Azərbaycanda yaşayan milli azlıqlar və dini icmalar arasında qarşılıqlı hörmət və etimad vardır

Azərbaycanda səfərdə olan ATƏT-in fəaliyyətdə olan sədrinin dözümlülüyün təbliği üzrə şəxsi nümayəndələri xanım Ketrin MakGinnes, Endryu Beyker və Adil Axmetov oktyabrın 9-da ədliyyə nazirinin müavini Toğrul Musayevlə görüşmüşlər.

Ədliyyə nazirliyinin mətbuat xidmətindən AzərTAc-a bildirmişlər ki, ölkəmizdə yüksək tolerantlığın və dözümlülüyün olduğunu qeyd edən nazir müavini mədəniyyətlər və dinlərarası dialoqun gücləndirilməsi baxımından bu günlərdə Bakıda keçirilmiş II Beynəlxalq Humanitar Forumun əhəmiyyətini, bu mötəbər tədbirin açılışında dövlət başçısı İlham Əliyevin müxtəlif dinlərin və xalqların nümayəndələrinin vətəni olan Azərbaycanda əsrlər boyu heç bir ayrı-seçkilik olmadan bir ailə kimi, sülh, əmin-amanlıq, qarşılıqlı anlaşma şəraitində yaşadıqları barədə söylədiklərini xüsusi vurğulamış, milliyyətindən və dinindən asılı olmayaraq, bütün vətəndaşların hüquq və azadlıqlarının bərabərliyinə təminat verən mütərəqqi hüquqi bazanın və müvafiq təsisatların mövcud olduğunu bildirmiş, bu sahədə həyata keçirilən praktiki tədbirlərdən danışmışdır.

Qonaqlar öz missiyaları barədə məlumat verərək bildirmişlər ki, səfərin məqsədi ayrı-seçkiliyə yol verilməməsi, müxtəlif dinlər arasında münasibətlər və s. məsələlərə dair vəziyyəti öyrənməkdir. ATƏT-in nümayəndələri ölkəmizdə olduqları zaman apardıqları müşahidələrin Azərbaycanda millətlərin dinc və sabitlik şəraitində yaşadıqlarını, milli azlıqlar və dini icmalar arasında qarşılıqlı hörmət və etimadın olduğunu söyləməyə əsas verdiyini vurğulamışlar.

Görüşdə həmçinin BMT-nin İrqi ayrı-seçkiliyin ləğv edilməsi üzrə Komitəsinə mütəmadi təqdim olunan BMT-nin eyni adlı Konvensiyası üzrə ölkəmizin dövri məruzələri, habelə insan hüquqlarının etibarlı müdafiəsinə xidmət edən müasir məhkəmə sistemi barədə məlumatlar da qonaqların diqqətinə çatdırılmış, məhkəmə, ədliyyə və digər hüquq-mühafizə orqanlarında müxtəlif millətlərin təmsil olunduğu qeyd edilmiş, maraq kəsb edən suallara aydınlıq gətirilmişdir.

Tədbirdə ATƏT-in Demokratik Təsisatlar və İnsan Hüquqları Bürosunun əməkdaşları iştirak etmişlər. Qonaqlar nazirlikdə Ədliyyə tarixi muzeyi ilə tanış olmuşlar.

Azərbaycan.-2012.- 11 oktyabr.- S.7.