Azərbaycan və Rusiya qanunvericilik orqanları arasında yüksək səviyyəli əməkdaşlıq əlaqələri qurulmuşdur

Noyabrın 23-də Milli Məclisin Sədr müavini, Yeni Azərbaycan Partiyasının (YAP) İdarə Heyətinin üzvü Bahar Muradova Asiya Siyasi Partiyaları Beynəlxalq Konfransının Bakıda keçirilən VII Baş Assambleyasında iştirak etmək üçün ölkəmizdə səfərdə olan Rusiya Federasiyasının Dövlət Dumasının deputatı, Perm vilayətinin Federasiya Şurasındakı təmsilçisi və hakim "Yedinaya Rossiya" Partiyasının idarə heyətinin üzvü Andrey Klimovla görüşmüşdür.

AzərTAc xəbər verir ki, Bahar Muradova Rusiya ilə Azərbaycanın münasibətlərinə toxunaraq demişdir ki, vaxtilə hər iki xalq bir ölkədə yaşamışdır. Lakin zaman dəyişmiş, Azərbaycan və rus xalqları hazırda müstəqil dövlətlərdə yaşayırlar. Müstəqillik bərpa etdikdən sonra dövlətlərimiz arasında iqtisadi, siyasi, humanitar və diplomatik sahələrdə yaxşı münasibətlər qurulmuşdur. Bu münasibətlərin inkişafı üçün geniş zəmin də yaradılmışdır. Asiya siyasi partiyaları beynəlxalq konfransının Bakıda keçirilən VII Baş Assambleyasının əhəmiyyətini vurğulayan Milli Məclisin vitse-spikeri bildirmişdir ki, hazırkı dünyamızın bir çox regionlarında münaqişələr və problemlər mövcuddur. Bu problemlərin həll olunması üçün siyasi partiyaların görüşərək onların həlli yollarını axtarması vacib məsələlərdəndir. YAP dünyada münaqişələrin həll olunmasına diqqətlə yanaşır.

B.Muradova qeyd etmişdir ki, hakim "Yedinaya Rossiya" və Yeni Azərbaycan partiyaları seçkilər zamanı parlamentdə yerlərin çoxunu qazanması parlamentlərarası əməkdaşlığın inkişafını şərtləndirmişdir.

Səmimi görüş üçün minnətdarlığını bildirən Andrey Klimov demişdir ki, qarşılıqlı səfərlər nəticəsində Azərbaycan və Rusiya qanunvericilik orqanları arasında yüksək səviyyəli əməkdaşlıq əlaqələri qurulmuşdur. Rusiya Dövlət Dumasının və Azərbaycanın Milli Məclisinin üzvləri beynəlxalq təşkilatlar çərçivəsində də sıx əməkdaşlıq edərək qlobal problemlərə aid məsələlərin müzakirəsində vahid mövqedən çıxış edirlər. A.Klimov Azərbaycanda rus dilinə olan yüksək səviyyəli münasibətdən məmnun olduğunu ifadə etmişdir.

Dekabr ayının ikinci ongünlüyündə YAP ilə "Yedinaya Rossiya" Partiyasının nümayəndələrinin Sankt-Peterburqda görüşünü keçirmək təklifi ilə çıxış edən qonaq bu təklifin məmnuniyyətlə qarşılanacağına ümidvar olduğunu bildirmişdir.

Görüşdə qarşılıqlı maraq doğuran bir sıra məsələlər barəsində fikir mübadiləsi aparılmışdır.

Azərbaycan.-2012.- 24 noyabr.- S.3.