Bolqarıstan Milli İncəsənət Akademiyasının rektoru Azərbaycan Dövlət Mədəniyyət və İncəsənət Universitetindən xoş təəssüratla ayrılmışdır

II Bakı Beynəlxalq Humanitar Forumunun çoxsaylı iştirakçılarından biri - Bolqarıstan Milli İncəsənət Akademiyasının rektoru, professor Svetoslav Kokalov Azərbaycan Dövlət Mədəniyyət və İncəsənət Universitetində (ADMİU) olmuşdur.

ADMİU-dan AzərTAc-a bildirmişlər ki, dünyada tanınmış alimin Azərbaycana səfəri çərçivəsində bu ali təhsil ocağını ziyarət etməsi səbəbsiz deyildi. İlbəil beynəlxalq əlaqələrini genişləndirən, sıralarında bir sıra ölkələrdən təhsil almağa gəlmiş gənclərə yer verən Azərbaycan Dövlət Mədəniyyət və İncəsənət Universitetinin rektoru, professor Timuçin Əfəndiyev 2010-cu ilin aprelində Bolqarıstan Milli İncəsənət Akademiyası rəhbərliyinin dəvəti ilə bu ölkəyə səfər etmiş, akademiyanın fəaliyyəti, iş şəraiti, yaradıcı potensialı ilə tanış olmuşdu.

Həmin vaxt bu iki təhsil ocağı arasında əməkdaşlığa dair sənədlər imzalanmışdı. Artıq ikinci ildir ki, həmin müqavilənin bəndlərinə uyğun olaraq nəzərəçarpacaq işlər görülməkdədir.

S.Kokalovun ADMİU-nun rektoru T.Əfəndiyev ilə görüşündə bu iki təhsil ocağı arasında əməkdaşlığın perspektivləri müzakirə edilmiş, işgüzar fikir mübadiləsi aparılmışdır.

Bolqarıstanlı qonaq ADMİU-da tələbələrin yüksək səviyyədə təhsil almaları üçün yaradılmış şəraitlə yaxından tanış olmuş, universitetdə fəaliyyət göstərən muzeyin eksponatlarına baxmış, buradan aldığı təəssüratları rəy kitabına yazmışdır.

Daha sonra rəqs zalına dəvət edilən qonaq universitetin müəllimləri Ofelya Zeynalova və Əsəd Rzayevin bədahətən quraşdırdıqları və peşəkarlarla ifa olunan "Dəniz", "İgidlər" və "Qarabağ yallısı" rəqslərinə tamaşa etmişdir.

Bu təqdimatdan böyük zövq aldığını dilə gətirən S.Kokalov, xüsusilə "Dəniz" rəqsinə quruluş verən və onu böyük bir şövqlə oynayan II kurs tələbəsi, Prezident təqaüdçüsü, Azərbaycan Dövlət Akademik Opera və Balet Teatrının prima balerinası Cəmilə Kərimovanın ifaçılıq bacarığına valeh olduğunu bildirmişdir.

Bolqarıstanlı qonaq gələn il 90 illik yubileyini qeyd edəcək Azərbaycan Dövlət Mədəniyyət və İncəsənət Universitetindən xoş təəssüratla ayrılmışdır.

Azərbaycan.-2012.- 6 oktyabr.- S.6.