Bakıda Azərbaycan-UNESCO əlaqələrinin 20 illiyi təntənəli mərasimlə qeyd edilmişdir

Bünövrəsi ümummilli lider Heydər Əliyev tərəfindən qoyulmuş Azərbaycan-UNESCO əlaqələrinin 20 ili tamam olur.

AzərTAc xəbər verir ki, bu münasibətlə Mədəniyyət və Turizm Nazirliyinin və UNESCO üzrə Azərbaycan Milli Komissiyasının birgə təşkilatçılığı ilə noyabrın 22-də Beynəlxalq Muğam Mərkəzində "Azərbaycan-UNESCO mədəni əməkdaşlıq: 20 il" mövzusunda mərasim keçirilmişdir.

Respublikamızın görkəmli elm və mədəniyyət xadimlərinin, Milli Məclisin deputatlarının, ictimaiyyat mümayəndələrinin iştirak etdikləri mərasim Azərbaycan-UNESCO mədəni əməkdaşlığına həsr olunmuş filmin təqdimatı ilə başlamışdır.

Tədbirdə mədəniyyət və turizm naziri Əbülfəs Qarayev, UNESCO üzrə Azərbaycan Milli Komissiyasının birinci katibi Günay Əfəndiyeva çıxış edərək Azərbaycan ilə BMT-nin mədəniyyət, elm və təhsil təşkilatı olan UNESCO arasında əməkdaşlıq əlaqələrinin tarixindən, eyni zamanda, bu əlaqələrin inkişaf etdirilməsi və möhkəmləndirilməsi istiqamətində ölkəmizdə görülən işlərdən söhbət açmışlar.

Bildirilmişdir ki, Azərbaycan Respublikası müstəqilliyini bərpa etdikdən sonra, 1992-ci il iyulun 3-də UNESCO-ya üzv olmuşdur. BMT-nin bu mötəbər təşkilatı ilə Azərbaycan arasındakı əlaqələrin inkişafında ən uğurlu addım ulu öndər Heydər Əliyev 1993-cü ilin dekabr ayında Fransa Respublikasında rəsmi səfərdə olarkən UNESCO-nun o vaxtkı baş direktoru Federiko Mayo ilə görüşü zamanı atılmışdır. Görüşdə UNESCO-nun Azərbaycan ilə əlaqələrini genişləndirməyin perspektivləri müzakirə olunmuş, Ermənistanın Azərbaycana hərbi təcavüzünün yaratdığı qaçqın, məcburi köçkün problemləri, müharibənin elm, təhsil, mədəniyyət sahəsinə vurduğu ağır zərbə, erməni işğalının törətdiyi çətinliklərin aradan qaldırılması yolları barədə fikir mübadiləsi aparılmışdır. Məhz xalqımızın ümummilli lideri Heydər Əliyevin təşəbbüsü ilə Azərbaycan UNESCO çərçivəsində qəbul edilmiş bir sıra konvensiyalara qoşulmuşdur.

Mərasimdə Prezident İlham Əliyevin də bu mötəbər təşkilatla əlaqələrin inkişaf etdirilməsinə böyük diqqətlə yanaşdığı vurğulanmışdır. Qeyd edilmişdir ki, görülmüş işlər nəticəsində Şirvanşahlar sarayı və Qız qalası da daxil olmaqla, İçərişəhər Dövlət Tarix-Memarlıq Qoruğu, Qobustan Qayaüstü Tarixi-Bədii Landşaft Kompleksi UNESCO-nun Dünya irsi siyahısına daxil edilmiş, Azərbaycan muğamı UNESCO-nun Bəşəriyyətin şifahi və qeyri-maddi mədəni irsinin şah əsərləri siyahısına, eləcə də Azərbaycan aşıq sənəti və Novruz bayramı UNESCO-nun Bəşəriyyətin qeyri-maddi irsi siyahısına daxil edilmişdir.

Azərbaycanın mədəni dəyərlərinin qorunması sahəsində Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın xidmətləri xüsusi qeyd edilmişdir. Vurğulanmışdır ki, Mehriban xanım Əliyevanın əvəzsiz xidmətləri sayəsində Azərbaycan-UNESCO əlaqələri yeni mərhələyə qədəm qoymuşdur.

Çıxışlarda Ermənistan-Azərbaycan, Dağlıq Qarabağ münaqişəsinə də toxunulmuş, Ermənistan tərəfindən işğal olunmuş ərazilərdə ölkəmizə məxsus mədəni dəyərlərin, muzey eksponatlarının, qədim əlyazmaların məhv edilməsi haqqında iştirakçılara ətraflı məlumat verilmişdir.

Tədbirdə UNESCO-nun milli komissiyalar və vətəndaş cəmiyyəti şöbəsinin direktoru Genc Seiti, qurumun Moskva ofisinin nümayəndəsi xanım Alla Ampar, UNESCO-nun Mərkəzi Asiya Beynəlxalq Tədqiqatlar İnstitutunun direktoru Şahin Mustafayev çıxış edərək bu beynəlxalq təşkilatla əməkdaşlıqda Azərbaycanın əhəmiyyətli tərəfdaş olduğunu, eləcə də Azərbaycan dövlətinin maddi irsin qorunmasına xüsusi önəm verdiyini bildirmişlər.

Sonra Azərbaycanın incəsənət ustaları konsert proqramı ilə çıxış etmişlər.

Mərasim çərçivəsində həmçinin Beynəlxalq Muğam Mərkəzinin foyesində Azərbaycanın qədim musiqi alətlərini və milli geyimlərini əks etdirən sərgi də təşkil olunmuşdur.

Azərbaycan.-2012.- 23 noyabr.- S.6.