Böyük sənətkar Müslüm Maqomayevin 70 illik yubileyi böyük təntənə ilə qeyd edilmişdir

Oktyabrın 7-də Heydər Əliyev adına sarayda böyük sənətkar, SSRİ və Azərbaycanın xalq artisti, "Şöhrət" və "İstiqlal" ordenli Müslüm Maqomayevin 70 illik yubileyi böyük təntənə ilə qeyd edilmişdir.

AzərTAc xəbər verir ki, "Sən mənim melodiyamsan. Görkəmli müğənniyə həsr olunur..." adlı konsertdən əvvəl tədbir iştirakçıları sarayın foyesində Müslüm Maqomayevin həyat və yaradıcılığını əks etdirən fotoşəkillərdən ibarət sərgi ilə tanış olmuşlar.

Dövlət və hökumət rəsmilərinin, Azərbaycan və Rusiyanın tanınmış sənətkarlarının, mədəniyyət və incəsənət xadimlərinin, musiqisevərlərin iştirak etdiyi təntənəli tədbir Üzeyir Hacıbəyli adına Azərbaycan Dövlət Simfonik Orkestrinin ifasında bəstəkar Müslüm Maqomayevin "Şah İsmayıl" operasından uvertüra ilə başlanmışdır. Həmçinin müğənni Müslüm Maqomayevin ifasında Aslan şahın ariyasının videoyazısı tamaşaçılara nümayiş etdirilmişdir.

Tədbirin aparıcıları - Rusiyanın xalq artisti Svyatoslav Belza və teleaparıcı Leyla Quliyeva iştirakçıları, həmçinin Müslüm Maqomayevin həyat yoldaşı, SSRİ xalq artisti Tamara Sinyavskayanı salamlamışlar.

Mədəniyyət və turizm naziri Əbülfəs Qarayev Azərbaycan Respublikasının Prezidenti İlham Əliyevin tədbir iştirakçılarına ünvanladığı məktubu oxumuşdur. Nazir bildirmişdir ki, Müslüm Maqomayevin 70 illik yubileyinin dövlət səviyyəsində qeyd edilməsi ilə bağlı Prezident İlham Əliyevin imzaladığı sərəncama əsasən, görkəmli müğənni və bəstəkarın xatirəsinə həsr olunmuş konsertlər, tədbirlər, sərgilər keçirilmişdir. Belə tədbirlərin birində onun həyat yoldaşı, SSRİ xalq artisti Tamara Sinyavskayanın iştirakından çox şadıq. Nazir qeyd etmişdir ki, Müslüm həmişə bizim ürəyimizdə yaşayacaqdır. Onun "Azərbaycan" mahnısı səslənəndə gənclərdə vətənpərvərlik hissləri oyanır. Çünki bu musiqi vətənpərvərlik hissini doğurur və gücləndirir, necə ki, Müslümün özündə də bu xüsusiyyətlər çox güclü idi. Bugünkü tədbir nəinki onun xatirəsinin anılması, həm də dahi sənətkarın bizimlə növbəti mənəvi görüşüdür.

Konsertdə Azərbaycan və Rusiyanın görkəmli sənətkarlarının ifasında musiqi nömrələri və Müslüm Maqomayevin repertuarından əsərlər səsləndirilmişdir.

Tanınmış müğənni və bəstəkar Emin Ağalarov uşaqlıq çağlarından bu böyük sənətkarı tanımaq və onunla bir səhnədə oxumaq şərəfinə nail olduğunu demiş və onun repertuarından mahnı ifa etmişdir.

Həmçinin Azərbaycanın "Eurovision-2012" mahnı müsabiqəsindəki təmsilçisi Səbinə Babayevanın, tanınmış Rusiya müğənnisi, SSRİ xalq artisti İosif Kobzonun, Rusiyanın xalq artisti Larisa Dolinanın, Azərbaycan və SSRİ xalq artistləri Fidan və Xuraman Qasımova bacılarının və başqalarının ifaları alqışlarla qarşılanmışdır.

Sonda sənətkarın həyat yoldaşı, SSRİ xalq artisti Tamara Sinyavskaya çıxış edərək Müslüm Maqomayevlə 40 il bundan öncə tanış olduğunu, o vaxtdan etibarən Müslümü və Azərbaycanı sevdiyini bildirərək tədbirin təşkil edilməsinə görə təşəkkürünü bildirmişdir.

Azərbaycan.-2012.- 9 oktyabr.- S. 12.