Bakıda «Müəllim hazırlığının müasir problemləri: təhsildə elmi və texnoloji innovasiyalar» mövzusunda Beynəlxalq elmi konfrans başa çatmışdır

Azərbaycan Müəllimlər İnstitutunda (AMİ) Təhsil Nazirliyi və Ukrayna Milli Pedaqoji Elmlər Akademiyası (UMPEA) ilə birgə keçirilən "Müəllim hazırlığının müasir problemləri: təhsildə elmi və texnoloji innovasiyalar" mövzusunda ikinci Beynəlxalq elmi konfrans noyabrın 28-də işini yekunlaşdırmışdır.

AzərTAc xəbər verir ki, konfransın sonuncu günü bölmə rəhbərlərinin hesabatları dinlənilmiş, onların fəaliyyəti yüksək qiymətləndirilmişdir.

Bildirilmişdir ki, bölmə iclaslarında Azərbaycan ilə yanaşı, Türkiyə, Rusiya, Moldova, Ukrayna, Pakistan, Gürcüstan, Hindistan, İspaniya, İsveçrə, Belarus və digər ölkələrin tanınmış elm adamlarının və mütəxəssislərin ümumilikdə 160-dək məruzəsi dinlənilmiş, müzakirələr aparılmışdır.

Məruzələrdə müasir şəraitdə müəllim hazırlığının aktuallığından, respublikada müəllim hazırlığının inkişaf perspektivlərindən bəhs olunmuş, bu sahədə yeni təlim texnologiyalarının tətbiqinin əhəmiyyəti, qazanılmış uğurlar və dünya təcrübəsindən istifadə problemləri müzakirə edilmişdir.

Konfransın bağlanış mərasimində AMİ-nin rektoru, Milli Məclisin deputatı, professor Aqiyə Naxçıvanlı tədbirin yekunları barədə məlumat vermişdir. Rektor bildirmişdir ki, üç gün davam etmiş konfransda müəllim hazırlığı və diplomdan sonrakı fəaliyyətlə bağlı maraqlı təkliflər səslənmiş, səmərəli müzakirələr aparılmışdır. Konfrans məqsədlərinə tam nail olmuşdur. Burada keçirilən müzakirələr göstərmişdir ki, təhsil sahəsində vacib problemlər var və biz onların aradan qaldırılması üçün birgə çalışmalıyıq.

A.Naxçıvanlı konfransın təşkilində və keçirilməsində fəal iştiraklarına görə UMPEA-nın Təhsilin Menecmenti Universitetinin rektoru, akademik Viktor Oleynikə, Ukrayna İnformasiya Texnologiyaları və Təhsil Vasitələri İnstitutunun direktoru, akademik Valeri Bıkova, eləcə də bütün iştirakçılara dərin təşəkkürünü bildirmişdir.

Tədbirdə ukraynalı akademiklər Viktor Oleynik və Valeri Bıkov, İ.Cavaxişvili adına Tbilisi Dövlət Universitetinin professoru Ketevan Pavliaşvili, Rusiya Təhsil Akademiyasının nümayəndəsi Marina Yakuşkina və başqaları çıxış edərək üç gün ərzində konfransda bir sıra vacib məsələlərin müzakirə olunduğunu, burada qaldırılan problemlərin ümumi xarakter daşıdığını və yeni görüşlərin zərurətini vurğulamışlar.

Azərbaycanda özlərini doğma evlərində olduğu kimi hiss etdiklərini söyləyən qonaqlar onlara göstərilən səmimi münasibətə və qonaqpərvərliyə görə minnətdarlıqlarını bildirmişlər.

Sonda bütün iştirakçılara sertifikatlar verilmişdir. Qeyd edək ki, konfransın materialları toplu şəklində çap ediləcəkdir.

Azərbaycan.-2012.- 29 noyabr.- S.5.