məcburi köçkünlərin könüllü olaraq mənzili tərk etməkdən imtina etdiyi və mülkiyyət sahiblərinin mülkiyyəti yenidən əldə etməkdə təkid etdiyi bir sıra hallarda çıxarılma qaçılmaz ola bilər. Bununla belə, çıxarılma beynəlxalq standartlara tam uyğun şəkildə həyata keçirilməli, xüsusilə çıxarılan şəxslərə yaşayış yeri, yaşayış vasitələri, səhiyyə və təhsil kimi əsas xidmətlərə çıxış təmin edən real alternativlər təklif edilmədən həyata keçirilməməlidir".

- Ümumiyyətlə götürdükdə, bu sahədəki problemlərin həlli ilə bağlı məhkəmələrdə qaldırılmış iddiaların, qəbul edilmiş qətnamələrin icra vəziyyəti nə yerdədir və bunlarla bağlı Dövlətqaçqınkom tərəfindən nə kimi tədbirlər həyata keçirilmişdir?

- İlk növbədə onu diqqətə çatdırım ki, başqa şəxslərin mülkiyyətində olan mənzillərdə müvəqqəti məskunlaşmış məcburi köçkünlərin çıxarılması ilə bağlı 447 məhkəmə qətnaməsindən 153-ü son beş ildə qəbul edilmişdir. Eyni zamanda, məhkəmələr tərəfindən fiziki və hüquqi şəxslərin xüsusi mülkiyyətində olan qeyri-yaşayış və torpaq sahələrində müvəqqəti məskunlaşmış məcburi köçkünlərin çıxarılması ilə bağlı 50-dən artıq qətnamə qəbul edilmişdir.

Yeri gəlmişkən qeyd edək ki, digər şəxslərin xüsusi mülkiyyətində olan yaşayış və qeyri-yaşayış sahələrində müvəqqəti məskunlaşmış məcburi köçkünlər məskunlaşdığı zaman həmin yaşayış və qeyri-yaşayış sahələri müxtəlif dövlət təşkilatlarının balansında olmuş, lakin sonradan müxtəlif vasitələrlə həmin əmlakları özəlləşdirənlər mülkiyyət hüququ əldə etmiş və çıxarılma ilə bağlı məhkəmələrdə iddialar qaldırmışlar.

Başqalarına məxsus mənzillərdə müvəqqəti məskunlaşmış məcburi köçkün ailələrinin böyük əksəriyyəti Bakı və Sumqayıt şəhərlərində yaşadıqları üçün çıxarılma ilə bağlı qətnamələrin 441-i Bakı və Sumqayıt şəhər məhkəmələri tərəfindən qəbul edilmişdir. Məhkəmələr tərəfindən çıxarılma ilə bağlı qətnamələrin qəbul edilməsinə baxmayaraq, Ədliyyə Nazirliyi ilə ümumi razılığa əsasən həmin qətnamələrin 99 faizinin icrası dayandırılmışdır.

İnsan Hüquqları üzrə Avropa Məhkəməsi tərəfindən başqa şəxslərə məxsus mənzillərdə müvəqqəti məskunlaşmış məcburi köçkünlərin çıxarılması ilə bağlı qəbul edilmiş məhkəmə qərarlarının icrası ilə əlaqədar, yuxarıda da qeyd etdiyimiz kimi, hökumət tərəfindən 32 məcburi köçkün ailəsi mənzillərdən çıxarılaraq öz daimi yaşayış yerlərinə qayıdanadək dövlət mülkiyyətinə alınmış və yaşayış üçün bütün zəruri tələblərə cavab verən mənzillərə köçürülmüşlər. Hazırda məhkəmənin qərar çıxardığı və icraatda olan 33 işlə əlaqədar tədbirlər davam etdirilir.

Azərbaycan Respublikası Prezidentinin 2011-ci il 21 fevral tarixli sərəncamı ilə təsdiq edilmiş Əlavələrin 1.4-cü bəndi ilə yuxarıda qeyd edilən problemin hüquqi və sosial həlli təmin edilmiş, 2012-2014-cü illərdə Bakı və Sumqayıt şəhərlərində başqa vətəndaşlara məxsus olan mənzillərdə müvəqqəti məskunlaşmış 1200 məcburi köçkün ailəsi üçün yaşayış evlərinin tikilməsi nəzərdə tutulmuşdur.

- Vüqar müəllim, son vaxtlar bəzi KİV-lərdə məcburi köçkünlər üçün tikilmiş yeni mənzillərin onların mülkiyyətinə verilməsi ilə bağlı söhbətlər də yer almaqdadır. Hətta bəzi "ekspert və hüquq müdafiəçiləri" fərqinə belə varmadan həmin mənzillərin onların mülkiyyətinə verilməsinin "vacibliyini" də dilə gətirirlər. Halbuki onlar unudurlar ki, məcburi köçkün kimi müxtəlif məskunlaşma obyektlərində müvəqqəti qeydiyyatda olan soydaşlarımız yeni mənzillərə köçürülərkən həmin mənzillər xüsusi təyinatlı mənzil fondu olduğundan onların mülkiyyətinə verilə bilməz...

- Qeyd edim ki, bu məsələ həqiqətən də tez-tez gündəmə gətirilir və mən bu barədə müəyyən vaxtlarda mətbuata da açıqlama vermişəm. Bir daha bildirirəm ki, məcburi köçkünlərə verilən yeni mənzillər onlar üçün müvəqqəti məskunlaşma obyektləridir. Cənab Prezidentin özü də yeni qəsəbələrin açılışlarında, məcburi köçkünlər qarşısındakı çıxışlar zamanı dəfələrlə bəyan edib ki, bunlar müvəqqəti məskunlaşmaq üçün onların istifadəsinə verilir. Bundan əlavə, ölkə başçısının sərəncamı ilə təsdiq olunmuş dövlət proqramında da göstərilir ki, bunlar məcburi köçkünlərin müvəqqəti məskunlaşmaları üçün verilən yaşayış sahələridir. Buradan da belə bir nəticə hasil olur ki, əgər həmin mənzillər məcburi köçkünlərin daimi mülkiyyətinə verilsə və onlar burada daimi qeydiyyata götürülsə, o zaman gərək onların üzərindən status da götürülə. Halbuki "Qaçqınların və məcburi köçkünlərin (ölkə daxilində köçürülmüş şəxs) statusu haqqında" Azərbaycan Respublikası Qanununun 14-cü maddəsində də göstərilmişdir ki, məcburi köçkün əvvəl adətən yaşadığı yerə qayıtdıqda və ya həmin regionda müəyyənləşdirilmiş ölçüdə başqa yaşayış yeri ilə əvəzsiz qaydada təmin edildikdə, bu mümkün olmadıqda isə dövlətin xüsusi qərarı ilə müəyyənləşdirilmiş səviyyədə yaşayış yeri ilə təmin edildikdə məcburi köçkün statusunu itirir. Buna görə də bu evlər və salınan qəsəbələr müvəqqəti yaşayış sahələri hesab olunur və Prezidentin sərəncamı ilə bu yaşayış sahələri də Qaçqınların və Məcburi Köçkünlərin işləri üzrə Dövlət Komitəsinin balansına verilir. Elə bu məqsədlə də komitənin nəzdində Mənzil İstismar Departamenti yaradılmışdır.

Təbii ki, bu məsələ mürəkkəb və hüquqi cəhətdən əsaslandırılması çətin olan problemdir. Ancaq bütün bunlara baxmayaraq, məcburi köçkünlər doğma ocaqlarına qayıdanadək onlara verilən mənzil və torpaq sahələri onların xüsusi mülkiyyəti sayıla bilməz. Ötən il Mənzil Məcəlləsinə uyğun olaraq mənzil fondları yaradıldı. Məcburi köçkünlərin yaşayış sahəsi də Xüsusi təyinatlı mənzil fonduna aiddir. Mənzil Məcəlləsində göstərilir ki, Xüsusi təyinatlı mənzil fondu heç vaxt özəlləşdirilə bilməz. Ona görə də bu gün məcəlləyə uyğun olaraq məcburi köçkünlərin yaşadığı sahələr Xüsusi təyinatlı mənzil fonduna daxildir. Hətta bununla bağlı Nazirlər Kabinetinin 2010-cu il 29 aprel tarixli 80 nömrəli qərarı ilə təsdiq edilən Xüsusi təyinatlı yaşayış sahələrinin kirayə müqaviləsi də mövcuddur. Həmin qərara əsasən, Xüsusi təyinatlı yaşayış sahələrində yaşayış qaydaları da müəyyən olunur. Həmin qanuna əsasən mənzil verilən şəxs 3 və 6 ay ərzində ona verilən mənzildə yaşamırsa, onun əlindən alınır.

Sonda bir daha qeyd edim ki, indiki şəraitdə məcburi köçkünlərin dövlət tərəfindən yerləşdirilmiş mənzillərdə mülkiyyət hüququnun olmasından söhbət gedə bilməz. Mənzillər dövlətin mülkiyyətindədir və onlar hər hansı vətəndaşın adına özəlləşdirilə bilməz!

Elnur HACALIYEV

Azərbaycan.-2012.- 23 noyabr.- S.5.