Bakıda yeni qalereya - Azərbaycanda ilk Müasir İncəsənət «YAY!» qalereyası açılmışdır

Oktyabrın 9-da İçərişəhərdə tikintisi yenicə qurtarmış və bundan sonra rəssamların incəsənət eksperimentlərinin daimi səhnəsi olacaq "YAY!" qalereyasının açılış mərasimi keçirilmişdir.

AzərTAc xəbər verir ki, qədim İçərişəhərin mərkəzində fəaliyyətə başlayacaq "YAY!" qalereyası üç gənc rəssamın - Faiq Əhmədin, Fərid Rəsulovun və Elşən İbrahimovun əsərləri nümayiş olunacaq sərgi ilə birgə açılmışdır.

Paytaxtın mədəni həyatında öz parlaq izini qoymuş "YARAT!" Müasir İncəsənət Məkanının həyata keçirdiyi layihələr artıq Bakı sakinlərinə tanışdır.

"YARAT!" Müasir İncəsənət Məkanı kimi Aidə Mahmudovanın təşəbbüsü ilə yaradılan "YAY!" qalereyası da qarşısına müasir Azərbaycan incəsənətini tam və maraqlı şəkildə təqdim, habelə bakılıları dünya incəsənətində peyda olan yeni cərəyanlar və adlarla tanış etmək məqsədini qoymuşdur.

Əminliklə demək olar ki, "YAY!" qalereyası və "YARAT!" Müasir İncəsənət Məkanı bir-birinin fəaliyyətini tamamlamaq və gücləndirməklə səmərəli fəaliyyət göstərən tandem yaradacaqlar. Məsələn, "YAY!" qalereyası "YARAT!" Müasir İncəsənət Məkanının reallaşdırdığı təşəbbüsləri maliyyə və texniki cəhətdən dəstəkləyəcək, "YARAT!" Müasir İncəsənət Məkanı isə əvvəlki kimi, gələcək sərgilərin də konsepsiyasının təməlini təşkil edəcək ideyaların və istedadların mənbəyi kimi çıxış edəcəkdir.

"YAY!" qalereyasının təşkil edəcəyi birinci sərginin mövzusu "Azərbaycan xalçası"dır: ənənəvi və qeyri-adi, yenidən dərk edilmiş, yeniləşdirilmiş və çağdaş zamanın çərçivələrinə sığan xalçalar. Müasir rəqəmsal dünyada xalça artıq sadəcə məişətin, rahatlığın və sabitliyin ayrılmaz elementi kimi qəbul edilmir. Bəzi insanların imtina etdiyi, digərləri tərəfindən isə göz bəbəyi kimi qorunan xalça yenə də rəssamlar üçün ilham mənbəyi rolunu oynaya və tamamilə gözlənilməz sınaqların təməlini təşkil edə bilər. Piksellərə bölünmüş və divardan "süzülən" xalça S.Dalinin məşhur "Maye saat" əsərinə bənzəyir. Üçölçülü xalça sanki bir çox elementlərdən "pazzl" şəklində yığılıb və tanınmış "tetris" oyununun sürətlə hərəkət edən fiqurlarını təqlid edir. Sərgiyə təşrif buyuran hər kəsin öz "pazzl"ı vardır.

Konkret vəziyyətdə iştirakçıların sayı üçdür... Azərbaycan Dövlət Rəssamlıq Akademiyasının məzunu, 52-ci Venesiya Biennalesinin iştirakçısı Faiq Əhməd Azərbaycan xalçasının formasını və qədimi naxışlarını dəyişikliklərə məruz qoyaraq, vərdiş etdiyimiz xalça quruluşundan kənara çıxır. Onun yaratdığı əsərlərdə canlı, yumşaq və elastik struktur olan yun solğun plastiklə bir yerdə mövcuddur. Faiq Əhmədin əsərləri artıq bu il "Art Dubay" müasir incəsənət yarmarkasında nümayiş etdirilərək tənqidçilər və mütəxəssislər tərəfindən yüksək qiymətləndirilmişdir.

Azərbaycanı Venesiya Biennalesində təmsil edən rəssam Fərid Rəsulov nəfis qərbsayağı interyerləri Şərq xalçalarını çulğayan özünəməxsus fotoprintlər yaradır. Bu cah-cəlalın içində alüminiumdan və orqanik şüşədən yaradılmış heyvan obrazları peyda olur. Bu obrazlar Şərq mədəniyyətinin də Qərb mədəniyyəti kimi köklərindən ayrıldığını və ana təbiətlə bütün bağlarını qopardığını sübut edir.

Elşən İbrahimov isə xalça şəklinin əsasında yaradılan kompyuter oyununu tamaşaçılara təqdim edir. Onun "Xalça oyunları" yekrəng və möhtəşəm ünsürlərin vəhdətidir, habelə XXI əsrdə yaşayan yeniyetmənin rəqəmsal təfəkkürünü və xalqın qədim ənənələrini əks etdirir. Rəssamın təfsirlərinə əsasən, artıq evimizin divarlarını bəzəməyən xalça tam yeni bir keyfiyyətdə mənzilimizə qayıtmağa layiqdir.

Sərgidə iştirak edən bütün müəllifləri Azərbaycan xalçasına yeni ömür bəxş etmək istəyi və zamanın çağırışına cavab olaraq mədəniyyətin dəyişmək və təkamül qabiliyyətini isbat etmək arzusu birləşdirir. Müəlliflər tərəfindən göstərilən bu səylər, xüsusilə, naxışların, demək olar ki, ən mühafizəkar və çətinliklə dəyişən elementi olan xalça naxışlarının fonunda daha da canlı və maraqlı görünür.

Sərgi noyabrın 11-dək davam edəcəkdir.

Azərbaycan.-2012.- 10 oktyabr.- S. 10.