Naxçıvanda Türkdilli dövlətlərin gömrük xidməti rəhbərlərinin görüşü keçirildi

Oktyabrın 5-də Naxçıvanda Türkdilli dövlətlərin gömrük xidməti rəhbərlərinin görüşü olub. Görüşdə Türkdilli Dövlətlərin Əməkdaşlıq Şurasına üzv ölkələrin - Azərbaycan, Türkiyə, Qazaxıstan və Qırğız respublikalarının gömrük xidməti nümayəndələri iştirak ediblər. Görüşə Türkdilli Dövlətlərin Əməkdaşlıq Şurasının baş katibinin müavini Qismət Gözəlovun rəhbərlik etdiyi nümayəndə heyəti də qatılıb.

Tədbir iştirakçıları əvvəlcə xalqımızın ümumilli lideri Heydər Əliyevin Naxçıvan şəhərində ucaldılan abidəsini ziyarət etdilər, Heydər Əliyev Muzeyində ulu öndərin mənalı ömür yolunu və zəngin siyasi irsini əks etdirən eksponatlarla tanış oldular.

Qeyd edək ki, 2-3 oktyabr 2009-cu il tarixdə Naxçıvanda keçirilmiş Türkdilli ölkələrin dövlət başçılarının IX zirvə toplantısı çərçivəsində imzalanmış "Naxçıvan Bəyannaməsi"nə və "Türkdilli Dövlətlərin Əməkdaşlıq Şurasının yaradılması haqqında" Naxçıvan Sazişinə əsasən, dövlət başçıları tarix, dil və mədəniyyət yaxınlığına, dostluq, bərabərlik və qarşılıqlı faydaya əsaslanan, bütün sahələrdə mövcud olan yüksək səviyyəli əlaqələrin və əməkdaşlığın əhəmiyyətini önə çəkmiş, müasir beynəlxalq münasibətlərdə iqtisadiyyat və ticarətin aparıcı rolunu qeyd etmişlər. Naxçıvan görüşündən sonra bütün sahələrdə olduğu kimi, gömrük işi sahəsində də qarşılıqlı münasibətlər və əməkdaşlıq əlaqələri genişləndirilmişdir.

Türkdilli dövlətlərin gömrük xidməti rəhbərlərinin Naxçıvanda bir araya gəlməsi Türkdilli Dövlətlərin Əməkdaşlıq Şurası çərçivəsində bu formatda keçirilən ilk görüş kimi də tarixə düşdü. Görüşdə Qazaxıstan Respublikası Maliyyə Nazirliyi Gömrük Nəzarəti Komitəsi sədrinin müavini İqor Ten, Qırğız Respublikası Höküməti yanında Dövlət Gömrük Xidməti sədrinin birinci müavini Zamirbek Malabekov, Türkiyə Respublikası Gömrük və Ticarət nazirinin müavini Ziya Altunyıldız və onların rəhbərlik etdikləri nümayəndə heyətləri iştirak edirdilər.

Naxçıvan şəhərindəki Duzdağ Otelində baş tutan görüşü Azərbaycan Respublikası Dövlət Gömrük Komitəsinin sədri Aydın Əliyev açdı. Naxçıvan Muxtar Respublikası Ali Məclisi sədrinin birinci müavini Azər Zeynalov çıxış edərək qonaqları Ali Məclisin Sədri adından salamladı, onları Naxçıvanda görməkdən məmnun olduğunu ifadə etdi.

Daha sonra görüşdə türkdilli ölkələr ticarət və sərhəddən keçmə prosedurlarının sadələşdirilməsi ilə bağlı öz layihələrinin təqdimatını keçirdilər. Qazaxıstan gömrük xidməti tranzit potensialın inkişaf etdirilməsini nəzərdə tutan "Silk Wind" layihəsini, Azərbaycan "Bir pəncərə prinsipi"ni, Qırğız Respublikası gömrük xidməti "İnformasiya texnologiyaları", Türkiyə isə "İpək Yolu" təşəbbüsü - "Karvansaray layihəsi"ni təqdim etdi. Təqdim olunmuş layihələr üzrə Türkdilli dövlətlərin töhfə və dəstəyinə dair fikir mübadiləsi aparıldı.

Görüş çərçivəsində İpək yolu ölkələri arasında ticarət əlaqələrinin genişləndirilməsi və gömrük prosedurlarının sadələşdirilməsi işində gömrük orqanlarının rolu mövzusunda V forum da baş tutdu. Bu istiqamətdə gələcək fəaliyyət planı müəyyənləşdirildi.

Azərbaycan gömrük xidməti rəhbəri "Türkdilli Dövlətlərin Əməkdaşlıq Şurasının yaradılması haqqında" Naxçıvan sazişində beynəlxalq terrorizm, separatçılıq, ekstremizm, insan alveri və narkobiznesə qarşı mübarizədə fəaliyyətin əlaqələndirilməsi, həmçinin narkotik vasitələrin və psixotrop maddələrin qanunsuz dövriyyəsinə nəzarət üzrə beynəlxalq siyasətə yardım göstərilməsi kimi məsələlərin də yer aldığını nəzərə alaraq gömrük hüquqpozmalarına qarşı fəaliyyət sahəsində əməkdaşlıq təşəbbüsü ilə çıxış etdi. Bu məqsədlə narkotik vasitələrin qanunsuz dövriyyəsi ilə mübarizə üzrə layihə təqdim olundu. Qaçaqmalçılıq və gömrük sahəsində digər hüquqpozmalara qarşı mübarizə çərçivəsində dövlətlər arasında mümkün birgə əməliyyat və təşəbbüslərə dair rəy və təkliflər dəyərləndirildi.

Görüşdə təlim və texniki yardım sahəsində əməkdaşlıq məsələləri də müzakirə olundu. Gömrük laboratoriyaları, həmçinin gömrük tarifi, malın mənşə ölkəsi və sair kimi texniki gömrük məsələləri üzrə tədris proqramlarının həyata keçirilməsi üçün məsləhətləşmələr aparıldı.

Gömrük xidmətləri ilə Türkdilli Dövlətlərin Əməkdaşlıq Şurası arasında əlaqələrin genişləndirilməsi, inkişafı və şaxələndirilməsi məqsədilə Gömrük Ekspert Qrupu yaradıldı.

Görüşdə Türkdilli dövlətlərin gömrük xidməti rəhbərləri tərəfindən "Naxçıvan bəyannaməsi" imzalandı. Həmçinin Türkdilli dövlətlərin gömrük xidməti rəhbərlərinin gələn ilin sentyabr ayında Türkiyənin İstanbul şəhərində ikinci görüşünün keçirilməsi qərara alındı.

Görüş başa çatdıqdan sonra qonaqlar Naxçıvanın tarixi və görməli yerlərini ziyarət etdilər.

Elxan MƏMMƏDOV

Azərbaycan.-2012.- 6 oktyabr.- S.7.