Hədəfimiz Azərbaycana Nobel mükafatı gətirəcək gənc alimlər nəsli yetişdirməkdir

"Çağ" Öyrətim fəaliyyətinin 20-ci ildönümünü Azərbaycan təhsilinin keyfiyyət rəmzinə çevrilməklə qeyd edir

"Mən istərdim ki, Azərbaycanda bu təhsil müəssisələrinin sayı çox olsun... Mən türk liseylərinin fəaliyyətlərini çox yüksək qiymətləndirirəm və bunları quran, işlədən insanlara öz minnətdarlığımı bildirmək istəyirəm. Burada təhsil alan gənclərimiz beynəlxalq yarışlarda çox yüksək mükafatlar qazanırlar. Bu, bizi çox sevindirir və onu göstərir ki, həmin liseylər Azərbaycanın gələcəyi üçün gözəl kadrlar yetişdirirlər. Əlbəttə ki, bir Prezident kimi mən bu liseylərin öz fəaliyyətlərini davam etdirmələrini və daha da genişləndirmələrini istərdim".

İlham ƏLİYEV

"Bir millət - iki dövlət"...

Bu ifadənin məna tutumu artıq iqtisadi-siyasi sahədən beynəlxalq siyasətədək, mənəvi yönümdən cəmiyyətin bütün zümrələrini əhatə edən qarşılıqlı təəssübkeşliyədək dövlətin və ictimai həyatın bütöv bir silsiləsini əhatə edir. "Müttəfiqlik", "tərəfdaşlıq" ifadələrinin beynəlxalq məkanda bəzən süni hal aldığı çağımızda bu sözləri tam mahiyyəti ilə, yəqin ki, yalnız Azərbaycan-Türkiyə münasibətlərinə şamil etmək olar. Tarixin ən dərin qatlarından gələrək genetik kodlarımıza hopan türk mənsubiyyəti, əsrlərin sınağından çıxmış təəssübkeşlik və qardaşlıq əlaqələri, ən çətin anlarda təmənnasız yardımçı olmaq niyyəti nəticə etibarilə bu gün bizləri bir millət məramında birləşdirir və dünyaya "Azərbaycanla Türkiyə birdir, yekdildir, heç vəchlə bölünməyəcək tamdır!" qənaətini təqdim edir.

Heydər Əliyevin etimadına yüksək sədaqət

Bu danılmaz həqiqəti təsdiqləyən faktlardan biri də Azərbaycandakı mövcudluğunun artıq 20 ilini geridə qoyan "Çağ" Öyrətim İşlətmələri Şirkətinin uğurlu fəaliyyətidir. Qısa müddət ərzində ölkə təhsilinin keyfiyyət flaqmanına - nailiyyətlər mərkəzinə çevrilməyə müvəffəq olan şirkət hazırda 1 universiteti, 10 liseyi, 1 gimnaziyanı, 1 ibtidai məktəbi, 13 ali təhsilə hazırlıq kursunu özündə birləşdirir. "Mən bu liseylərin fəaliyyətini həmişə müdafiə etmişəm, bu gün də müdafiə edirəm, sabah da müdafiə edəcəyəm, çünki bu liseylər Azərbaycanın təhsil sisteminə bir yenilik gətirir" deyən ümummilli lider Heydər Əliyevin göstərdiyi etimada sədaqətlə xidmət edən "Çağ" Öyrətim Şirkətinin "Qafqaz" Universiteti, Azərbaycan-Türkiyə özəl liseyləri və "Araz" kursları Azərbaycanda ilk beynəlxalq keyfiyyət standartları sertifikatı alan təhsil müəssisələridir. Fəaliyyətinin iyirmi illik yubileyinə hazırlaşan şirkət bu gün Azərbaycan Respublikasının Prezidenti İlham Əliyevin apardığı nəhəng iqtisadi, ictimai, sosial-mədəni inkişaf siyasətinə var gücü ilə xidmət edir.

"Çağ" Öyrətimin təmsilçiləri Azərbaycanı sözdə deyil, əməldə sevən, xidmətlərini bəlağətdə yox, real işdə təsdiqləyən fədakar və təmənnasız insanlardır. Onların Azərbaycana ilk gəlişi Azərbaycanda milli-azadlıq mücadiləsinin getdiyi qanlı-qadalı illərə düşür. Üzləşdiyimiz Qarabağ münaqişəsi, həmçinin erməni təcavüzü və ittifaq rəhbərliyinin təsirləri qarşısında təklənməyimiz, dünyada barəmizdə "vəhşi xalq" obrazının sürətlə yayıldığı bir dönəmdə bu insanlar Azərbaycanın xaricə yayılan haqq səsi oldu. Bütün qüvvələrini səfərbər edərək Azərbaycan davasında bizi tək qoymadılar, gücümüzə qüdrət, iradəmizə qətiyyət qatdılar.

1990-cı ilin qanlı yanvarında Azərbaycan qan içində boğulanda səsimizi dünyaya yayanlar da məhz bu insanlar idi. Onların mənəvi istinadgahları olan böyük maarifpərvər, mütəfəkkir Fətullah Gülən Xocaəfəndi İzmirdə on minlərlə insanın qarşısında uca minbərdən şəhidlərimizə göz yaşı tökdü, haqq savaşımızla bağlı xarici ölkələrə səsləndi, Azərbaycana hərbi müdaxiləni törədənləri ifşa etdi, ən əsas isə, tərəfdarları vasitəsilə bizə hər mənada dəstək oldu. Bu çağırışı bir gün sonra artıq yüz minlərlə insan dinlədi, bir həftə sonra isə milyonlarla insan Xocaəfəndinin Azərbaycan fəryadından xəbərdar oldu, "Azərbaycanda tökülən qan bizim qanımızdır, itirilən canlar bizim canlarımızdır", - deyə hayqırdılar. 20 Yanvar faciəsinin, ümumiyyətlə isə Qarabağ savaşının əsl mahiyyətini beynəlxalq birliyə çatdırmaqda o zaman bu şəxslərin, xüsusən də "Zaman" qəzetinin yazarlarının fəaliyyəti misilsiz oldu.

Onlar töhfələrini yeni, müstəqil, qüdrətli Azərbaycan quruculuğundan da əsirgəmədilər. Müstəqilliyimizi bərpa etdiyimiz dövrdə real təşəbbüslə - yeni təfəkkürlü, elmi-texniki inqilabın nailiyyətlərini mənimsəyəcək gənc nəsli formalaşdırmaq məqsədilə çıxış etdilər. Təkliflərini də məhz Azərbaycanın xilaskarlıq missiyasını yürüdən Heydər Əliyevə Naxçıvanda təqdim etdilər. Qeyd edək ki, bu insanlar həm də blokada vəziyyətində olan, təcavüzkarın birbaşa hədəfinə çevrilən Naxçıvanın haqq səsinin yayılmasında da böyük işlər görürdülər. Azərbaycanın, o cümlədən Naxçıvanın qardaş Türkiyə ilə əlaqələrini artıran "Ümid" körpüsü açıldıqdan sonra ulu öndərin əsas məqsədi məhz iki dövlət arasında təhsil, maarif, mədəniyyət körpüsünün salınması idi. Bu məramla əldə edilən razılaşma əsasında Türkiyədən gələn maarifçilərlə müzakirələr aparıldı. "Biz yeni, demokratik və sərbəst bazar iqtisadiyyatına üz tutmuşuq. Yeni cəmiyyət isə heç vaxt köhnə sovet məktəbi ilə inkişaf edə, möhkəmlənə bilməz. Bizə yeni, quracağımız cəmiyyətə uyğun məktəblər lazımdır. Azərbaycana ən yaxın belə məktəb sistemi Türkiyədədir, ona görə də biz onlardan öyrənməli, öz təhsil sistemimizi qurmalıyıq" - Heydər Əliyevin 1992-ci ildə söylədiyi bu sözlər həm də Azərbaycan övladlarının maariflənməsi işinə yardım göstərmək istəyən bu insanların fəaliyyətinə verilən böyük xeyir-dua idi. Beləliklə, missiya başladı!..

XXI əsri türk əsri edəcək nəsil formalaşır

Ötən 20 il "Çağ" Öyrətim İşlətmələri Şirkəti üçün fəaliyyətin bütün istiqamətləri üzrə uğurlu və şərəfli dövr oldu. Bu gün əldə olunan böyük nailiyyətlər yalnız milli təhsilin tərəqqisini şərtləndirmir, bu, özünü həm də Azərbaycanın sabahına sahib çıxacaq yeni təfəkkürlü, modern düşüncəli, elmi hazırlıqlı, ən əsası isə, əsl vətəndaş olacaq gənc nəslin formalaşmasında əyani göstərir.

Şirkətin İdarə Heyətinin sədri Ənvər Özərən də söhbətimizdə bu məqamları xüsusilə vurğulayır: "Bizlər 4 minillik şanlı tarixə, möhtəşəm mədəniyyətə malik, dünya elminə əvəzsiz töhfələr vermiş, qüdrətli sərkərdələr, alimlər yetişdirmiş bir toplumun varisləriyik. İstər Türkiyədə, istər Azərbaycanda, istər Mərkəzi Asiyada yaşamasından asılı olmayaraq özünü türk sayan hər bir kəs bu misilsiz maddi-mənəvi irsin davamçısı olmalıdır. Əcdadlarımız böyük coğrafiyalara yalnız qollarının gücü ilə deyil, həm də zəkalarının, intellektlərinin qüdrəti ilə də sahiblik ediblər. Bu potensial müasir zamanda da var. Sadəcə, onu üzə çıxarmağa, geniş miqyasa çevirməyə nail olmalıyıq. Ən əsası, dünyaya türk xalqlarının böyük mədəniyyət, zəka, elm daşıyıcısı olaraq bəşəriyyətə daha böyük töhfə vermək iqtidarına malikliyini çatdırmalıyıq. Mərhum Turqut Özal "XXI əsr türk əsri olacaq" deyirdi. Bütün məktəblərimizin əsas qayəsi də bu niyyəti həyata keçirməkdir. Qürur hissi ilə deyirəm ki, bu məramın gerçəkləşməsində Azərbaycanda fəaliyyət göstərən "Çağ" Öyrətim İşlətmələrinin təhsil müəssisələrinin müstəsna xidmətləri var".

Həqiqətən də bu gün "Çağ" Öyrətimin təhsil müəssisələrinin məzunları tək Azərbaycan miqyasında deyil, ümumiyyətlə dünya səviyyəsində müxtəlif elm-təhsil yarışlarında, beynəlxalq olimpiadalarda, nüfuzlu ali məktəblərdə birincilər sırasında tanınır. 10 liseyi əhatə edən Azərbaycan-Türkiyə özəl liseylərində təlim-tərbiyə respublika və dünya standartlarına, milli-mənəvi və ümumbəşəri dəyərlərə uyğun şəkildə həyata keçirilir. Təhsil dili Azərbaycan dili olmaqla təbiət fənləri ingilis dilində tədris edilir. 2012-ci ildə ali məktəblərə qəbul müvəffəqiyyəti 99 faiz təşkil edib, 57 nəfər isə 600 baldan yüksək nəticə göstərib, iki nəfər Prezident təqaüdçüsü olub. "Mən bu liseylərin fəaliyyətlərini genişləndirməsini arzu edirəm" deyən ölkə Prezidenti İlham Əliyevin tövsiyəsi işığında liseylərin fəaliyyətində mühüm yeniliklər baş verir. Bakı ÖTL-də təlim rus dilində olan siniflərin açılması, "Qafqaz" gimnaziyası nəzdində Beynəlxalq Məktəb üçün bazanın qurulması, bütün məktəblərin 250-dən çox "Ağıllı lövhə" - interaktiv yazı lövhəsi ilə təmin edilməsi və dərslərdə fəal tətbiq olunması, elektron məktəb sisteminə keçid və s. bu sahədə atılan addımların bir neçəsidir.

Ənvər Özərən qeyd edir ki, "Biz "Çağ" Öyrətimi ümummilli lider Heydər Əliyevin Azərbaycana, Azərbaycan xalqına əmanəti kimi qəbul edirik və şirkətin elmi-pedaqoji kollektivi də Azərbaycanımızın parlaq gələcəyi naminə özlərinin fədakarlığı ilə bu əmanətə sədaqətlidirlər. Şagirdlərimizin təlim-tərbiyəsi ilə ən təcrübəli, seçilmiş alim və pedaqoqlar məşğul olurlar ki, onların da çoxu azərbaycanlılardır. Məzunlarımızın 99 faizi hər il dünyanın nüfuzlu universitetlərinin seçilmiş fakültələrinə daxil olur. Hazırda şagirdlərimizin böyük bir hissəsi ABŞ-ın Hyuston, Texas və Viskonsin universitetlərində, Rusiyanın M.Lomonosov adına Moskva Dövlət Universitetində, Bauman adına Ali Texniki məktəbində, Almaniya, Türkiyə, İngiltərə, Çin, İsveçrə və başqa dövlətlərin ali məktəblərində təhsillərini müvəffəqiyyətlə davam etdirirlər.

Şagirdlərimiz hər il respublika Təhsil Nazirliyinin komandası tərkibində dünya bilik olimpiadalarında iştirak edir, qızıl, gümüş və bürünc medallarla qayıdır, dünyanın dörd bir tərəfində Azərbaycanın bayrağını ucaldırlar. Unutmayaq ki, təhsil sahəsində uğur əldə etmək müəyyən bir zaman davamlılıq tələb edir. 1992-ci ildən 1994-cü ilə kimi Azərbaycan məktəbliləri beynəlxalq olimpiadalara müşahidəçi qismində qatılmışdı. 1994-cü ildə isə şagirdlərimiz ilk dəfə olaraq Biologiya olimpiadasında 2 qızıl və 2 gümüş medal qazanaraq bütün dünyanın diqqətini öz üzərinə çəkmişdi. Bugünkü dövrdə isə artıq Azərbaycan həmin beynəlxalq olimpiadaların keçirildiyi məkanlardan birinə çevrilmişdir. Bütün bunlar təhsil sahəsində əldə etdiyimiz uğurların nəticəsidir. Beynəlxalq olimpiadalarda şagirdlərimizin qazandığı hər bir uğur həmin ölkələrdəki Azərbaycan diasporlarını daha da gücləndirir, milli nüfuzumuzu artırır. Liseylərimizin şagirdləri ABŞ, İngiltərə, İspaniya, İsveç, İtaliya, Bolqarıstan, Yunanıstan, CAR, İndoneziya, Meksika, Rusiya, Almaniya və digər ölkələrdə 1994-cü ildən bu günə qədər 186 qızıl, 112 gümüş və 286 bürünc olmaqla 584 medal qazanıblar. Respublika fənn olimpiadalarında isə şagirdlərimiz 230 qızıl, 248 gümüş, 245 bürünc, ümumilikdə 723 medal əldə ediblər. Bu 1307 medal, həmçinin ali məktəblərə 99 faizlik qəbul göstəricisi bizim 20 illik fəaliyyətimizin uğurlarının əyani təzahürlərindəndir. Yeni ruhlu insan, müasir təfəkkürlü gənc, çağdaş dünyanın proseslərini anlayan vətəndaş, qloballaşmanın meyarlarını öz mənəvi dəyərləri ilə çuğlaşdıran azərbaycanlı - əsas məqsəd belə bir nəsil formalaşdırmaqdır".

Elm naminə Azərbaycan üçün dünya ilə yarışırıq

"Çağ" Öyrətimin təhsil müəssisələri arasında "Araz" kursları da xüsusi yer tutur. Hazırda respublikanın 10 şəhər və rayon mərkəzində 13 şöbə ilə fəaliyyətini davam etdirən kurslar artıq 20 ildir ki, ali məktəblərə hazırlaşan abituriyentlərin orta məktəbdə əldə etdikləri bilik və bacarıqlarını xüsusi hazırlıqla yenidən möhkəmləndirərək artmasında əvəzsiz yerə sahibdir. Ənvər Özərən bildirir ki, "kursların pedaqoqları gənc, savadlı və təcrübəli müəllimlərdir. Bu təhsil müəssisəsində çalışan kadrlar öz ixtisaslarını yüksək səviyyədə bilən mütəxəssislər arasından seçilir. Ali məktəblərə qəbul imtahanına yüksək səviyyədə hazırlaşmağı hədəfləyən əksər IX, X və XI sinif şagirdləri və orta məktəb məzunlarının seçiminin "Araz" kursları olması buradakı təhsilin yüksək keyfiyyətindən xəbər verir. 20 il ərzində "Araz" kurslarının məzunlarından 145-i Prezident təqaüdünə layiq görülmüş, ümumilikdə 1427 nəfər isə 600 baldan yüksək nəticə göstərmişdir. Bununla yanaşı, kursun məzunlarından 9 nəfəri maksimal nəticə göstərərək 700 bal toplamışdır".

Bir məqamı da vurğulayaq ki, bu il respublikamızda ümumi olaraq 102 nəfər Prezident təqaüdünə layiq görülüb ki, onların da 32 nəfəri, yəni üçdə biri "Araz" kurslarında hazırlıq keçib tələbə adını qazanmış abituriyentlərdir. Ümumiyyətlə, kurs şagirdlərinin 90 faizdən çoxu universitetlərə qəbul imtahanlarında müvəffəqiyyət əldə edirlər. Cari ildə test imtahanlarında II qrup üzrə respublika birincisi və üçüncüsü, I qrup üzrə respublika ikincisi və iki nəfər üçüncüsü, IV qrup üzrə respublika ikincisi və üçüncüsü, III qrup üzrə iki respublika üçüncüsü də məhz bu kursların yetirmələri olmuşlar.

1993-cü ildə fəaliyyətə başlayan "Qafqaz" universiteti Türkiyə və Azərbaycanın elmi-texniki və pedaqoji potensialını birləşdirərək yüksək səviyyədə ixtisas, xarici dil və kompyuter biliklərinə yiyələnmiş mütəxəssislər hazırlamağı ən başlıca məqsədi hesab edir. Amerika və Avropada geniş istifadə olunan kredit sisteminin tətbiq edildiyi universitetdə tədris prosesi Azərbaycan, türk və ingilis dillərində aparılır. Bir neçə ildir ardıcıl olaraq özəl universitetlər arasında ən yüksək reytinq qazanan "Qafqaz"da 4 fakültə üzrə 25 ixtisasda kadr hazırlanır. Universitetdə beş ixtisas üzrə magistratura pilləsi və dil mərkəzi fəaliyyət göstərir. Ali məktəbdə dünyanın ən müxtəlif təhsil ocaqları ilə sıx əlaqələr qurulub, burada vaxtaşırı olaraq beynəlxalq konfrans və simpoziumlar təşkil edilir. "Qafqaz"ın müəllim və tələbələri xarici ölkələrin elm-təhsil ocaqlarına təcrübə mübadiləsinə və təhsillərini davam etdirməyə göndərilirlər. Universitet şəhərciyində iki korpusda oğlan və qızlar üçün yataqxana binası fəaliyyət göstərir. Bu il "Qafqaz" universitetinə daxil olanlar sırasında 20 nəfər tələbə Prezident təqaüdünə layiq görülüb, onların ikisi isə test imtahanlarında ən yüksək göstərici - 700 bal toplayıblar. Dünyanın dörd bir tərəfindən tələbə qəbul edən "Qafqaz" universiteti dünyanın dörd bir tərəfinə də məzun verir.

"Çağ" Öyrətim İşlətmələri Şirkətinin İdarə Heyətinin sədri Ənvər Özərənin fikrincə, əgər təhsil sahəsində fəaliyyət göstərirsinizsə, dünyada elm və təhsillə bağlı baş verən prosesləri izləmək məcburiyyətindəsiniz: "Xüsusilə universitet səviyyəsində dünyada baş verən proseslər daim diqqət mərkəzində olmalıdır. "Qafqaz" universiteti sürətlə inkişaf edən təhsil ocağı olduğu üçün dünyadakı bütün təhsil yeniliklərini öyrənir və tətbiq edir. Dünyanın bir sıra ölkələrinin universitetləri ilə əməkdaşlıq edilir, konfranslar təşkil olunur, mühüm proqramlar üzərində birgə çalışılır. Hazırda ABŞ-da, Almaniyada, Rusiyada, Cənubi Koreyada, Türkiyədə və s. ölkələrdə olan universitetlərlə əməkdaşlıq proqramı çərçivəsində layihələr həyata keçirilməkdədir. Bununla yanaşı, tələbələrin elmi sahədə qabiliyyətlərini araşdırmaq məqsədilə onlar dünyanın ən qabaqcıl universitetlərinə göndərilərək oradakı şəraitlə tanış olması üçün geniş imkanlar yaradılır. Həmçinin hər hansı bir xarici dildə ünsiyyət qurmaqda çətinlik çəkənlər üçün xüsusi proqram çərçivəsində müxtəlif ölkələrdə həmin dili mükəmməl şəkildə öyrənmələri təmin edilir.

Türkiyədəki Mərmərə Universiteti, Ərzurum Atatürk Universiteti, Hacəttəpə Universiteti kimi nüfuzlu ali təhsil ocaqları ilə birlikdə doktoranturada təhsil alma proqramları həyata keçirilir. Bununla yanaşı, universitetin maddi-texniki bazası da günü-gündən genişləndirilir, dərs avadanlıqları davamlı olaraq yenilənir. Hazırda Azərbaycanda ən müasir neft-kimya laboratoriyası məhz "Qafqaz" universitetindədir. Bununla yanaşı, maşınqayırma sahəsində laboratoriya qurulmaqdadır. Araşdırma mərkəzləri təşkil etməklə tələbələrin daha rahat çalışmaları üçün geniş imkanlar yaradılmışdır.

Sevindirici haldır ki, prezident təqaüdçüləri, 600-dən çox bal toplamış abituriyentlər bizim universiteti seçirlər. Məqsədimiz bundan ibarətdir ki, bu tələbələri yüksək təhsil səviyyəsində formalaşdıraq, mükəmməl şəkildə yetişdirək və nəticədə onlar Azərbaycana gələcəkdə Nobel mükafatını qazandıran alimlər olsunlar, Azərbaycanın səsini elm sahəsində dünyada ucaltsınlar".

Dünya türkcə danışacaq

Ənvər bəy Türkiyə Cümhuriyyətində artıq 10-cu ildir təşkil olunan Beynəlxalq Türk dili Olimpiadasında Azərbaycan təmsilçilərinin uğurlu iştirakından da qürurla danışır. Bu il dünyadan 135 ölkənin iştirak etdiyi olimpiadada Azərbaycan daha güclü səviyyədə təmsil olunurdu. Türk dili Olimpiadasında təmsilçilərimizin əldə etdiyi nailiyyətlər də möhtəşəm idi: 13 qızıl, 9 gümüş, 3 bürünc medal və 3 həvəsləndirici mükafat.

Dünyanın 135 ölkəsindən 1500 finalçının iştirak etdiyi olimpiadanı əslində son 20 ildən artıq bir dövrdə Türkiyədəki vətənpərvər, fədakar insanların qlobal miqyasda həyata keçirdiyi möhtəşəm maarifçilik missiyasının hesabatı kimi də dəyərləndirmək olar. Ənvər Özərən də bu fikrimizi bölüşür və əlavə edir: "Missiyamızı yalnız türk dövlətləri ilə məhdudlaşdırmaq da düzgün deyil. Bu gün dünyanın 140-dan çox ölkəsində fəaliyyət göstəririk və onların hər birində də yerli təhsilin ən nüfuzlu, ən keyfiyyətli məktəblərini yaratmışıq. İndi Çindən Avropaya, Afrikadan Amerikaya qədər - dünyanın bütün bölgələrində yeni yetişən nəslin təhsilini artırmasına əvəzsiz töhfələr veririk. Həmçinin onların əlavə olaraq türk dilini öyrənməsinə, böyük türk millətinin tarixi keçmişinə, mövcud yüksək potensialına sahiblənməsinə şahidlik etmələrinə nail oluruq".

Ənvər Özərən alimdir - biologiya üzrə fəlsəfə doktorudur, böyük türk təəssübkeşidir, cəfakeş ziyalıdır. Həm də tariximizin mükəmməl tədqiqatçılarından olaraq türk ulusunun - osmanlı, azərbaycanlı, qazax, özbək, türkmən, uyğur və onlarca digər soydaş xalqların möhtəşəm keçmişinin bu gün yeni təfəkkür və modern potensialla üzə çıxarılması istiqamətində ardıcıl fəaliyyət göstərir. Əsas hədəf kimi isə yeni nəslin maariflənməsini görür. Ümumiyyətlə isə Ənvər bəyin timsalında "Çağ" Öyrətim təmsilçilərinin hamısı bütün varlıqları ilə maariflənmə, türk övladlarının savadlanması, bəşəriyyətin elmə sahib çıxması amalına bağlı insanlardır. Bəşəriyyətə türk dilini, türk nüfuzunu, türkün şanlı tarixini, çağdaş inkişafını uğurla təbliğ edən və aşılayan, osmanlısından azərbaycanlısınadək, qırğızından uyğuruna qədər bütöv bir türk qövmünü dünyaya tanıdan və sevdirən bu dəyərli insanlar 30 ildən artıqdır ki, planetimizin ən ucqar məntəqələrindən fövqəldövlətlərədək bu şərəfli missiyalarını heç bir təşəkkür və təmənna ummadan fədakarlıqla həyata keçirirlər.

Bir məqamı da vurğulayaq ki, zəmanəmizin böyük mütəfəkkiri, bütün varlığı ilə Azərbaycan sevdalısı olan Fətullah Gülən tərəfindən əsası qoyulan bu maarifçilik şəbəkəsi təmənnasız genişmiqyaslı fəaliyyəti nəticəsində haqlı olaraq Könüllülər Hərəkatı, Xidmət Hərəkatı kimi tanınır. Dünyanın dörd bir yanında açdıqları məktəblərlə insanları cahillikdən xilas edir, onları təhsilə, elmə yönəldir, öz cəmiyyətlərinin savadlı zümrəsinə çevirirlər. Son 20 ildə dünyada 300 mindən artıq insan məhz bu hərəkatın dəstəyi ilə türk dilini öyrənib. Bu müddətdə xaricdə türkcə öyrədən 300 ibtidai sinif məktəbi, 600 orta təhsil məktəbi, 100 universitet, 370 dil və mədəniyyət mərkəzi açılmışdır. Hazırda 140 ölkədə Könüllülər Hərəkatı tərəfindən türkcə tədris müəssisələri fəaliyyət göstərir. Dünyada bu gün 7-12 yaş arasında 80 min, 12-18 yaş arasında 140 min, 18 yaşından yuxarı isə 20 min nəfər türkcə öyrənir.

Ali məqsəd

Ənvər Özərən "Çağ" Öyrətim İşlətmələri Şirkətinin təhsil müəssisələrinin inkişaf perspektivlərindən də qürurla, əminliklə danışır. Bildirir ki, əldə edilən nailiyyətlər nə qədər böyük olsa da, hələ ki yetərli saymırlar. "Təhsil sahəsində yeni hədəfləri - qloballaşan dünyada təhsillə bağlı gedən mütərrəqqi prosesləri qısa müddət ərzində Azərbaycana tətbiq etməliyik. Bunu bizdən ulu öndər Heydər Əliyev tələb edirdi. Bu gün Prezident İlham Əliyevin dünyanın nüfuzlu, inkişaf edən ölkəsinə çevirdiyi Azərbaycanda biz də təhsillə bağlı apardığımız prosesləri məhz möhtərəm dövlət başçısının dinamik, modern fəaliyyət üslubuna uyğunlaşdırmalıyıq. Əminəm ki, Prezident İlham Əliyevin rəhbərliyi altında Azərbaycan təhsili yaxın onillikdə tək Cənubi Qafqazın deyil, bütövlükdə istər Avropanın, istərsə də Asiyanın ən güclü elm-təhsil mərkəzlərindən birinə çevriləcək.

Bir sözlə, Heydər Əliyevin əbədiyaşar xatirəsi önündə, Prezident İlham Əliyevin etimadı qarşısında bizim böyük və şərəfli mənəvi borcumuz var: Azərbaycanda yüksək bilikli, elmi hazırlıqlı, müasir dünyanı anlaya bilən və çağdaş bəşərə töhfə verməyi bacaran, qloballaşan zamanda milli ənənələrinə sahib çıxan yeni təfəkkürlü gənc nəslin formalaşmasına töhfə vermək! Hədəfimiz Azərbaycana Nobel mükafatı gətirəcək gənc alimlər nəsli yetişdirməkdir. İnşallah, Azərbaycanın qüdrətli dövlətinin çətiri altında, Prezident İlham Əliyevin rəhbərliyi ilə bu məqsədimizə də nail olacağıq!"

"Çağ" Öyrətimin təmsilçiləri, böyük ozanımız Aşıq Veysəlin dediyi kimi, uzun, incə bir yoldadırlar...

...Yürüyürlər gündüz-gecə - müqəddəs bir hədəfə, dünyanı maarif işığına, türk zəkasının qüdrətinə qərq edəcək sönməz nura doğru!

Yorulmayasınız!..

İxtiyar HÜSEYNLİ

Azərbaycan.-2012.- 25 noyabr.- S.4.