Türkiyə Azərbaycanın hər bir uğuruna ürəkdən sevinir

Azərbaycan Respublikasının Baş naziri Artur Rasizadə noyabrın 27-də Türkiyə Böyük Millət Məclisinin Sədri Cəmil Çiçək ilə görüşmüşdür.

Baş nazir Artur Rasizadə Azərbaycan-Türkiyə münasibətlərinin yüksək səviyyədə, dostluq və qardaşlıq prinsipləri əsasında inkişaf etdiyini bildirmiş, qarşılıqlı səfərlərin əhəmiyyətini vurğulamışdır. Türkiyənin Azərbaycan üçün doğma olduğunu bildirən Baş nazir Artur Rasizadə bildirmişdir ki, ölkələrimiz arasında əlaqələrin qədim tarixi var və bunun daha da inkişaf etdirilməsi üçün hazırda böyük imkanlar mövcuddur. Ölkələrimiz arasında bütün sahələrdə, o cümlədən iqtisadi sahədə əməkdaşlığın intensiv olduğunu vurğulayan Artur Rasizadə parlamentlərarası əlaqələrin rolunu yüksək qiymətləndirmişdir.

Türkiyə Böyük Millət Məclisinin Sədri Cəmil Çiçək ölkəmizdə gedən çox böyük inkişaf proseslərinin şahidi olduğunu demişdir. "İnkişaf burada daimi yaşayanlara adi görünə bilər, lakin ölkənizə gələn qonaqları bu dəyişikliklər yaxşı mənada təəccübləndirir", -deyən Cəmil Çiçək ölkəsinin qardaş Azərbaycanın hər bir uğuruna ürəkdən sevindiyini məmnunluqla qeyd etmişdir.

Türkiyə Böyük Millət Məclisinin Sədri ölkələrimiz arasında münasibətlərin yüksək səviyyədə olduğunu bir daha vurğulamış, əməkdaşlığın bütün istiqamətlərdə, o cümlədən parlamentlərarası əlaqələr sahəsində də uğurla inkişaf etdiyini bildirmişdir.

Ermənistan-Azərbaycan, Dağlıq Qarabağ münaqişəsinə toxunan tərəflər bu münaqişənin tezliklə dinc yolla həllini tapacağına ümidvar olduqlarını demişlər.

Görüşdə qarşılıqlı maraq doğuran məsələlər ətrafında fikir mübadiləsi aparılmışdır.

AzərTAc

Azərbaycan.-2012.- 28 noyabr.- S.1.