Moskvada V.Putinin milli siyasətinə tərəfdar və Rusiyada millətlərarası ədavətin qızışdırılmasına qarşı çıxan Azərbaycan diasporunun mitinqi keçirilmişdir

Moskvada Krasnopresnenskaya Zastava meydanında "Rusiya Federasiyasının Prezidenti Vladimir Putinin milli siyasətini müdafiə edirik. Rusiyada millətlərarası ədavətin qızışdırılmasının əleyhinəyik" şüarı altında icazəli mitinq keçirilmişdir. Mitinq Moskvada yaşayan azərbaycanlı gənclərin təşəbbüsü ilə Ümumrusiya Azərbaycanlıları Konqresinin Moskva Regional Şöbəsi tərəfindən təşkil olunmuşdur.

Mitinqin məqsədi Rusiya cəmiyyətinin sabitliyini pozan və onun vətəndaşlarının təhlükəsizliyi üçün qorxu yaradan fitnəkar çağırışlarla əlaqədar narahatlıq hissini ölkə rəhbərliyinə çatdırmaqdır. Təşəbbüs qrupunun fikrincə, Rusiyanın azərbaycanlı ictimaiyyəti bəzi mənfur siyasi xadimlərin yenə də milli məsələdən öz məhdud tamahkar məqsədləri üçün istifadə etmək cəhdlərindən narahat olduğunu bildirmişdir. Çoxmillətli Rusiyada yaşayan və onun geniş inkişafına sanballı töhfəsini verən azərbaycanlılar millətlərarası sülh və razılığın təmin edilməsi sahəsində Prezident Vladimir Vladimiroviç Putin başda olmaqla ölkə rəhbərliyinin yeritdiyi siyasətə tam tərəfdar çıxdıqlarını bildirirlər.

400 nəfərdən çox adamın iştirak etdiyi mitinq münaqişəsiz ötüşmüşdür. Tədbirdə azərbaycanlılarla yanaşı başqa millətlərin nümayəndələri də iştirak etmişlər.

ÜAK-nın baş katibi Mikayıl Hüseynov, baş katibin müavini Nemət Nağdəliyev, ÜAK Moskva regional təşkilatının rəhbəri İlqar Hacıyev, Azərbaycanın Moskvadakı rus icmasının nümayəndəsi Yuri Karetin, habelə diasporun fəalları Azərbaycanla Rusiya arasında çoxəsrlik dostluqdan, çoxmillətli Rusiyada millətlərarası sülh və razılığın pozulmasının yolverilməzliyindən danışmışlar.

Mitinqdə "Millətlərarası münaqişələrə və ədavətlərə - yox!", "Vladimir Putinin siyasətini müdafiə edək!", "Biz rusiyalıyıq!", "Millətlərarası ədavətə yox deyək!", "Rusiyanın azərbaycanlı gəncləri Putinin milli siyasətinə tərəfdardırlar", "Rusiya və Azərbaycan strateji tərəfdaşlardır" şüarları səsləndirilmişdir.

Asya HACIZADƏ,

AzərTAc-ın xüsusi müxbiri

Moskva

Azərbaycan.-2012.- 3 oktyabr.- S.5.