Kiyevdə MDB-yə üzv
dövlətlərin baş
prokurorlarının Əlaqələndirmə Şurasının iclasında ermənilərin
növbəti təxribatının qarşısı
alınmışdır
Oktyabrın
2-də Kiyev şəhərində MDB-yə üzv dövlətlərin
baş prokurorlarının Əlaqələndirmə
Şurasının növbəti iclası keçirilmişdir.
Baş Prokurorluğun mətbuat xidmətindən
AzərTAc-a bildirmişlər ki, tədbirdə cinayətkarlığa
qarşı mübarizədə birgə tədbirlərə
dair dövlətlərarası əməkdaşlıq, insan
alverinə, terrorçuluğa və ekstremizmin digər
zorakı təzahürlərinə, habelə narkotik vasitələr,
psixotrop maddələr və onların prekursorlarının
qanunsuz dövriyyəsinə qarşı mübarizə,
qanunsuz miqrasiya və gündəlikdəki digər məsələlər
müzakirə edilmişdir.
İclasda Ermənistan nümayəndə
heyəti Azərbaycan ordusunun zabiti Ramil Səfərovun ölkəmizə
verilməsinin qeyri-legitimliyi barədə tədbirin protokol
qaydalarına zidd olan siyasi bəyanatla çıxış edərək
şura tərəfindən müvafiq qətnamənin qəbul
olunması barədə məsələ
qaldırmışdır.
Azərbaycan Respublikası baş
prokurorunun müavini Namiq Əsgərov tədbirdə
çıxış edərək, Ermənistan nümayəndə
heyəti tərəfindən qaldırılan məsələnin
tam əsassız olduğunu, Ramil Səfərovun Azərbaycana
verilməsinin "Məhkum olunmuş şəxslərin
verilməsi haqqında" Avropa Konvensiyası əsasında
həyata keçirildiyini və ölkə Konstitusiyasının
109-cu maddəsinə uyğun olaraq Azərbaycan
Respublikasının Prezidenti tərəfindən qanunvericiliyə
və beynəlxalq normalara müvafiq qaydada əfv
olunduğunu bildirmişdir.
Namiq Əsgərov daha sonra Ermənistan
tərəfindən həyata keçirilən
işğalçılıq və etnik təmizləmə
siyasəti nəticəsində Azərbaycan
torpaqlarının 20 faizdən çoxunun 20 ildən artıq
müddət ərzində işğal altında
saxlanıldığını, minlərlə dinc və
günahsız azərbaycanlının zorakılıqla qətlə
yetirildiyini, işğal nəticəsində 1 milyona yaxın
insanın doğma yurdlarından qaçqın və məcburi
köçkün vəziyyətinə
düşdüyünü tədbir
iştirakçılarının diqqətinə
çatdırmış, Ermənistan nümayəndə heyətinin
qətnamə layihəsinə qarşı
çıxmışdır.
MDB-yə üzv dövlətlərin
baş prokurorlarının Əlaqələndirmə
Şurası tərəfindən Ermənistan nümayəndə
heyətinin təklifi rədd edilmiş və həmin məsələ
üzrə hər hansı bir müzakirə
aparılmamışdır.
Azərbaycan.-2012.-
7 oktyabr.- S.2.