Ermənistan-Azərbaycan, Dağlıq Qarabağ münaqişəsinin həlli əsas məsələdir

Bu istiqamətdə önəmli addımlar atılır

Bir neçə gün əvvəl Azərbaycan Diplomatik Akademiyasının yeni tədris korpusunun istifadəyə verilməsi və eyni zamanda, ənənəvi olaraq səfirlərlə keçirilən müşavirə ictimai-siyasi həyatımızda mühüm hadisəyə çevrildi. Diplomat kadrların hazırlanmasında bu akademiyanın fəaliyyəti əvəzsizdir. Akademiyada oxumaq, çalışmaq üçün indi bütün şərait vardır.

Azərbaycanın beynəlxalq nüfuzu artır və xarici ölkələrlə əlaqələri gündən-günə möhkəmlənir. Hazırda dünyanın 55-dən artıq ölkəsində Azərbaycanın diplomatik nümayəndəlikləri fəaliyyət göstərməkdədir. Nüfuzlu beynəlxalq təşkilatlarda da diplomatik nümayəndəliklərimizin sayı get-gedə artmaqdadır. Belə bir vaxtda gənc kadrların hazırlığı məsələsi bir vəzifə olaraq qarşıda durur.

Azərbaycan Prezidentinin qeyd etdiyi kimi, səfirlərlə ənənəvi müşavirənin məhz belə bir vaxtda peşəkar diplomatların hazırlığı məsələsini həyata keçirən Diplomatik Akademiyanın yeni tədris korpusunda baş tutması da təsadüfi deyildi: "İndi bizim dünyadakı səfirliklərimizin sayı sürətlə artmaqdadır. Əlbəttə, bu, bizim xarici siyasətdəki uğurumuzu şərtləndirən amillərdən biridir. Gələcəkdə biz diplomatik nümayəndəliklərin sayını artıracağıq ki, Azərbaycan öz maraqlarını daha da böyük uğurla müdafiə edə bilsin. Səfirlər peşəkar diplomatdırlar. Onların arasında gənclər də kifayət qədər çoxdur, təcrübəli diplomatlar da vardır. Onlar öz vəzifə borclarını yaxşı bilirlər və hesab edirəm ki, bütövlükdə öz vəzifə borclarını yaxşı yerinə yetirirlər. Səfirlərin qarşısında duran vəzifələr bəllidir, aydındır. Ancaq yenə də deyirəm, həyat sürətlə inkişaf edir, beynəlxalq münasibətlər dəyişir və beynəlxalq aləmdə yeni məsələlər, yeni çağırışlar ortaya çıxır. Əlbəttə ki, biz xarici siyasətimizə mütəmadi qaydada müəyyən düzəlişlər etməliyik. Nəzərə almalıyıq ki, strateji xəttimiz dəyişməz olaraq qalır. Azərbaycanın xarici siyasətinin istiqamətlərini ulu öndər Heydər Əliyev müəyyən etmişdir. Bu gün bu sahədə və bütün başqa sahələrdə strateji xətt icra edilir".

Dövlət başçısının qarşıya qoyduğu vəzifələr arasında ən mühümü Ermənistan-Azərbaycan, Dağlıq Qarabağ münaqişəsinin həlli məsələsidir: "Bu, bizim nəinki xarici siyasətdə, ümumiyyətlə, ölkə qarşısında duran əsas məsələdir. Bildiyiniz kimi, məsələ uzun illərdir öz həllini tapmır, ədalət, beynəlxalq hüquq normaları pozulur və bu ədalətsizlik davam edir. Azərbaycan bu məsələnin həlli üçün bütün imkanlardan istifadə edir və etməlidir. Diplomatik səylər gücləndirilməlidir və gücləndirilir. Digər amillər də bu məsələnin həlli üçün öz rolunu oynamalıdır və bu istiqamətdə önəmli addımlar atılır".

Müstəqilliyin bərpasından sonrakı 20 il ərzində Azərbaycan ilə Ermənistan arasındakı fərq, uçurum get-gedə daha da böyüyür. Azərbaycanın Cənubi Qafqazdakı iqtisadi-siyasi çəkisi günü-gündən artmaqdadır. Növbəti illərdə bu fərq bir az da böyüyəcək və Azərbaycanın üstünlükləri daha da artacaqdır. Dünyada Azərbaycana dost ölkələrin sayı artmaqdadır. Beynəlxalq təşkilatlarda Dağlıq Qarabağ məsələsinə dair ədalətli qətnamələr qəbul edilsə də, sanki problemin sonu görünmür. BMT Təhlükəsizlik Şurasının qətnamələri, ATƏT-in , Avropa Parlamentinin, Avropa Şurasının, Qoşulmama Hərəkatının, NATO-nun qərarları olsa da, Ermənistan öz inadkarlığından əl çəkmir, torpaqlarımız işğal altında qalmaqda davam edir.

Dövlət başçısının da qeyd etdiyi kimi, məsələnin tarixi aspekti çox önəmlidir. Çünki erməni lobbisi dünyada belə bir rəy formalaşdırmağa çalışır ki, guya Dağlıq Qarabağ erməni torpağıdır və erməni xalqı əsrlər boyu bu torpaqda yaşamışdır. Bunlar ermənilər tərəfindən formalaşdırılan yalan, uydurma, qərəzli məlumatlardır. Hazırda diplomatik korpusların və Azərbaycan diasporunun qarşısında duran əsas vəzifələrdən biri bu yalanları ifşa etməklə həqiqətləri ortaya qoymaqdır. Həqiqət isə bundan ibarətdir ki, Dağlıq Qarabağ Azərbaycan torpağıdır. Dağlıq Qarabağda yerləşən bütün yaşayış məntəqələrinin adlarının, demək olar ki, hamısı Azərbaycan mənşəlidir, Azərbaycan dilindədir: "Nəinki Dağlıq Qarabağ, indiki Ermənistanın toponimlərinin mütləq əksəriyyəti Azərbaycan mənşəlidir. Yəni xalqımız əsrlər boyu bu torpaqda yaşamış, yaratmış və bundan sonra da bu torpaqda yaşamalıdır. Biz bunu təmin edəcəyik" deyən ölkə rəhbəri iqtisadi məsələlərə də toxundu, Azərbaycan iqtisadiyyatının müqayisəedilməz dərəcədə irəliyə getdiyini bildirdi. Hamı yaxşı bilir, bunu beynəlxalq güc mərkəzləri də gözəl anlayır ki, bizim təkcə hərbi xərclərimiz Ermənistanın bütün büdcəsindən iki dəfə çoxdur, iqtisadi imkanlarımız genişdir, tərəfdaşlarımızın sayı artmaqdadır.

Ermənistan iqtisadiyyatı isə asılı vəziyyətdədir. Ermənistan iqtisadiyyatının "imkan"larından danışarkən onun ixrac məhsullarına - xüsusilə Avropaya qurbağa ixrac etməsi faktı da diqqətə çəkildi. Bu, bir daha səfalət içində çapalayan ölkənin vəziyyətindən xəbər verir. Dövlət başçısı dedi: "Bu yaxınlarda onların hətta rəsmi statistik məlumatlarına görə, Ermənistanın ixrac nomenklaturası bəlli oldu və orada çox gülməli ixrac məhsulları üzə çıxdı. Yəni qurbağalar, - bəlkə bu auditoriyada bu barədə danışmaq yersiz olar, - amma bu, reallıqdır. Yəni bu ölkənin daxili resursları tükənir. İqtisadiyyat çökür. Sənaye iflic vəziyyətindədir. Demoqrafik vəziyyət acınacaqlıdır. Ölkədən hər il yüz minə qədər əhali köç edir və bu proses davam edir. Bu prosesin qarşısını almaq artıq mümkün deyildir, o vaxta qədər ki, Ermənistan öz qonşularına qarşı torpaq iddiasında olmağa davam edəcəkdir".

Demoqrafik vəziyyətin gələcəkdə çox şeyi müəyyən edəcəyi heç kimə sirr deyil. Çünki hazırda ölkələrin imkanları da, nüfuzu da, təsir gücü də bir çox hallarda əhalidən, onun sayından asılıdır. Azərbaycanda bu dinamika müsbətdir. Ermənistanda isə vəziyyət günü-gündən ağırlaşır, əhali durmadan ölkəni tərk edir. Bir vaxt Xocalını qan gölündə boğanlar indi özləri baş götürüb ölkədən qaçmaqdadırlar. Azərbaycan səfirlikləri qarşısında duran əsas vəzifələrdən biri də hücum siyasətini davam etdirməkdən, Xocalı soyqırımını bütün dünyaya tanıtdırmaqdan ibarətdir. Qısa müddətdə üç ölkə parlamentinin Xocalı qırğınını soyqırımı kimi qəbul etməsi mühüm hadisədir. Ermənilər 50-ci illərdən başlayaraq "erməni soyqırımı" məsələsini qaldırdılar. Ancaq biz bu məsələ ilə bir neçə ildir ki, məşğul oluruq və artıq nəticələr göz qabağındadır: "Bizim səfirlər, səfirliklərin nümayəndələri bu məsələni harada mümkündür qaldırmalıdırlar. Onların, səfirliklərin çalışdıqları ölkələrin qanunvericilik orqanlarında Xocalı soyqırımı məsələsi qaldırılmalıdır. Çalışmalıyıq ki, bu soyqırımı müxtəlif səviyyələrdə tanınsın. Biz istər regional, istər munisipial, - əlbəttə ki, federal səviyyədə olarsa daha yaxşı olar, - səviyyədə bu işi daim aparmalıyıq. Əldə edilmiş nəticələr, əlbəttə ki, bizi ruhlandırır, göstərir ki, bu, mümkündür. Ümumiyyətlə, ölkəmizin dinamik inkişafı və artıq dünyada Azərbaycan haqqında çox müsbət rəyin formalaşması göstərir ki, mümkündür, çox şey mümkündür. Sadəcə olaraq, işləmək lazımdır, konkret proqram olmalıdır, tapşırıqlar verilməlidir və icra edilməlidir. Ona görə, əminəm ki, gələcəkdə Meksikaya, Pakistana, Kolumbiyaya digər ölkələr də qoşulacaq və Xocalı soyqırımı digər ölkələr tərəfindən tanınacaqdır. Vaxt gələcək, bu soyqırımını törədənlər qanun qarşısında cavab verəcəklər", - deyə Azərbaycan Prezidenti bir daha bəyan etdi.

Bu uğurlar sırasına diaspor təşkilatlarımızın fəallığı, xarici ölkələrdə vaxtaşırı keçirilən nümayişlər, etiraz piketləri, tədbirlər, konfranslar göstərir ki, Azərbaycanın diaspor təşkilatları çox güclənib və səfirliklər də diaspor təşkilatları ilə sıx əlaqədə hər bir vəzifəni yerinə yetirə bilərlər. Bu sıraya Azərbaycandakı azad cəmiyyəti də əlavə etsək, gücümüzü görüb etiraf edənlərin sayı bir az da artacaq. Bu isə sabaha olan böyük inamdan xəbər verir: "Biz irəliyə getməliyik. Çünki həllini gözləyən məsələlər çoxdur. Dünya dinamik şəkildə inkişaf edir və hətta bir ay, bir həftə də gözləmək olmaz. Biz xarici siyasətdə, iqtisadi sahədə, texnologiyalar sahəsində hadisələri qabaqlamalıyıq. Bax bu gözəl Diplomatik Akademiyanın üstünlüklərindən biri də odur ki, burada ən müasir texnologiyalar tətbiq olunur. Gənclərimiz bu texnologiyalar əsasında təhsil alacaqlar. Yəni yeni texnologiyalar, kosmik sənayenin inkişafı. Bəzilərinə təəccüblü gəlib ki, Azərbaycan kimi ölkədə kosmik sənaye necə ola bilər? Niyə də olmasın?! Bizim istedadlı kadrlarımız, maliyyə resurslarımız və gələcəyə baxışımız vardır. Ona görə biz bir addım da yavaşlamayacağıq. Biz irəliyə gedəcəyik, istədiyimizə nail olacağıq. Əminəm ki, suverenliyimizi bərpa edəcəyik və bir gün gələcək, Azərbaycan bayrağı Şuşada və Xankəndidə dalğalanacaqdır".

Bəxtiyar QARACA

Azərbaycan.-2012.- 3 oktyabr.- S.5.