Pakistanın nüfuzlu «Diplomatik Star» jurnalında Azərbaycan-Pakistan diplomatic münasibətlərinin 20 illiyinə dair xüsusi buraxılış hazırlanmışdır

Pakistanın nüfuzlu "Diplomatik Star" jurnalında Azərbaycan-Pakistan diplomatik münasibətlərinin 20 illiyinə həsr olunmuş xüsusi buraxılış dərc edilmişdir.

Azərbaycanın Pakistandakı səfirliyindən AzərTAc-a bildirmişlər ki, buraxılış "Azərbaycan-Pakistan münasibətlərinin xronologiyası" adlı məqalə ilə başlanır. Yazıda 20 il ərzində iki ölkə arasında həyata keçirilmiş rəsmi səfərlərin xronologiyası öz əksini tapmışdır. Buraxılışda Azərbaycan-Pakistan münasibətlərinin baniləri sayılan Azərbaycanın ümummilli lideri Heydər Əliyevin və Pakistanın tanınmış siyasətçisi Benazir Bhuttonun şəkilləri dərc edilmişdir.

Jurnalda Azərbaycan Prezidenti İlham Əliyevin Pakistan Prezidenti Asif Əli Zərdariyə ölkələrimiz arasında diplomatik münasibətlərin 20 illiyi ilə əlaqədar ünvanlanmış məktubları dərc edilmişdir.

"Heydər Əliyev - Azərbaycanın ümummilli lideri" adlı məqalədə ulu öndərin həyat və fəaliyyəti, müstəqil Azərbaycanın yaradılması və dövlətimizin dünya miqyasında özünəməxsus yer tutması istiqamətində aparılmış siyasəti işıqlandırılmışdır.

Azərbaycan Prezidenti İlham Əliyevin fəaliyyətinə həsr edilmiş "İlham Əliyev-Azərbaycanın lideri" sərlövhəli məqalədə isə dövlət başçısının xarici və daxili siyasətdə əldə etdiyi uğurlardan ətraflı məlumat verilir.

Yazıda həmçinin Azərbaycanın neft strategiyasındakı, qeyri-neft sektorunun inkişafından, mədəniyyət və təhsil sahələrinə göstərilən dövlət qayğısından, idmanda əldə etdiyimiz uğurlardan bəhs edilmişdir. Məqalədə Prezident İlham Əliyevin Ermənistan-Azərbaycan, Dağlıq-Qarabağ münaqişəsinin həlli istiqamətində apardığı işlərdən danışılmış, Azərbaycanın BMT Təhlükəsizlik Şurasının qeyri-daimi üzv seçilməsi barədə və xarici siyasətdə əldə etdiyimiz digər uğurlardan ətraflı məlumat verilmişdir.

Məqalədə Azərbaycan-Pakistan əlaqələrinin həyatın bütün istiqamətlərində sürətlə inkişaf etdiyi vurğulanmış, hər iki ölkənin beynəlxalq arenada qarşılıqlı dəstəyi haqqında məlumatlar verilmişdir. Qeyd olunmuşdur ki, Ermənistan-Azərbaycan, Dağlıq Qarabağ məsələsində Azərbaycanın mövqeyini tam dəstəkləyən Pakistan öz parlamentində Xocalı soyqırımını tanıyan və Azərbaycanın ərazi bütövlüyünü dəstəkləyən qətnamə qəbul etmişdir. Bu da Azərbaycan rəhbərliyi və xalqı tərəfindən böyük rəğbətlə qarşılanmışdır.

"Diplomatic Star" jurnalındakı buraxılışın "Mehriban Əliyeva-Heydər Əliyev Fondunun prezidenti" adlı məqaləsində isə Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın Azərbaycanda və xarici ölkələrdə reallaşdırdığı layihələrdən ətraflı məlumat verilmişdir. Məqalənin Heydər Əliyev Fondunun Pakistandakı fəaliyyətinə həsr edilmiş hissəsində Mehriban xanım Əliyevanın təşəbbüsü və dəstəyi ilə bu ölkənin müxtəlif bölgələrində hepatit-B-yə qarşı pulsuz peyvəndləşdirmə proqramının həyata keçirilməsi, səhiyyənin inkişafına edilən maliyyə yardımları, uşaq və ahıllar üçün təşkil edilmiş pulsuz müayinə və açıq ürəkdə cərrahiyyə əməliyyatları, qızlar məktəbinin tikilməsi və sonralar əsaslı şəkildə yenidən qurulması, müqəddəs Ramazan ayında uşaq evlərində iftar süfrələrinin təşkili xüsusi qeyd olunmuşdur.

Buraxılışda Azərbaycanın Pakistandakı səfiri Daşqın Şikarovun ölkələrimiz arasında diplomatik münasibətlərin 20 illiyinə həsr edilmiş müraciəti də dərc olunmuşdur. Yazıda müstəqil Azərbaycanın yaranması tarixi, Azərbaycan ilə Pakistan arasındakı diplomatik əlaqələrin inkişaf mərhələləri, siyasi əməkdaşlığın aspektləri əksini tapmışdır.

Xüsusi buraxılışın tam mətni ilə http://www.diplomaticstar.com/magazine/wp-content/plugins/page-flip-image-gallery/popup.php?book_id=5 linkindən tanış olmaq mümkündür.

Azərbaycan.-2012.- 11 oktyabr.- S.7.