Prezident İlham Əliyev yeni dövr xarici siyasətin konseptual əsaslarını müəyyənləşdirdi

Azərbaycan Respublikası müstəqilliyini bərpa etdikdən sonra dövlət quruculuğunun bütün sahələrində olduğu kimi, xarici siyasətdə də çətin, lakin şərəfli bir yol qət edilmişdir. Keçən dövr ərzində Azərbaycan beynəlxalq aləmdən təcrid edilmiş, erməni lobbisinin səyləri hesabına dünya informasiya məkanında blokadaya alınmış bir vəziyyətdən regional təşəbbüskar və lider səviyyəsinə yüksəlməyə nail olmuşdur. Azərbaycanın xarici siyasətinin fundamental prinsiplərini böyük uzaqgörənliklə ulu öndər Heydər Əliyev formalaşdırmışdır.

Heydər Əliyevin təməlini qoyduğu xarici siyasət strategiyası müstəqil Azərbaycanın qurtuluşuna, gələcək inkişaf strategiyasının müəyyənləşdirilməsinə yönəlmişdi. İlkin mərhələdə Azərbaycanın beynəlxalq aləmdə təcrid vəziyyətindən çıxarılması, tarazlaşdırılmış xarici siyasət xətti, dünya iqtisadiyyatına və Avratlantik məkana inteqrasiya, dünya azərbaycanlılarının təşkilatlanıb mütəşəkkil fəaliyyət göstərməsi, sonrakı mərhələdə isə regionun iqtisadi mərkəzlərindən birinə, qlobal arenada söz sahibinə çevrilməsi bu strategiyanın konseptual əsaslarını təşkil edir.

Balanslaşdırılmış xarici siyasət, çoxvektorlu əməkdaşlıq, bərabərhüquqlu tərəfdaşlıq və milli maraqlar əsasında müstəqil siyasət prinsiplərinə söykənən praqmatik siyasi kurs Heydər Əliyev dühasının dövlətçiliyimizin xarici siyasət konsepsiyasına gətirdiyi amillərdir. Bu gün də Prezident İlham Əliyev həmin ənənələri uğurla davam etdirərək Azərbaycanın mövqeyini beynəlxalq müstəvidə daha da möhkəmləndirmiş, yeni bir mərhələyə yüksəltmişdir. Qısa müddətdə əldə etdiyi mühüm layihələr, qazandığı böyük imic, mövcud siyasi iradə Prezident İlham Əliyevin müstəqil siyasət aparmasına imkan verir. Artıq Azərbaycan qlobal siyasi səhnədə adi iştirakçı deyil, regional əhəmiyyətli böyük layihələrin təşəbbüskarı və tərəfdaşı, beynəlxalq aləmdə nüfuzu ilə seçilən ölkədir. BMT Təhlükəsizlik Şurasına üzv seçilməklə Azərbaycan xüsusi çəkiyə malik dövlət olduğunu bir daha sübut etdi.

Azərbaycanın coğrafi, geosiyasi mövqeyi, eləcə də mövcud iqtisadi vəziyyəti və potensialı onun xarici siyasətinin müəyyənləşdirilməsində başlıca rol oynayır. Tarixən müxtəlif sivilizasiyaların, mədəniyyətlərin, dinlərin kəsişməsində yerləşən Azərbaycan Şərqlə Qərbi, Şimalla Cənubu birləşdirən, Avrasiya məkanında yeni kommunikasiyaların, nəqliyyat və enerji dəhlizlərinin üzərində qovşaq ölkə kimi regionda böyük nüfuza malikdir. Bu gün Azərbaycan müstəqil xarici siyasət yürüdür və heç bir xarici dövlətin onun daxili işlərinə qarışmasına imkan vermir. Respublikamız etibarlı tərəfdaşdır, bütün ölkələrlə uğurla əməkdaşlıq edir, öz müttəfiqləri ilə bərabər regional təşəbbüslərlə çıxış edir.

Azərbaycanın beynəlxalq aləmdə artan nüfuzu 2012-ci ildə özünü daha parlaq göstərməkdədir. Artıq Azərbaycan nəinki region, hətta qlobal əhəmiyyətli çağırış və təhdidlərlə bağlı dünya siyasi arxitekturasında nəzərə alınan dövlətə çevrilmişdir. Prezident İlham Əliyev bu ilin yanvar ayında ənənəvi olaraq keçirilən, dünyanın iqtisadi gələcəyinin müzakirə olunduğu Davos Dünya İqtisadi Forumunda və fevralda təhlükəsizlik problemlərinə həsr olunan 48-ci Münhen Təhlükəsizlik Konfransında iştirak etmişdir. Respublikamız fevral ayında Meksikada keçirilən Böyük 20-lik ölkələrinin tədbirində, mart ayında Koreya Respublikasının paytaxtı Seul şəhərində təşkil olunan Nüvə təhlükəsizliyi üzrə Zirvə Toplantısında uğurla təmsil olunmuşdur. Bütün bunlar dünyada Azərbaycanın artan nüfuzunun göstəricilərindəndir.

Azərbaycan son dövrlərdə bir sıra beynəlxalq təşəbbüslərin müəllifi olaraq çıxış edir. Prezident İlham Əliyevin sərəncamına uyğun olaraq, 2011-ci ildən başlayaraq hər iki ildən bir Bakıda "Ümumdünya Mədəniyyətlərarası Dialoq Forumu" keçirilir. Azərbaycan "Beynəlxalq Humanitar Forum" kimi mötəbər bir platformanın təşəbbüskarıdır. Bakı şəhəri islam mədəni irsinin daşıyıcısı olaraq 2009-cu ildə "İslam mədəniyyətinin paytaxtı" olmuşdur. 2012-ci ildə "Eurovision" mahnı müsabiqəsi özünün böyük möhtəşəmliyi ilə Bakıda təqdim olunmuşdur. Bütün bunlar dünyanın siyasi arxitekturasında Azərbaycanın yeni mövqelərini müəyyənləşdirir. BMT Təhlükəsizlik Şurasının üzvü olan Azərbaycan Cənubi Qafqaz regionunda lider dövlət kimi beynəlxalq birliyin çağırışlarına fəal qoşulur, dünyada ədalətli münasibətlərin tərəfdarıdır, beynəlxalq səviyyədə gedən proseslərdə söz sahibidir.

Sentyabr ayının 21-də keçirilən Azərbaycan Respublikasının diplomatik xidmət orqanlarının rəhbərlərinin dördüncü müşavirəsində Azərbaycanın yeni geosiyasi şəraitdə xarici siyasəti ilə bağlı Azərbaycan Respublikasının Prezidenti İlham Əliyev proqram-konsepsiya xarakterli çıxış etmişdir. Dövlət başçısı nitqində, ilk növbədə, müəyyən edilmiş strateji siyasi kursun davam etdirildiyini bildirmişdir: "Strateji xəttimiz dəyişməz olaraq qalır. Azərbaycanın xarici siyasətinin istiqamətlərini ulu öndər Heydər Əliyev müəyyən etmişdir. Bu gün bu sahədə və bütün başqa sahələrdə strateji xətt icra edilir".

Üçüncü minillikdə beynəlxalq münasibətlər sistemində baş verən proseslərin öz intensivliyi və gözlənilməzliyi ilə səciyyələndiyini nəzərə alsaq, Azərbaycanın dövlət başçısının xarici siyasətdəki sabit mövqeyi onun uzaqgörənliyini bir daha təsdiq edir.

Ümumiyyətlə, Prezident İlham Əliyevin xarici siyasət müşavirəsində çıxışı xarici siyasətimizin qarşısında duran vəzifələr, dünyada və regionda baş verən hadisələrin işığında hazırkı tendensiyalar və müvafiq çağırışlar, strateji məqsədlər və yeni hədəflərin müəyyənləşdirilməsi baxımından konseptual əhəmiyyət kəsb edir.

Azərbaycan üçün əsas taleyüklü vəzifə Ermənistan-Azərbaycan, Dağlıq Qarabağ münaqişəsinin həllidir. Ölkəmizin bütün diplomatik arsenalı da həmin mühüm məsələnin həllinə yönəlmişdir. Prezident İlham Əliyev çıxışında bu məsələ ilə bağlı Azərbaycanın mövqeyi, diplomatiyamızın taktiki gedişləri, eləcə də beynəlxalq müstəvidə yanaşma, qlobal məkanda baş verən dəyişikliklərin təzahürü, mövcud proses və tendensiyalar haqqında müfəssəl proqram ortaya qoymuş oldu. Bundan əlavə, münaqişənin həlli yolu ilə bağlı da Ermənistan rəhbərliyinə aydın mesajlar göndərildi.

Beynəlxalq münasibətlər sistemində baş verən mövcud proseslər, eləcə də beynəlxalq hüququn icra mexanizminin yaratdığı ikili standartlar qlobal məkanda isti münaqişə ocaqlarının qalmasını şərtləndirir. Reallıq onu göstərir ki, istər sivilizasiya, istər dini təəssübkeşlik və ya müstəqil dövlətlə forpost dövlətə fərqli yanaşma ədalət prinsiplərini üstələdikcə dünyada sülh və təhlükəsizlik tam bərqərar ola bilməyəcəkdir. Hətta günümüzdə qlobal trend olaraq görünən müxtəlif "fobiya"ların da ayrı-ayrı fundamentalistlərin təhlükəli çağırışlarına rəvac verdiyini bildirmək lazımdır. Bu gün dünyada mədəniyyətlərin, sivilizasiyaların dialoquna mane olan ən mühüm amil ədalət anlayışının gözlənilməməsi, ikili standartlardır. Beynəlxalq hüquq normaları yalnız qlobal güclərin iradəsinə uyğun tətbiq olunur. Ermənistan-Azərbaycan, Dağlıq Qarabağ münaqişəsinin öz ədalətli həllini tapmamasında bu faktor böyük rol oynayır. Dünyada mövcud olan oxşar münaqişələrə böyük dövlətlərin geosiyasi maraqlarından asılı olaraq fərqli yanaşma böyük narazılıq doğuran məqamlardır. Görünən odur ki, beynəlxalq hüququn prinsipləri yalnız xüsusi maraqlara xidmət lazım olanda tətbiq olunur. Beləliklə, beynəlxalq münasibətlər sisteminin tənzimlənməsində fərqli yanaşma artıq zamanın tələbidir.

Hazırda dünyada mövcud beynəlxalq sistemin, o cümlədən BMT-nin qərarlarının icra mexanizminin və ümumilikdə fəaliyyətinin yeni reallıqlara və ədalətli yanaşmaya tam cavab verməməsi ilə bağlı geniş müzakirələr aparılır. Azərbaycan mövcud beynəlxalq hüququn icra mexanizminin işlək olmamasının və bununla bağlı dünyada ayrı-ayrı problemlərə ikili yanaşmanın birbaşa nəticələri ilə qarşı-qarşıyadır. Azərbaycan Respublikası beynəlxalq münasibətlər sistemində ədalət prinsipini imperativ norma olaraq görür. BMT Təhlükəsizlik Şurasına qeyri-daimi üzv seçilən Azərbaycan bu mötəbər tribunadan "dünya nizamı və ədalət" şüarı ilə çıxış edir. Azərbaycan Prezidenti bu məqamı da xüsusi vurğulayaraq bildirdi ki, "Biz Təhlükəsizlik Şurasına üzv seçilən zaman mən demişəm ki, ədaləti, beynəlxalq hüququ müdafiə edəcəyik və ilk günlərdən bu prinsiplərə sadiqik".

Prezident İlham Əliyev münaqişə ilə əlaqədar regionda son vəziyyət və mümkün həll yolu ilə bağlı mövqeyini dünya ictimaiyyətinə çatdırmış oldu. Hazırda Azərbaycanın tarixi, hüquqi, iqtisadi, demoqrafik mövqeyi möhkəmdir. Bütün bu amillər Azərbaycana Ermənistanla mübarizədə böyük üstünlük verir. Ermənilər isə yeganə arqument olaraq yalnız dünyada öz lobbi qurumlarının yalanlarına arxalanırlar. İldən-ilə güclənməkdə olan Azərbaycan isə ardıcıl olaraq bu yalan və əfsanələri ifşa edərək dünya ictimaiyyətin çatdırır. Artıq Ermənistan üçün həlqə daralır. Dünyada baş verən proseslər göstərir ki, nəticədə heç bir dövlət destruktiv siyasətlə nəyəsə nail ola bilməyəcəkdir. Kimlərinsə maraqlarına xidmət etməklə əbədi toxunulmazlıq statusu almaq mümkün deyil. Prezident dünyada baş verən hadisələrin fonunda Ermənistana açıq mesaj göndərmiş oldu: "Dünya dəyişir, bölgədə gedən proseslər sizə bəllidir. İstisna edilmir ki, vaxt gələcək və hər bir ölkə təkbaşına öz maraqlarını müdafiə etmək zorunda qalacaqdır. Azərbaycan buna hazırdır".

Bütün qonşularına qarşı ərazi iddiaları Ermənistanı özünütəcrid vəziyyətinə gətirib çıxarmışdır. Dənizdən-dənizə "böyük Ermənistan" yaradılması xəstəliyinə tutulan Ermənistan respublikasının rəsmi xarici siyasət doktrinasında bu, ən böyük məqsəddir. Tarixi Azərbaycan torpaqlarında qurulmuş Ermənistanın öz qonşularına - Türkiyə, Gürcüstan və Azərbaycana qarşı ərazi iddialarının əsasında da həmin ideya dayanır. Beləliklə, qeyd olunan bu amil Qafqazın geosiyasi mühitini şərtləndirən əsas faktordur. Regionun sabitliyi, gələcəyi, regional əməkdaşlıq, perspektiv inteqrasiya prosesləri ermənilərin əsassız xülyaları ilə tərs-mütənasibdir.

Ermənistanın regionda sabitliyi pozan fəaliyyətinin müqabilində Azərbaycanın növbəti taktiki gedişlərinin necə olacağı da xarici siyasət müşavirəsində səsləndirildi. Azərbaycan, ilk növbədə, münaqişənin dondurulmuş vəziyyətdə saxlanılması ilə razılaşmır! İkincisi, münaqişənin sülh yolu ilə həll olunmasına tərəfdar olsaq belə, nəyin bahasına olsa da, sülh olsun yanaşması da qəbuledilməzdir! Bu prizmadan çıxış edərək iqtisadiyyatı gündən-günə güclənən, beynəlxalq aləmdə çəkisi artan Azərbaycan öz üstün mövqelərindən münaqişənin həlli üçün siyasi təzyiq vasitəsi kimi istifadə etməkdə davam edəcəkdir. Regionda nəhəng layihələrin təşəbbüskarı olan Azərbaycan Ermənistanı regional məsələlərdən uzaq tutmağa nail olmuşdur. Müəyyən olunmuş strateji kurs bundan ibarətdir ki, təcridetmə siyasəti davam etdirilməlidir.

Prezident Azərbaycanın yeritdiyi xarici siyasətin əsas prinsiplərini bəyan etdi. Beynəlxalq arenada, istər ikitərəfli, istər çoxtərəfli formatda əməkdaşlıq bərabərhüquqlu münasibətlər üzərində qurulmalıdır. Azərbaycan beynəlxalq münasibətlər sistemində bütün dövlətlərlə münasibətlərində qarşılıqlı hörmət, qarşılıqlı maraqlar və bir-birinin daxili işlərinə qarışmamaq prinsiplərinə sadiqdir.

Bu gün dünya miqyasında bir çox beynəlxalq təşkilatların öz funksiyalarına aid olmayan məsələlərlə bağlı dövlətlərə müxtəlif formalarda təzyiq göstərmələri müşahidə olunur. Məhz buna görədir ki, hətta iqtisadi, humanitar, mədəni və digər istiqamətli təşkilatlar belə siyasiləşmişdir. Bu trend beynəlxalq münasibətlərdə arzuolunmaz presedentlər yaradır. Hətta bəzən elə beynəlxalq təşkilatlara rast gəlirik ki, üzvü olmayan ölkələrə qarşı da müxtəlif tələblərlə çıxış edirlər. Bütün bunlar isə beynəlxalq hüququn əsas norması olan ədalət prinsipinin pozulmasına gətirib çıxarır. Prezident İlham Əliyev çıxışında bu məqama xüsusi toxunmuşdur: "Biz üzv olduğumuz bütün təşkilatlarda fəal iştirak edirik, maraqlarımızı qoruyuruq və götürdüyümüz öhdəlikləri yerinə yetiririk. Üzv olmadığımız təşkilatlar qarşısında bizim heç bir öhdəliyimiz ola bilməz".

Prezident diplomatik korpus qarşısında qısa dövr və uzunmüddətli perspektiv üçün konkret vəzifələr qoydu. Birinci istiqaməti, ikitərəfli əlaqələrdə Yeni Qitələrə Çıxış strategiyası adlandırmaq olar. Çünki Azərbaycanın əməkdaşlıq etdiyi ölkələrin əhatə dairəsinin genişləndirilməsi üçün indiyə qədər çox da intensiv əlaqələrimizin olmadığı ölkələr hədəf götürülmüşdür. Xüsusilə də BMT Təhlükəsizlik Şurasındakı səsvermədə bizi dəstəkləyən 155 ölkə ilə daha fəal əlaqələr qurmaq nəzərdə tutulur. Bu isə ilk növbədə, Latın Amerikası, Okeaniya, Mərkəzi və Cənubi Afrika ölkələri ola bilər. Qeyd etməliyik ki, son ildə Argentina, Braziliya, Uruqvay, Çili, Peru kimi Latın Amerikası ölkələri ilə intensiv əlaqələr yaradılmışdır. Artıq bu regionun 3 ölkəsində Azərbaycanın səfirliyi fəaliyyət göstərir. Meksika və Kolumbiya parlamentlərində isə hətta Xocalı soyqırımının tanıdılması ilə bağlı qətnamə qəbul edilməsinə nail olmuşuq. CAR-da fəaliyyətə başlayan, Avstraliyada isə yenicə təsis olunan səfirliklər də Yeni Qitələrə Çıxış strategiyasının yerinə yetirilməsinə hesablanmışdır.

Növbəti istiqamət Okeaniya olmalıdır. Bu regionda yerləşən kiçik dövlətlərin bəzən siyasi oyunlara cəlb olunduğunu nəzərə alaraq qabaqlayıcı tədbirlər görülməsi lazımdır. Xüsusən də Nauru dövlətinin Abxaziya və Cənubi Osetiyanı müstəqil dövlət kimi tanıması presedenti yaxşı heç nə vəd etmir. Nauru nümunəsi ilə bağlı demək olar ki, beynəlxalq müstəvidə heç bir xüsusi çəkisi olmayan, lakin BMT üzvü kimi müstəqil dövlət olaraq bu kimi kiçik ölkələr hər hansı maraq müqabilində müstəqilliyi tanıma praktikasına yer verə bilərlər. Buna görə də növbəti illərdə Azərbaycan öz xarici siyasətində həmin regiona diqqəti artırmalıdır. Regionda ikitərəfli əlaqələrlə yanaşı, çoxtərəfli formatda da əməkdaşlıq müsbət nəticə verə bilər. Mənzil-qərargahı Ficidə yerləşən Sakit Okean Adaları Forumunun region ölkələrinin mövqeyinə təsir etmək imkanları nəzərə alınmalıdır.

Azərbaycan Respublikasının Prezidenti İlham Əliyevin müşavirədə dərin məzmunlu çıxışı göstərir ki, ölkəmiz yaxın perspektivdə diplomatik münasibətlərinin olmadığı ölkələrə diqqət ayırmalıdır. BMT Təhlükəsizlik Şurasına üzv olan Azərbaycanın bu mötəbər tribunadan qeyd olunan məqsədlə də istifadə etməsi üçün real imkanları vardır. Hələlik diplomatik münasibətlərimizin olmadığı Karib dənizi hövzəsi ölkələrindən Barbados, Okeaniya ölkələrindən Kiribati, Mikroneziya, Palau, Papua Yeni Qvineya, Samoa, Tonqa, Vanuatu, Afrika ölkələrindən Botsvana, Namibiya, Tanzaniya ilə münasibətlərin qurulması Yeni Qitələrə Çıxış strategiyasının tərkib hissəsi ola bilər.

Diplomatik korpusun qarşısına qoyulan vəzifələr arasında ikinci istiqamət Azərbaycan şirkətlərinin xaricdəki fəaliyyətini stimullaşdırmaqdır. İnkişaf etmiş ölkələr daim öz şirkətlərinə başqa ölkələrdə yaxşı vəziyyətin yaradılması üçün səylər göstərirlər. Azərbaycan iqtisadiyyatı artıq yeni səviyyəyə qalxmışdır. Əgər müstəqilliyin ilk illərində respublikamız xaricdən investisiyalar və yardımlar hesabına iqtisadiyyatını dirçəltməyə çalışırdısa, bu gün Azərbaycanda daxili investisiyaların həcmi xarici investisiyaları üstələyir, ölkə iqtisadiyyatının bütün sahələrində müasirləşmə kursu və ixrac təyinatı iqtisadi inkişafa təkan verir, Azərbaycanın dövlət və özəl sektor sərmayəsi xarici ölkə bazarlarında mühüm mövqe qazanmaqdadır. Bu gün Gürcüstanda, Türkiyədə, Ukraynada, Rumıniyada Azərbaycan şirkətləri ən fəal və aparıcı iqtisadi subyektlərdir. Bir sözlə, Azərbaycan artıq resipiyent ölkədən donor ölkəyə çevrilmişdir. Dünyada Azərbaycanın bu imicini qəbul edir və nəzərə alırlar. Xarici siyasətimizdə də iqtisadi diplomatiya mühüm rol oynamalıdır.

Dövlət səviyyəsində irəli sürülən müddəalar göstərir ki, üçüncü istiqamət olaraq səfirliklərin qeyri-hökumət təşkilatları və media qurumları ilə daha fəal əlaqələr qurmasıdır. Burada başlıca məqsəd hazırda Azərbaycanın cəlb olunduğu informasiya müharibəsində ölkəmizin mövqelərinin gücləndirilməsidir. Bu informasiya müharibəsini Azərbaycana qarşı dünya erməniləri və onların havadarları aparırlar. Azərbaycan haqqında yanlış təəssürat oyatmaq, beynəlxalq arenada ölkəmizin imicini korlamaq üçün erməni lobbisi və dünya erməniliyi müxtəlif vasitələrlə beynəlxalq qeyri-hökumət təşkilatları və media qurumlarını ələ almağa çalışırlar və bəzən buna nail də olurlar. Lakin aparılan müşahidələr bu kampaniya və müşahidələr arxasında nələrin dayandığını dərhal görməyə imkan verir. Misal üçün, "Eurovision" mahnı müsabiqəsi ərəfəsində Azərbaycana qarşı kampaniya əslində bir-biri ilə əlaqəsi olan bir qrupun, erməni lobbisinin təşviqi ilə hərəkət edən yalançı demokratiya tərəfdarlarının süni hay-küyü idi. Maraqlıdır ki, hər ölkədə bu missiyanı fərqli adla həyata keçirsələr də, kölgədə dayanan qüvvələr eyni idi. Açıq Cəmiyyət İnstitutu, Karnegi Korporasiyası, "Amnesty International", "Human Rights Watch", "Free Press", Beynəlxalq Böhran Qrupu, "Freedom House", "Sərhədsiz Reportyorlar" eyni mənbədən maliyyələşən qüvvələrdir və bütün bu mətbuat qarayaxmasında erməni lobbisinin izləri var. Buna görə də diplomatik korpus, media orqanları və qeyri-hökumət təşkilatları vahid sistem olaraq informasiya mübarizəsində səylərini birləşdirməlidir.

Beləliklə, Azərbaycan Respublikasının Prezidenti İlham Əliyevin ölkəmizin diplomatik xidmət orqanları rəhbərlərinin müşavirəsindəki dərin məzmunlu, proqram xarakterli çıxışı ölkəmizin yeni dövr xarici siyasətinin konseptual əsaslarını özündə əks etdirir. Hadisələri qabaqlamağa yönəlmiş bu yanaşma Azərbaycan diplomatiyasının qarşısında yeni vəzifələr qoyur və beynəlxalq arenada Azərbaycan üçün böyük perspektivlər açmağa yönəlmişdir. İnkişafın növbəti yüksəliş mərhələsində olan Azərbaycan bu prinsiplərə söykənərək beynəlxalq birlikdə mövqelərini möhkəmləndirmək, dünya erməniliyi ilə informasiya mübarizəsində üstün mövqeyə yiyələnmək, dünyada və regionda baş verən hadisələrə çevik reaksiya vermək, qlobal proses və tendensiyaları əvvəlcədən proqnozlaşdıraraq qabaqlaya bilmək üçün uğurla addımlayır. Azərbaycanın xarici siyasəti dünyanın gedişinə özünün təsirini göstərə bilir.

Ərəstü HƏBİBBƏYLİ,

Azərbaycan Respublikası Prezidentinin

Administrasiyasının Xarici əlaqələr şöbəsinin

Analitik informasiya sektorunun müdiri,

iqtisad elmləri üzrə fəlsəfə doktoru

Azərbaycan.-2012.- 11 oktyabr.- S.6.