Bakıda «İdman qurğularının idarə edilməsi» mövzusunda beynəlxalq konfrans keçirilir

Noyabrın 27-də Bakıda "İdman qurğularının idarə edilməsi" mövzusunda beynəlxalq konfrans işə başlamışdır. Milli Olimpiya Komitəsinin inzibati binasında təşkil edilən konfrans MDB İcraiyyə Komitəsi tərəfindən qəbul olunmuş 2012-ci il - "İdman və sağlam həyat tərzi ili"nin Tədbirlər Planına əsasən keçirilir.

İki gün davam edəcək konfransın rəsmi açılış mərasimində çıxış edən gənclər və idman naziri Azad Rəhimov ölkəmizdə idmana göstərilən dövlət qayğısından danışmış, idmançılarımızın qazandıqları nailiyyətlər barədə məlumat vermişdir. Nazir bildirmişdir ki, ölkəmizdə idmanın inkişaf etdirilməsi istiqamətində mühüm addımlar atılmışdır. Hazırda Gimnastika Mərkəzi, üzgüçülük hovuzu, 65 min tamaşaçı tutumuna malik Olimpiya stadionu inşa olunur. Həmçinin cüdo, güləş və boks idman növləri üzrə bazaların da inşası davam etdirilir.

Bildirmişdir ki, idman infrastrukturu təkcə paytaxtda deyil, respublikamızın regionlarında da inkişaf etdirilir. Yaradılan idman infrastrukturu dünya standartlarına tam cavab verir və burada beynəlxalq yarışların keçirilməsi üçün əlverişli şərait vardır.

Azərbaycan Milli Olimpiya Komitəsinin vitse-prezidenti Çingiz Hüseynzadə bölgələrdə yaradılan idman infrastrukturu barədə məlumat vermişdir. Bildirmişdir ki, ilk olaraq Bakıda, Naxçıvanda və Gəncədə olimpiya idman kompleksləri istifadə verilmişdir. Daha sonra bu ənənə davam etdirilmişdir. Hazırda ölkəmizdə 35 olimpiya idman kompleksi fəaliyyət göstərir. Daha 10 idman infrastrukturu isə inşa olunur.

Ölkəmizdə idmana dövlət qayğısından danışan Ç.Hüseynzadə 20 il əvvəl MOK-un inzibati binasının təntənəli açılış mərasimində ümummilli lider Heydər Əliyev və Beynəlxalq Olimpiya Komitəsinin prezidenti Jaq Roqqenin iştirak etdiklərini diqqətə çatdırmışdır. Bildirmişdir ki, açılış mərasimindən bir neçə gün sonra isə Azərbaycan Avropa Olimpiya Komitəsi İcraiyyə Komitəsinin iclasına ev sahibliyi etmişdir.

Ukraynanın Gənclər və İdman Dövlət Agentliyinin sədr müavini Vadim Sisyuk ölkəmizdə idman sahəsində yaradılmış şəraiti yüksək qiymətləndirmiş və artıq Azərbaycanın idman ölkəsinə çevrildiyini diqqətə çatdırmışdır. Qeyd etmişdir ki, Ukraynada da idman infrastrukturunun inkişaf etdirilməsində mühüm işlər görülür. Ukraynada cari ildə futbol üzrə Avropa çempionatı yüksək səviyyədə təşkil olunmuşdur. Növbəti illərdə bədii gimnastika üzrə Dünya çempionatı, yüngül atletika və basketbol üzrə Avropa çempionatlarının Ukraynada keçirilməsi nəzərdə tutulmuşdur.

Sonra Rusiya, Qazaxıstan və Qırğızıstanı təmsil edən idman sahəsi üzrə mütəxəssislərin, Azərbaycanda fəaliyyət göstərən olimpiya idman kompleksləri və digər idman qurğuları rəhbərlərinin "Bədən tərbiyəsi və idman infrastrukturunun inkişafı", "Regionlarda bədən tərbiyəsi və idmanın inkişafında idman qurğularının rolu", "İdman komplekslərinin tikintisində əsas tələblər" və digər mövzularda məruzələri dinlənilmişdir.

Konfrans çərçivəsində iştirakçılar Otüstü Hokkey Kompleksi, Şağan qəsəbəsində yerləşən Olimpiya İdman Kompleksi, Bakı Tennis Akademiyası, "Sərhədçi" İdman Olimpiya Kompleksi və yenidən qurulmuş müasir Tofiq Bəhramov adına Respublika stadionu ilə yaxından tanış olacaq, Bakı Ekspo Mərkəzində keçiriləcək 1-ci Azərbaycan Beynəlxalq İdman, idman ləvazimatı və geyim sərgisində iştirak edəcəklər.

AzərTAc

Azərbaycan.-2012.- 28 noyabr.- S.5.