75 yaşlı qəzet

Azərbaycan mətbuatının ilk qaranquşu hesab edilən "Əkinçi" qəzeti nəşrə başlayarkən böyük maarifpərvər ziyalı Həsən bəy Zərdabi yazırdı: "Olmaz ki, mənim sözümü eşidənlərdən heç biri qanan olmasın! Necə ki, bir bulağın suyunun altına nə qədər bərk daş qoyasan, su tökülməkdən o bərk daş mürur ilə əriyib deşilir. Habelə söz də, ələlxüsus, doğru söz mürur ilə qanmazın başını deşib, onun beyninə əsər edər". "Əkinçi" qarşısında duran tarixi vəzifələrini bu cür xarakterizə edirdi və maarifçi-realist jurnalistikanın yeni məzmun kəsb etməsi üçün var qüvvəsini əsirgəmirdi.

Zaman ötdükcə həyat, ictimai-siyasi mühit yeni ideyalar, yeni ideologiya və təfəkkür tərzi tələb edirdi. Ötən əsrin 30-cu illərində Sovet Azərbaycanında inzibati rayonlar təşkil olunarkən yerli mətbuatın - rayon qəzetlərinin nəşri zərurəti yarandı. Azərbaycan K(b)P Zuvand Rayon Komitəsinin Bürosu da 1937-ci il mart ayının 30-da "Zuvand kolxozçusu" adlı qəzetin buraxılması üçün MK-dan icazə verilməsini xahiş etdi və həmin il may ayının 20-də qəzetin ilk nömrəsi işıq üzü gördü. 1937-ci il "Zuvand kolxozçusu"nun 17 nömrəsi çıxmışdır. 1938-ci ildən 1964-cü ilə kimi isə qəzet "Kolxoz yolu" adı ilə nəşr olunmuşdur. Cəfər Cəfərov, Muxtar Cavadov, Vəli Abbasov, Əlifağa Ağamalıyev qəzetin ilk redaktorları olmuşlar. İki səhifə həcmində nəşr edilməsinə, poliqrafik bazasının zəif, fəhlə-kəndli müxbirlərinin az olmasına baxmayaraq, qəzet rayonun iqtisadi, siyasi və mədəni həyatında mühüm rol oynamışdır.

Azərbaycan KP MK Katibliyinin "Rayon qəzetlərinin adları haqqında" 1965-ci il 19 iyun tarixli qərarından sonra 1966-cı ilin yanvar ayından qəzetin adı dəyişdirilərək "Bolluq uğrunda" oldu. Lerik Rayon Partiya Komitəsinin və Rayon İcraiyyə Komitəsinin orqanı kimi bu adla qəzetin birinci nömrəsi 1966-cı il mart ayının 12-də çıxdı və sonrakı illərdə qəzetin maddi-texniki bazası xeyli möhkəmləndi.

Ötən illər uğurlarımız çox olmuşdur. 1987-ci ildə qəzet səmərəli işinə və ilk sayının çapdan çıxmasının 50 illiyi ilə əlaqədar Azərbaycan SSRİ Ali Sovetinin Fəxri fərmanı, bir il sonra isə 5 may - Mətbuat Günündə SSRİ Jurnalistlər İttifaqının Fəxri fərmanı ilə təltif edilmişdir. Redaksiyanın iki əməkdaşına Azərbaycanın əməkdar jurnalisti fəxri adı verilmişdir.

Sevindirici haldır ki, mətbuatın himayədarı və dostu Heydər Əliyevin ideyalarını bu gün Prezident İlham Əliyev uğurla davam etdirir, mətbuatın inkişafını daim diqqət mərkəzində saxlayır. Mətbuata dövlətin dəstəyini biz də hiss edirik. Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu tərəfindən müxtəlif avadanlıqlarla təmin olunmuşuq. Lerik Rayon İcra Hakimiyyəti də qəzetin inkişafına, üzləşdiyi problemlərin həllinə diqqət və qayğısını əsirgəmir.

Biz də öz növbəmizdə ölkədə, o cümlədən rayonumuzda baş verən ictimai-siyasi hadisələrə fəal münasibət göstərir, həyata keçirilən tikinti-quruculuq işlərini operativ işıqlandırırıq. 75 yaşını qeyd edən, 5500-cü sayı nəşr olunan qəzetimizin kollektivi qarşıda duran vəzifələri bundan sonra da uğurla yerinə yetirmək əzmindədir.

İdris ŞÜKÜRLÜ,

"Lerik" qəzetinin redaktoru,

əməkdar jurnalist

Azərbaycan.-2012.- 12 oktyabr.- S.7.