BMT Baş Məclisində Ermənistan xarici işlər nazirinin qeydləri təəccübə və istehzaya səbəb olmuşdur

Ermənistanın xarici işlər naziri E.Nalbandyan BMT Baş Məclisində ümumi müzakirələr çərçivəsində çıxış edərək həmişə olduğu kimi, bu dəfə də Azərbaycanın əleyhinə uydurma fikirlər səsləndirmişdir.

Azərbaycanın BMT yanında Daimi Nümayəndəliyindən AzərTAc-a bildirmişlər ki, bununla əlaqədar ölkəmizin BMT yanında daimi nümayəndəsi, səfir Aqşin Mehdiyev cavab hüququndan istifadə edərək E.Nalbandyanın çıxışında ifadə olunmuş fikirlərə münasibət bildirmiş və erməni nazirin çıxışının tamamilə yalanlar üzərində qurulduğunu vurğulamışdır.

Çıxışını, demək olar ki, R.Səfərov məsələsi üzərində qurmuş E.Nalbandyanın müvafiq qeydləri ilə bağlı A.Mehdiyev Azərbaycan tərəfinin bununla bağlı mövqeyinin BMT-nin Baş katibinə ünvanlanmış məktubda aydın surətdə ifadə edildiyini bildirərək üzv dövlətləri həmin məktubla tanış olmağa çağırmışdır.

R.Səfərov məsələsini irqçilik nümunəsi kimi təqdim etməyə çalışan E.Nalbandyanın fikirlərinə cavab olaraq A.Mehdiyev monoetnik Ermənistandan fərqli olaraq, Azərbaycanın çoxmillətli dövlət olduğunu və ermənilərin Dağlıq Qarabağdan başqa ölkəmizin digər ərazilərində də yaşadıqlarını vurğulamış, müxtəlif beynəlxalq təşkilatların Ermənistan cəmiyyətində dözümsüzlük və nifrətin mövcudluğu faktını qeyd etməsinə toxunmuşdur. Bildirilmişdir ki, bu dözümsüzlük və nifrət işğal edilmiş ərazilərdə azərbaycanlılara qarşı etnik təmizləmə siyasətinin həyata keçirilməsində və etnik zəmində qondarma qurumun yaradılmasında da öz əksini tapmışdır.

Azərbaycanın BMT yanında daimi nümayəndəsi hazırkı Ermənistan prezidenti S.Sarkisyanın hələ 2000-ci ildə müdafiə naziri olarkən verdiyi müsahibələrin birində minlərlə azərbaycanlı mülki əhalinin qətlə yetirilməsi ilə bağlı təəssüf hissi keçirmədiyi fikrini xatırladaraq Ermənistan rəhbərliyinin cinayətkar mahiyyətini diqqətə çatdırmışdır.

E.Nalbandyanın guya beynəlxalq təşkilatların münaqişə ilə bağlı mövqeyinin Ermənistanın mövqeyi ilə üst-üstə düşməsi fikrinə cavab olaraq A.Mehdiyev BMT Təhlükəsizlik Şurası və Baş Məclisinin qətnamələrində Azərbaycan torpaqlarının işğaldan azad edilməsi çağırışının əks olunduğunu, son olaraq təkcə bu il NATO, Qoşulmama Hərəkatı və İslam Əməkdaşlıq Təşkilatının sammitlərində qəbul edilmiş sənədlərdə Azərbaycanın münaqişə ilə bağlı mövqeyinə uyğun müddəaların öz əksini tapdığını xatırlatmış və Ermənistan prezidenti S.Sarkisyanın məhz buna görə NATO və Qoşulmama Hərəkatının toplantılarına qatılmaqdan imtina etdiyini vurğulamışdır.

A.Mehdiyev əlavə etmişdir ki, işğalçı dövlətin təcavüzünün qurbanı olan ölkəni özünün hərbi büdcəsini artırmaqda günahlandırması gülüncdür. Bundan əlavə, Azərbaycanın hərbi büdcəsi onun ümumi büdcəsinin artması kontekstində artır və bu, ölkənin ərazisi, əhalisi və ümumi daxili məhsulunun həcmi ilə uyğunluq təşkil edir. Ermənistan isə əslində Cənubi Qafqazda ən hərbiləşmiş dövlətdir.

Ermənistan cavab hüququnda Azərbaycanın BMT yanında daimi nümayəndəsinin qaldırdığı məsələlərə cavab vermək əvəzinə tamamilə məzmundan kənar və Azərbaycan tərəfinin qeydləri ilə heç bir uyğunluğu olmayan məqamlara toxunmuşdur. Yenidən cavab hüququndan istifadə edən A.Mehdiyev Ermənistanın faktiki olaraq heç nə söyləmədiyini və Azərbaycanın heç bir qeydinə cavab verməyərək yalnız uyğunsuz fikirlər səsləndirdiyini bildirmişdir. Səfir, eyni zamanda Ermənistanın növbəti dəfə regionda sülh və sabitlik axtarışından uzaq olduğunu nümayiş etdirdiyini, lakin onun münaqişə ilə bağlı siyasi gündəliyinin reallaşmayacağını, Yerevanın işğalçılıq siyasətindən və qonşularına ərazi iddialarından əl çəkməyə məcbur olacağını qeyd etmişdir. Ermənistan nümayəndəsi bu dəfə yeni söz tapmaqda çətinlik çəkərək E.Nalbandyanın çıxışından böyük bir hissəni təkrar etmiş və Belarus xarici işlər nazirinin tamamilə ayrı kontekstdə işlətdiyi fikrindən sitat gətirmişdir.

Ümumiyyətlə, E.Nalbandyanın çıxışı, eləcə də sonradan cavab hüququ ilə çıxış edən Ermənistan nümayəndəsinin qeydləri BMT Baş Məclisində olan diplomatların təəccübünə və hətta istehzasına səbəb olmuşdur.

Azərbaycan.-2012.- 3 oktyabr.- S.2.