Vətəndaşlıq borcu

1 oktyabr - Beynəlxalq Ahıllar Günü Səbail rayonunda geniş şəkildə qeyd olundu. Əlamətdar günlə əlaqədar Səbailin qədim qəsəbəsi olan Bibiheybətdə rayonun ahıl, kimsəsiz, əlil və qayğıya ən çox ehtiyacı olan 150 nəfər sakini üçün rayon icra hakimiyyəti tərəfindən bayram süfrəsi açıldı.

Səbail Rayon İcra Hakimiyyətinin başçısı Asif Əsgərov yaşlı nəslin nümayəndələrini salamlayaraq, onlara uzun ömür və cansağlığı arzulayaraq dövlət tərəfindən hər bir ahıl vətəndaşın diqqət və qayğı ilə əhatə olunduğunu bildirib. Qeyd olundu ki, Azərbaycan Respublikasının Prezidenti cənab İlham Əliyevin apardığı uğurlu siyasət nəticəsində əldə olunmuş iqtisadi inkişaf son illər ərzində pensiya və minimum əməkhaqlarının məbləğinin dəfələrlə qaldırılmasına imkan verib. Keçən il, 2006-cı ilə qədər ölkədə pensiyaya çıxan 900 min vətəndaşın pensiyası 40 faiz artıb, bu ilin fevralında isə əmək pensiyalarının sığorta hissəsi 7,9 faizlə indeksləşdirilərək yenidən hesablanıb. Rayon üzrə bu indeksləşdirmə 12265 nəfər pensiyaçıya şamil edilərək ümumilikdə 83691,34 manat artım olub və ödənilib. Gələn il üçün də pensiya və müavinətlərin artırılması nəzərdə tutulub.

Bu gün Səbail rayonunda yaşayanların 6,5 faizini (6073 nəfər) yaşı 65-dən yuxarı olan ahıllar təşkil edir. Müxtəlif növ və kateqoriyalar üzrə 2515 nəfər sosial müavinət, 401 ailə (1668 ailə üzvü) ünvanlı sosial yardım alır. Hər bir ailə üzvünə 27,91 manat olmaqla, orta hesabla hər bir ailəyə 116,10 manat sosial yardım təyin olunub. Səbail Rayon Əhalinin Sosial Müdafiə Mərkəzinin Sosial xidmət şöbəsində 370 nəfər tənha, əlil qeydiyyatdadır ki, onlara 31 nəfər sosial işçi xidmət göstərir. Təqaüdçülərə təqaüd və müavinətlərin ödənilməsində gecikmələrə yol verilmir, onların müraciətləri nəzərə alınaraq rayonun bir neçə yaşayış sahəsində, o cümlədən Bibiheybət qəsəbəsi, 20-ci yaşayış sahələrində yeni bankomatlar quraşdırılıb. 2012-ci il may ayının 9-da II Dünya müharibəsində faşizm üzərində qələbənin 67-ci ildönümü münasibəti ilə Dağüstü Parkda keçirilən mərasimdə Prezident İlham Əliyev tərəfindən həmin görüşün iştirakçısı, müharibə veteranı, Səbail rayon sakini Əli Surxay oğlu Nəsirova 3 otaqlı mənzil verilib. Sonra icra başçısı Asif Əsgərov rayonda aparılan genişmiqyaslı abadlıq-quruculuq işləri barədə məlumat vermiş, rayonun sosial-iqtisadi inkişafı üçün görülməsi nəzərdə tutulan işlərdən danışaraq bildirdi ki, bu işlərin həyata keçirilməsində veteran və yaşlı nəsil nümayəndələrinin hər zaman məsləhət və təkliflərinə böyük ehtiyac var.

Tədbirdə Səbail Rayon Veteran Təşkilatları Şurasının sədri, Sosialist Əməyi Qəhrəmanı Ömər Ağayev, Qızıl Aypara Cəmiyyəti Səbail rayon bölməsinin sədri Adilə Yaqubova və respublika Veteranlar Şurasının məsul katibi Əlifaim İsmayılov çıxış edərək rayonda ahıl və veteranlarla bağlı görülən işlərdən, onlara göstərilən diqqət və qayğıdan danışaraq bu işlərə görə dövlət başçısına öz minnətdarlıqlarını bildirdilər.

Görüşdə iştirak edən ahıllara RİH tərəfindən ərzaq bağlamaları təqdim olundu. Tədbirdə respublikamızın tanınmış incəsənət xadimlərinin iştirakı ilə konsert proqramı təşkil edildi.

Rəşad BAXŞƏLİYEV

Azərbaycan.-2012.- 2 oktyabr.- S. 7.