Dora BAKOYANNIS: Bakı Beynəlxalq Humanitar Forumu sivilizasiyalararası dialoqun inkişafına mühüm töhfələr verəcək

İlk növbədə, qeyd etmək istəyirəm ki, yenidən Azərbaycanda olmaqdan çox məmnunam. Mən demək olar ki, hər il Bakıya gəlirəm. Bakı Beynəlxalq Humanitar Forumunda keçən il də iştirak etmişəm. Bu mötəbər tədbir dünyanın bir çox ölkələrindən nüfuzlu şəxsləri bir araya gətirərək həlli vacib məsələlərin müzakirəsi üçün gözəl imkanlar yaradır.

Bu sözləri Bakı Beynəlxalq Humanitar Forumunda iştirak edən Yunanıstanın sabiq xarici işlər naziri xanım Dora Bakoyannis AzərTAc-a müsahibəsində söyləmişdir.

Xanım D.Bakoyannis əmin olduğunu bildirmişdir ki, forum beynəlxalq humanitar əməkdaşlığın möhkəmləndirilməsinə, sivilizasiyalararası dialoqun inkişaf etdirilməsinə mühüm töhfələr verəcəkdir.

Azərbaycanın zəngin mədəniyyətə malik olduğunu qeyd edən xanım D.Bakoyannis beynəlxalq miqyasda ölkəmizə artan marağı məmnunluqla vurğulamışdır.

Hər səfərində Bakıda gördüyü sürətli dəyişikliklərin onu heyran etdiyini deyən Yunanıstanın sabiq xarici işlər naziri Azərbaycanın bu cür mötəbər tədbirlərə ev sahibliyi etməsini ölkəmizin dünyada nüfuzunun daha da artması ilə əlaqələndirmişdir.

Xanım D.Bakoyannis forumun yüksək səviyyədə təşkilinə görə Azərbaycan Prezidentinə təşəkkür etmişdir.

AzərTAc

Azərbaycan.-2012.- 5 oktyabr.- S.6.