Bakıda «Biznes inzibatçılığı və korporativ sosial məsuliyyət» mövzusunda I Beynəlxalq elmi konfrans işə başlamışdır

Noyabrın 23-də Azərbaycan Dövlət İqtisad Universitetində (ADİU) "Biznes inzibatçılığı və korporativ sosial məsuliyyət" mövzusunda I Beynəlxalq elmi konfrans işə başlamışdır.

AzərTAc xəbər verir ki, əvvəlcə konfrans iştirakçıları Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə əklil qoymuşlar.

Dünyanın 30-a yaxın ölkəsindən 150 alimin, universitet rektoru, professor, tədqiqatçı və müəllimin iştirak etdiyi beynəlxalq konfransın tərəfdaşları Sakarya və Qazi universitetləri (Türkiyə), Sankt-Peterburq Maliyyə İqtisad Universiteti (Rusiya), İvan Cavaxişvili adına Tbilisi Dövlət Universiteti (Gürcüstan), Turan Universiteti (Qazaxıstan), Minnesota və Hyuston universitetləri (ABŞ), Leeds Metropolitan Universiteti (Böyük Britaniya), Ottava Universiteti (Kanada), Bremen Universiteti (Almaniya), Corvinus Universiteti (Macarıstan), San-Paulo Universiteti (Braziliya) və başqalarıdır.

Universitetin Biznes inzibatçılığı kafedrasının təşkilatçılığı ilə keçirilən tədbirdə ADİU-nun rektoru, Milli Məclisin Elm və təhsil komitəsinin sədri, professor Şəmsəddin Hacıyev bildirmişdir ki, bu konfrans Azərbaycanda, eləcə də Qafqaz regionunda ilk dəfədir ki, keçirilir. Konfransın məqsədi dünyada biznes inzibatçılığı və korporativ sosial məsuliyyət sahəsində tədqiqat aparan alim və mütəxəssisləri, həmçinin iqtisadçı ekspertləri bir araya gətirərək bu sahələrdəki yenilikləri müzakirə etmək, təkmilləşdirmək üçün metodoloji dəstək təmin etmək və bu mövzuda müasir problemlərin həlli yolları istiqamətində tövsiyələr verməkdir. Konfransın əsas mövzusu da qloballaşan dünyada biznes inzibatçılığı və korporativ sosial məsuliyyət sahəsindəki yeniliklər və müasir problemlərdir.

Dosent Xankişi Xankişiyev demişdir ki, ADİU-da 1992-ci ildə "Biznes inzibatçılığı" fakültəsi yaradılmışdır. Fakültə zəngin maddi-texniki, elmi bazası ilə dünyada, xüsusilə də Azərbaycanda biznes inzibatçılığı elminin inkişafı və biznes strukturları üçün kadrların hazırlanması istiqamətində müasir standartlara cavab verir.

Digər çıxış edənlər də tədbirin əhəmiyyətindən danışmış, konfransın işinə uğurlar arzulamışlar.

Bölmə iclaslarında alim və tədqiqatçıların 130-dək məruzəsi dinləniləcək, müzakirələr aparılacaqdır.

Konfrans işini noyabrın 25-də başa çatdıracaqdır.

Azərbaycan.-2012.- 24 noyabr.- S.5.