Dağlıq Qarabağ münaqişəsi həll olunmayanadək Pakistan Ermənistanla heç bir əlaqə qurmayacaq

Noyabrın 26-da Milli Məclisin Sədri Oqtay Əsədov Azərbaycana səfərə gəlmiş Pakistan İslam Respublikası Parlamentinin Kəşmir məsələləri üzrə xüsusi komitəsinin rəhbəri, İslam Camiyət Ulema-e-İslam Partiyasının sədri Maulana Fazl-ur-Rahmanın başçılıq etdiyi nümayəndə heyətini qəbul etdi.

Oqtay Əsədov bildirdi ki, Azərbaycan ilə Pakistan arasındakı dostluq münasibətlərinin qədim tarixi kökləri var və bu cür qarşılıqlı səfərlər əlaqələrin hərtərəfli inkişafına təkan verəcək. Qeyd edildi ki, Pakistan-Azərbaycan münasibətləri artıq ümumi tərəfdaşlıq səviyyəsinə yüksəlib və bu işdə hər iki ölkənin dövlət başçılarının xüsusi rolu var: "Dövlətlərimizin başçılarının qarşılıqlı səfərləri zamanı imzalanmış sənədlər, aparılmış danışıqlar əməkdaşlığımızın inkişafı üçün möhkəm hüquqi baza yaradıb. Hökumətlərarası komissiya, eləcə də parlamentlərimiz yaranmış imkandan istifadə edərək əlaqələri daha da möhkəmləndirməlidirlər. Çox yaxşı haldır ki, bu gün hər iki ölkənin parlamentində dostluq qrupları vardır və bu qruplar çox məhsuldar işləyirlər. Deputatlarımız beynəlxalq təşkilatlarda da səmərəli əməkdaşlıq edir və bir çox məsələlərdə eyni mövqedən çıxış edirlər. Biz BMT Təhlükəsizlik Şurasına qeyri-daimi üzv seçilmək məsələsində bunun şahidi olmuşuq. Pakistan yeganə dövlətdir ki, işğalçı Ermənistan ilə heç bir əlaqə qurmayıb. Eyni zamanda, Xocalı faciəsini soyqırımı aktı kimi tanıyan ilk dövlətdir. Biz bunu çox yüksək qiymətləndiririk və ümid edirik ki, bu mövqe dəyişməyəcəkdir".

Oqtay Əsədov Ermənistan-Azərbaycan, Dağlıq Qarabağ münaqişəsi ilə bağlı nümayiş etdirdiyi mövqeyə görə Pakistan nümayəndə heyətinə minnətdarlıq etdi.

Maulana Fazl-ur-Rahman isə dedi ki, Pakistan qardaş və dost Azərbaycan ilə əlaqələrin hərtərəfli inkişafında maraqlıdır: "Pakistan xalqı azərbaycanlıların problemlərini yaxşı başa düşür və ona görə də qarşılaşdığı problem həll olunmayana qədər işğalçı Ermənistanla heç bir əlaqə qurmayacaqdır".

Qonaq onu da bildirdi ki, Pakistan Parlamentinin hər iki palatası Xocalı faciəsini Ermənistanın azərbaycanlılara qarşı törətdiyi soyqırımı aktı kimi tanıyıb.

Sonra görüşdə Azərbaycan ilə Pakistan arasında iqtisadiyyat, ticarət, hərbi və informasiya kommunikasiyası sahəsində əməkdaşlığın genişləndirilməsinə, parlamentlərarası əlaqələrin daha da inkişaf etdirilməsinə dair fikir mübadiləsi aparıldı.

Azərbaycan.-2012.- 27 noyabr.- S.2.