Bakıda Qara Dəniz İqtisadi Əməkdaşlıq Təşkilatı ölkələri 28 noyabr.- Sqeyri-hökumət təşkilatlarının birinci forumu keçirilmişdir

Noyabrın 27-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının təşkilatçılığı ilə Bakıda Qara Dəniz İqtisadi Əməkdaşlıq Təşkilatı (QİƏT) ölkələri qeyri-hökumət təşkilatlarının birinci forumu keçirilmişdir.

AzərTAc xəbər verir ki, forumun məqsədi quruma üzv ölkələrin QHT-ləri arasında əməkdaşlığın əlaqələndirilməsi, regionda reallaşdırılan layihələrə ictimai dəstək verilməsi, qarşılıqlı əlaqələrə, münaqişələrin aradan qaldırılması təcrübəsinə vətəndaş cəmiyyəti institutlarının potensialının sərf edilməsidir.

Forumu giriş sözü ilə açan Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri Azay Quliyev tədbirin Bakıda keçirilməsinin əhəmiyyətindən danışmışdır. A.Quliyev Azərbaycanda kifayət qədər təcrübəyə malik QHT-lərin fəaliyyət göstərdiyini diqqətə çatdırmışdır. Forumda Azərbaycan Respublikasının Prezidenti Administrasiyasının xarici əlaqələr şöbəsinin müdiri Novruz Məmmədov dövlət başçısı İlham Əliyevin Qara Dəniz İqtisadi Əməkdaşlıq Təşkilatı ölkələri qeyri-hökumət təşkilatlarının birinci forumunun iştirakçılarına müraciətini oxumuşdur.

Mərasimdə çıxış edən Milli Məclis sədrinin müavini Bahar Muradova forumun Bakıda keçirilməsinin əhəmiyyətini yüksək qiymətləndirmiş, Azərbaycanda QHT-lərə Dövlət Dəstəyi Şurasının gördüyü işlərin, həyata keçirilən layihələrin əhəmiyyətindən danışmışdır. B.Muradova bildirmişdir ki, şura tərəfindən bu layihə və tədbirlər dövlətin dəstəyi nəticəsində həyata keçirilir. Azərbaycanda Qara Dəniz İqtisadi Əməkdaşlıq Təşkilatı Parlament Məclisinin 40-cı plenar sessiyasının keçirildiyini də diqqətə çatdıran Milli Məclis sədrinin müavini belə beynəlxalq tədbirlərin reallaşdırılmasında ictimai dəstəyin vacibliyini diqqətə çatdırmışdır. B.Muradova forumda çox vacib məsələlərin müzakirə ediləcəyinə ümidvar olduğunu bildirmişdir.

Qara Dəniz İqtisadi Əməkdaşlıq Təşkilatı Parlament Məclisinin Baş Assambleyasında Türkiyə qrupunun rəhbəri, Türkiyə Böyük Millət Məclisinin üzvü İsmayıl Safi Bakıda keçirilən birinci forumun əhəmiyyətini yüksək qiymətləndirmişdir.

Tədbirdə forumun nizamnaməsi müzakirə olunmuşdur.

Sonra Qara Dəniz İqtisadi Əməkdaşlıq Təşkilatı ölkələri qeyri-hökumət təşkilatlarının birinci forumunun Bakı bəyannaməsi qəbul olunmuşdur.

Forumda Azərbaycan, Albaniya, Bolqarıstan, Gürcüstan, Rusiya, Rumıniya, Türkiyə, Ukrayna və başqa ölkələrin nüfuzlu QHT-lərinin rəhbərləri, ölkəmizdə fəaliyyət göstərən beynəlxalq təşkilatların və diplomatik korpusların nümayəndələri, həmçinin Azərbaycanın dövlət və hökumət rəsmiləri iştirak etmişlər.

Azərbaycan.-2012.-28 noyabr. -S.3.