Ötən mövsümün ən yaxşıları mükafatlandırıldı

Dünən futbol üzrə Unibank Premyer Liqasının 2011-2012-ci il mövsümü qaliblərinin mükafatlandırılması mərasimi keçirilmişdir.

Beynəlxalq Muğam Mərkəzində təşkil olunan tədbirdə çıxış edən AFFA-nın prezidenti Rövnəq Abdullayev ölkəmizdə idmanın, o cümlədən futbolun inkişafından, həyata keçirilən tədbirlərdən, yeni layihələrdən danışmış, dövlətin bu sahəyə daim diqqət və qayğı göstərdiyini vurğulamış, ötən mövsümdə futbolçuların oyununu yüksək qiymətləndirmişdir. Bildirmişdir ki, uşaq futbolunun inkişafı, istedadlı idmançıların üzə çıxarılması və futbolun kütləviliyinin təmin olunması qurumun daim diqqət mərkəzindədir.

Sonra İdman Araşdırmaları Mərkəzi tərəfindən aparılmış sorğuya əsasən bir neçə nominasiya üzrə futbolçular mükafatlandırılmışlar. 37 KİV - televiziya, internet saytları və qəzetlərdə çalışan idman jurnalistlərinin rəyi əsasında aparılmış sorğuda ötən mövsümün ən yaxşı qapıçısı Kamran Ağayev ("Xəzər Lənkəran"), ən yaxşı müdafiəçisi Ruslan Abışov ("Neftçi"), ən yaxşı yarımmüdafiəçisi Adrian Pit ("Xəzər Lənkəran"), ən yaxşı hücumçusu Rauf Əliyev ("Qarabağ"), ən yaxşı baş məşqçisi Böyükağa Hacıyev ("Neftçi"), ən yaxşı futbolçusu Flavinyo ("Neftçi"), mövsümün tapıntısı (gənc futbolçu) Nurlan Novruzov ("Bakı"), ən yaxşı assistenti Rəşad Abdullayev ("Neftçi"), ən yaxşı qolu Ceyhun Sultanov ("Kəpəz"), ən yaxşı bombardiri Bahodir Nasimov ("Neftçi") və ən sadiq azarkeşi Xoşbəxt Yusifzadə seçilmişdir.

Sonda ötən mövsümün çempionu "Neftçi", gümüş mükafatçısı "Xəzər-Lənkəran" və bürünc medalçısı "İnter"ə Fransanın məşhur "Artua-Bertran" şirkəti tərəfindən hazırlanmış medallar təqdim olunmuşdur.

Azərbaycan.-2012.- 11 oktyabr.- S.11.