Sosial problemlərin həlli dövlət üçün böyük önəm kəsb edir

Nazirlər Kabinetinin doqquz ayın yekunlarına həsr olunmuş iclasında infrastruktur layihələrinin bu məqsədə xidmət etdiyi vurğulanıb

Bu ilin əvvəlindən bəri qazanılan nailiyyətlər Azərbaycan iqtisadiyyatının uğurlu inkişafının davam etdiyini aydın göstərir. Prezident İlham Əliyev Nazirlər Kabinetinin 2012-ci ilin doqquz ayının sosial-iqtisadi yekunlarına həsr olunmuş iclasında bu barədə belə demişdir: "Bütün makroiqtisadi göstəricilərimiz yüksək səviyyədədir, iqtisadiyyatımız doqquz ayda 1,1 faiz artmışdır. Ancaq qeyri-neft iqtisadiyyatımız 10,3 faiz artmışdır. Son aylar və illər ərzində bu, ən vacib göstəricidir. Çünki məqsədimiz məhz ondan ibarətdir ki, ölkə iqtisadiyyatı çoxşaxəli şəkildə inkişaf etsin. Əlbəttə, qeyri-neft iqtisadiyyatının inkişafı imkan verəcəkdir ki, gələcəkdə Azərbaycan neft-qaz amilindən asılılığını böyük dərəcədə aşağı endirə bilsin".

Qarşıda duran bu prioritet vəzifənin yerinə yetirilməsində bölgələrin fəal iştirakı ürəkaçandır. Ölkənin, demək olar ki, bütün rayonlarında tikinti, quruculuq, abadlıq işləri geniş vüsət alıb. İnfrastruktur layihələri müvəffəqiyyətlə icra olunur. Yeni iş yerləri açılır. İlin əvvəlindən 73 mini daimi olmaqla 94 min yeni iş yeri yaradılıb. 2004-cü ildən bəri açılmış iş yerlərinin sayı isə 1 milyon 100 mindir. Onların 800 mini daimidir.

Tikinti-quruculuq işləri həm ölkənin paytaxtını, həm də bölgələrini əhatə edib. Sosial infrastruktur getdikcə yeniləşir və böyüyür. Bu il də onlarca məktəb binası və məktəblərdə əlavə korpuslar tikilib. Bir çox məktəblər təmir olunub. Məqsəd odur ki, istər kənddə, istərsə də şəhərdə bir dənə də təmirsiz, yaxud qəzalı vəziyyətdə olan məktəb qalmasın. Bu istiqamətdə işlər davam etdirilir.

Dövlət başçısı infrastruktur layihələri sırasında qazlaşdırmaya, kənd yollarının vəziyyətinə, içməli su məsələsinə xüsusi önəm verir. Elektrik çəkilişi də prioritet hesab edilir. Sözügedən tədbirdə Prezident İlham Əliyev bu sahədə böyük güclər yaradıldığını, elektrik stansiyalarının tikildiyini qeyd etməklə yanaşı, paylayıcı xətlərin hələ lazımi səviyyədə olmadığını deyib. Xüsusilə, bölgələrdə paylayıcı xətlərə diqqətlə yanaşmaq lazımdır. Hətta hökumətə tapşırılmışdır ki, investisiya proqramında bölgələrin paylayıcı xətlərinin bərpası və yenidən qurulması ayrıca maddə ilə öz əksini tapsın.

Ümumiyyətlə, Azərbaycanda həyata keçirilən bütün infrastruktur layihələri insanların rahatlığına, məişətinin, sosial vəziyyətinin, yaşayışının daha da yaxşılaşdırılmasına xidmət edir. İstər təbii fəlakətlərdən zərər çəkən vətəndaşlar olsun, istər məcburi köçkünlər, istərsə də ölkənin balaca sakinləri - uşaq bağçalarında tərbiyə alan oğlan və qızlar.

İndi paytaxtdakı bütün uşaq bağçaları təmir edilir. Çünki bu sahədə mövcud olan imkanlar tələbatın yalnız kiçik bir hissəsini ödəyir. Həmin bağçalar hələ sovet dönəmində tikilib. Ölkədə əhalinin sayı isə ildən-ilə artır və paralel olaraq uşaq bağçalarına tələbat da çoxalır. Lakin unutmaq olmaz ki, valideynlər balalarını ancaq yaxşı bağçaya vermək istəyirlər. Ona görə də dövlət bu məsələyə önəm verərək geniş ərazilərdə gözəl, rahat, hər cür şəraiti olan bağçaların tikintisinə başlayıb. Gələn ilin investisiya proqramında bu məsələyə də baxılması nəzərdə tutulur.

Lakin bəzən elə də olur ki, həyat ortaya əvvəlcədən planlaşdırılmayan məsələlər atır. Son illərdə Azərbaycanda baş verən təbii fəlakətlər buna aydın misaldır. İki il əvvəl ölkənin bir sıra rayonlarında daşqınlar olmuşdu. Bu il isə zəlzələ baş verdi. Zəlzələ bölgəsində qısa müddətdə məktəblər tikildi. Evlərin inşası və bərpası yenə də davam edir. Bu məqsədlə Prezidentin Ehtiyat Fondundan və dövlət büdcəsindən kifayət qədər vəsait ayrılıb.

Artıq beş ildir "çadır şəhərciyi" anlayışı yaddaşlardan silinsə də, məcburi köçkünlərin yaşayış şəraitinin yaxşılaşdırılması istiqamətində işlər davam edir. Təkcə bu il həmin məqsədlə Neft Fondundan 300 milyon manat ayrılması nəzərdə tutulub ki, bu da rekord miqdarda vəsait deməkdir. İndi bu vəsaitə yeni qəsəbələr inşa edilir. Elə gələn il də bu məqsəd üçün eyni məbləğin ayrılması nəzərdə tutulub. Bu isə yurd-yuvalarından didərgin salınmış vətəndaşların vəziyyətinin dövlət tərəfindən bir an belə unudulmadığını göstərən faktdır.

Bu il kənd yollarının yaxşılaşdırılmasına da rekord miqdarda vəsait qoyulub. Bu barədə ölkə başçısı demişdir: "Bu il kənd yollarına müasir Azərbaycan tarixində ən böyük vəsait qoyulmuşdur. Hər bir bölgədə kənd yolları tikilir və onlarca kənd, şəhərlər, rayon mərkəzləri bir-biri ilə birləşir. Bunun çox böyük mənası vardır. Bu, həm sosial məsələdir, biz bunu insanların rahatlığı üçün edirik. Eyni zamanda, bu, iqtisadi məsələdir. Çünki bir neçə bölgədə mənə müraciət olunarkən qeyd edilirdi ki, əgər kənd yolu çəkilərsə, o zaman bu bölgənin turizm imkanları açılacaqdır. Çünki turizmin inkişafı üçün kənd yolları əsas şərtdir. Nəzərə almalıyıq ki, bizdə turizm yerləri dağlıq ərazilərdədir, bəzi hallarda o gözəl mənzərəli yerlərə çatmaq üçün insanların imkanı olmur. Ona görə biz bu məsələyə fərdi qaydada baxırıq".

Bu ilin 9 ayı ərzində eyni zamanda 362,8 kilometr, o cümlədən 77,5 kilometr respublika və 285,3 kilometr yerli əhəmiyyətli yol təmir olunub. Avtomobil yollarında 11 körpü salınıb. Daxili sərmayələr hesabına Bakı-Ələt yolunun bir hissəsinin tikintisi həyata keçirilib. Gəndob-Rusiya Federasiyası ilə dövlət sərhədi yeni avtomobil yolu salınıb, Qəbələ-Ağdaş, Ağstafa-Poylu-Gürcüstan sərhədi avtomobil yolları yenidən qurulub. Ələt-Hacıqabul, Qəbələ-Oğuz, Goran-Naftalan və bir sıra digər istiqamətlərdə avtomobil yolları əsaslı bərpa edilib. Beynəlxalq kreditlər hesabına Yenikənd-Salyan, Salyan-Şorsulu, Kür çayı üzərində körpu keçidinin tikintisi, bir sıra avtomobil yollarının yenidən qurulması, bəzilərinin isə genişləndirilməsi işləri davam edir.

Dəmir yollarının bərpası üzrə də işlər gedir. Ölkə Prezidenti bunun çox vacib bir iş olduğunu vurğulayaraq demişdir: "Biz sürətli dəmir yollarının fəaliyyətinə nail olmalıyıq. Yeni dəmir yolu xətləri o məqsədlə tikilir ki, qatarlar yüksək sürətlə hərəkət edə bilsin. Nəzərə alsaq ki, Azərbaycan yaxın zamanlarda nəqliyyat sahəsində böyük tranzit ölkəsinə çevriləcəkdir, Bakı-Tbilisi-Qars dəmir yolunun tikintisi yekunlaşmaq üzrədir, Azərbaycanın dəmir yolları da yüksək dünya standartlarına cavab verməlidir".

Ölkədə digər infrastruktur layihələri də həyata keçirilir. Hamısı da bir məqsədə yönəldilib. Onlar insanların rahatlığının, yaşayışının daha da yaxşılaşdırılmasının dövlət üçün böyük önəm daşıdığını təsdiqləyir.

Flora SADIQLI

Azərbaycan.-2012.- 12 oktyabr.- S. 2.