Səlhab MƏMMƏDOV: İnqa Şmidt bu sərgi ilə tələbələrinə rəssamlıq sənətinin incəliklərini, rəngkarlığın mahiyyətini göstərməyə çalışmışdır

Xanım İnqa Şmidt bu sərgi ilə tələbələrinə rəssamlıq sənətinin incəliklərini, rəngkarlığın mahiyyətini göstərməyə çalışmışdır. "Rəngkarlıq" mövzusunda açılmış sərgi Berlin Rəssamlıq Akademiyasının professoru İnqa Şmidtin Azərbaycan Dövlət Rəssamlıq Akademiyasında keçdiyi ustad dərslərinin davamıdır.

Bu sözləri AzərTAc-a müsahibəsində Azərbaycan Dövlət Rəssamlıq Akademiyasının prorektoru, xalq rəssamı Səlhab Məmmədov söyləmişdir.

S.Məmmədov demişdir ki, almaniyalı rəssam İnqa Şmidtin Azərbaycan Dövlət Rəssamlıq Akademiyasının sərgi salonunda təqdim olunan fərdi sərgisi bu ali məktəbin təşkilatçılığı ilə açılmışdır. Xanım İnqa Şmidt akademiyaya ustad dərsləri keçmək üçün dəvət edilmişdir. O, azərbaycanlı yaradıcı gənclərlə çalışmaqdan zövq alır və tələbələrimiz də onu çox sevirlər. Xanım İ.Şmidt tələbələrimizin yüksək potensiala, zəngin biliklərə malik rəssam kimi yetişmələrini yüksək qiymətləndirir.

Səlhab Məmmədov bildirmişdir ki, İ.Şmidt son dövrdə Azərbaycan mədəniyyəti və incəsənətində baş verən yenilikləri də mütəmadi olaraq izləyir və ölkəmizdə keçirilən müxtəlif mədəniyyət tədbirlərində məmnuniyyətlə iştirak edir. Almaniyalı rəssam Heydər Əliyev Fondunun dəstəyi ilə ölkəmizdə keçirilmiş "Qız qalası" Beynəlxalq incəsənət festivalının iştirakçısı olmuşdur.

Bakını çox sevdiyi üçün xanım rəssamın əsərlərində Azərbaycan, Bakı mövzusu həmişə ön planda dayanmışdır. O, rəsmlərində şəhərimizin füsunkar gözəlliklərini, parklarını, müasir binalarını, meydanlarını təsvir edərək bu sənət əsərlərinin Avropada da nümayiş etdirilməsinə çalışmışdır.

Biz gələcəkdə ölkəmizdə İ.Şmidtin daha bir fərdi sərgisini təşkil etməyi nəzərdə tutmuşuq.

Azərbaycan.-2012.- 25 noyabr.- S.6.