Gənclərin II Ümumrespublika teatr festivalının final mərhələsi başlamışdır

 

Noyabrın 27-də Azərbaycan Dövlət Gənc Tamaşaçılar Teatrında Gənclər və İdman, Mədəniyyət və Turizm nazirliklərinin, Azərbaycan-Amerika Alyansının dəstək verdikləri gənclərin ekologiya mövzusunda II Ümumrespublika teatr festivalının final mərhələsinin təntənəli açılış mərasimi keçirilmişdir.

Mərasimdə festivalın ideya müəllifi və rəhbəri, Milli Məclisin deputatı Jalə Əliyeva tədbirin mühüm əhəmiyyət daşıdığını vurğulamışdır. Bildirmişdir ki, festivalın məqsədi ətraf mühitin mühafizəsi və ekologiya mövzusu üzərində daha çox yaradıcı gənci düşündürməkdən ibarətdir.

J.Əliyeva diqqətə çatdırmışdır ki, ötən il iyulun 12-də Heydər Əliyev Fondunun vitse-prezidenti Leyla Əliyeva tərəfindən Ətraf Mühitin Mühafizəsi üzrə Beynəlxalq Dialoq Təşəbbüsü (IDEA) irəli sürülmüşdür. Biz də istədik ki, teatra gələn gənclərimiz Vətəni sevməyin yolunu, onun hər daşını, küçəsini, guşəsini, ağacını, çiçəyini sevməkdən başladığını səhnədə öz gözləri ilə görsünlər. Bu səbəbdən "Biz inkişaf zamanındayıq" İctimai Birliyi tərəfindən festivala məhz IDEA kampaniyasının fəaliyyətə başladığı və ildönümünün qeyd olunduğu gündə - iyulun 12-də start verilmişdir.

"Bizə ideya lazımdır" devizi ilə keçirilən builki festivalın məqsədi həm gəncləri yaradıcı dialoqa cəlb etmək, həm də gənc teatr kollektivlərinin hər bir üzvünü ekoloq-səfir olmağa həvəsləndirməkdir. Festival əslində, priz və pul mükafatı uğrunda gərgin rəqabət xarakteri daşımır və daha çox gənclər arasında fikir mübadiləsi, ideyalar toplusu kimi nəzərdə tutulmuşdur.

Festivalın rəhbəri bu layihəyə dəstək göstərən bütün təşkilatlara təşəkkürünü bildirmişdir.

Festivalın icraçı direktoru Ramil Ağasıyev, Gənclər və İdman Nazirliyinin sektor müdiri Əli Məmmədov festival müddətində görülmüş işlər haqqında geniş məlumat vermişlər.

Bildirilmişdir ki, festivalın iyulun 12-dən avqustun 30-dək müddəti əhatə edən birinci mərhələsində pyes-ssenarilərin qəbulu və seçimi aparılmış, təqdim olunmuş 35 ssenaridən 13-ü seçilmişdir. Avqustun 30-dan noyabrın 24-dək müddəti əhatə edən ikinci mərhələdə seçilmiş yaradıcı heyətlərə tamaşaları hazırlamaq üçün vaxt verilmişdir.

Bakıdan 8, habelə Sumqayıt, Ucar, Zaqatala, Ağdam, Zərdab truppalarının iştirak etdikləri festivala, ümumilikdə 100-dən artıq gənc qatılaraq 13 maraqlı, aktual mövzulu tamaşa hazırlanmışdır.

Festivalın final mərhələsinin ilk günündə 3 komanda çıxış etmişdir.

Üç gün ərzində tamaşalara baxış keçiriləcək və nüfuzlu münsiflər heyəti tərəfindən I, II və III yerlərin sahibləri, habelə ən yaxşı rejissor işi, ən yaxşı ssenari, ən yaxşı baş rol ifaçısı, ən yaxşı qadın rolunun müəllifi seçilib qiymətləndiriləcəkdir.

Festivala noyabrın 30-da yekun vurulacaqdır.

 

 

 AzərTAc

 

Azərbaycan.-2012.- 28 noyabr.- S.7.