Dünya ictimaiyyəti üçün önəmli olan müzakirələr keçirildi

Oktyabrın 4-5-də Bakıda keçirilən Beynəlxalq Humanitar Forum ziddiyyətlərlə və kataklizmlərlə, iqtisadi və mənəvi böhranla müşayiət olunan əsrimizdə hər bir insanın qarşısında duran qlobal problemlərə cavab axtarmaq, ən mühüm məsələlərə dair dialoqlar, müzakirələr aparmaq üçün beynəlxalq miqyasda nüfuzlu elmi-siyasi platformalardan biridir. Forumun iştirakçıları tanınmış dövlət xadimləri, Nobel mükafatı laureatları, mötəbər beynəlxalq təşkilatların rəhbərləri, dünyanın siyasi, elmi və mədəni elitasının görkəmli nümayəndələridir.

Forumun əsası 2010-cu ilin yanvarında Azərbaycan Respublikası və Rusiya Federasiyası prezidentlərinin təşəbbüsü ilə Bakıda keçirilmiş Humanitar Əməkdaşlıq üzrə Birinci Azərbaycan-Rusiya Forumunda qəbul olunmuş qərarla qoyulub və bunun nəticəsi olaraq 2011-ci il oktyabrın 10-11-də "XXI əsr: ümidlər və çağırışlar" şüarı altında Birinci Bakı Beynəlxalq Humanitar Forumu təşkil olunub.

Azərbaycan Prezidenti forum iştirakçılarının beynəlxalq miqyasda qaldırdığı problemlərin aktuallığını nəzərə alaraq, 2011-ci il oktyabrın 24-də "Bakı Beynəlxalq Humanitar Forumunun nəticələri haqqında" sərəncam imzaladı və sərəncama əsasən, Bakı Beynəlxalq Humanitar Forumunun ənənəvi olaraq hər il keçirilməsi qərara alındı. Forumun əsas məqsədi humanitar və inteqrativ impulsların yaradılması ilə yanaşı, gələcəkdə beynəlxalq səviyyədə humanitar çağırışları aktuallaşdırmaqdan ibarətdir. Forumun vəzifəsi, eyni zamanda, ideyalar mübadiləsi, debat və müzakirələr üçün nəzəri və tətbiqi şəraitin yaradılmasıdır.

Bu il keçirilən İkinci Bakı Beynəlxalq Humanitar Forumunda 70 ölkəni və 7 mötəbər beynəlxalq təşkilatı təmsil edən 694 nəfər iştirak edirdi. Onlardan 10 nəfəri sabiq dövlət başçısı, 11-i Nobel mükafatı laureatı, 5-i dünyanın nüfuzlu fəxri professoru, 10-u mötəbər beynəlxalq təşkilatları təmsil edən vəzifəli şəxs, 55-i şöhrətli ictimai və siyasi xadimdir.

Forumda müxtəlif mövzuları əhatə edən "dəyirmi masa"ların təşkili onun rəngarəngliyini bir daha nümayiş etdirdi. İqtisadi inkişaf modellərinin humanitar aspektləri, konvergensiya edən texnologiyalar və gələcəyin konturları, müasir KİV-lər və yeni çağırışlar, postmodernist mədəniyyətdə ənənəvi dəyərlər sistemi, XXI əsrdə qloballaşma proseslərinə yeni metodoloji yanaşmalar, müasir təbabətə və molekulyar biologiyaya baxışları dəyişən texnologiyalar, multikulturalizm və mədəni özünüdərk, cəmiyyətin həyatında multikulturalizm "dəyirmi masa"ların mövzuları idi.

Forumun vəzifələrindən biri də hamını narahat edən məsələlərin müzakirə olunaraq beynəlxalq ictimaiyyətin nəzərinə çatdırmaqdan ibarət idi. Bu mənada forumun öz ənənələri də formalaşıb. Heydər Əliyev Mərkəzində təşkil olunan 2-ci Bakı Beynəlxalq Humanitar Forumunun açılışında Prezident İlham Əliyev, xanımı Mehriban Əliyeva və dünyanın bir çox yerlərindən gəlmiş nüfuzlu ictimai-siyasi və elm xadimləri iştirak etdilər. Prezident İlham Əliyev forumda çıxış edərək dedi ki, "Multikulturalizm bizim həyat tərzimizdir" və Azərbaycanda heç vaxt milli-dini zəmində qarşıdurma olmayıb, multukulturalizmin gələcəyinə inanır. Dövlət başçısı ölkəmizin 20 ildir humanitar fəlakətlə üzləşdiyini, Dağlıq Qarabağ və onun ətrafındakı 7 rayonun ermənilər tərəfindən işğal olunduğunu, 1 milyondan çox insanın doğma torpaqlarına qayıda bilmədiyini də diqqətə çatdırıb. - Bizim bütün planlarımızın təməlində insan amili dayanır - deyən Prezident İlham Əliyev bu istiqamətdə ölkəmizdə böyük uğurların əldə edildiyini, Azərbaycan vətəndaşlarının azad cəmiyyətdə yaşadığını və ölkənin inkişafına töhfə verdiklərini bildirib: "Biz qitələr arasında körpüyük, bununla belə humanitar sahədə də körpü rolunu oynayırıq".

İkinci Beynəlxalq Humanitar Forum çərçivəsində "Müasir təbabətə baxışı dəyişən texnologiyalar və molekulyar biologiya" adlı "dəyirmi masa" da öz əhəmiyyəti ilə diqqəti çəkdi. Tədbirin təşkilatçılarından, ATU-nun Beynəlxalq əlaqələr şöbəsinin müdiri Rəhimə Qabulova bildirdi ki, dəvət olunan qonaqlar bir çox ölkəni təmsil edirlər - İsrail, ABŞ, Cənubi Koreya, Türkiyə, Argentina, Pakistan, Rusiya, Almaniya, Ukrayna, Böyük Britaniya, Çexiya, Tacikistan, İordaniya, Gürcüstan. "Dəyirmi masa"ya rəhbərliyi Azərbaycan Tibb Universitetinin rektoru, Milli Məclisin deputatı Əhliman Əmiraslanov etdi. Müzakirələr müxtəlif mövzular ətrafında aparıldı. Bir sıra yerli və xarici elm nümayəndələri öz nəzəri bilikləri və təcrübələri haqqında məlumat verərək müasir tibb elminin tendensiyaları və tibb sahəsində istifadə olunan innovativ texnologiyalar mövzusuna toxundular. "Dəyirmi masa"nın iştirakçıları ilə söhbətlərimizdə onlar maraqlı fikirlər söylədilər.

Qalib Qarayev,

Tibb Universitetində elmi-təqdiqat mərkəzinin rəhbəri, professor:

- İndiki "dəyirmi masa"da müzakirə olunan mövzular son dərəcə maraqlı və əhəmiyyətlidir. Forum bir ilkə imza ataraq həm bioloqları, həm də həkimləri bir araya gətirdi. Əlbəttə, xaricilərin də çıxışları çox maraqlı idi. Bizim alimlərin də elmi bilikləri heç də xarici alimlərdən geri qalmır. Hətta bəzi məsələlərdə bizim alimlərin onlardan da artıq məlumatları var. Onu da qeyd edim ki, cənab Prezident tərəfindən yaradılan Elmin İnkişaf Fondu Azərbaycanda elmin inkişafına çox böyük təkanlar verir. Elmdə olan maliyyə çətinliklərini aradan qaldırır.

Surxay Musayev,

Tibb Universiteti, əməkdar elm xadimi, professor:

- Mən artıq ikinci dəfədir ki, bu forumda iştirak edirəm. Bu forumların çox böyük əhəmiyyəti var. Öz sahəsinin mütəxəssisi olan insanların Bakıya gəlməsi, mühazirələr ilə çıxış etməsi çox təqdirəlayiq haldır. Hesab edirəm ki, bugünkü çıxışlar tibb elminə, təbabətə və bizim fəaliyyətimizə çox müsbət təsir göstərəcəkdir.

Yusif Hacıyev,

Tibb Universiteti, professor:

- 2-ci Beynəlxalq Humanitar Forumun iştirakçısı olmaqdan məmnunluq duyuram. Bu qədər Nobel mükafatçısının bir yerdə olması çox nadir haldır. Azərbaycanın mövqeyindən çıxış edərək deyə bilərəm ki, hazırkı müzakirələr tibb sahəsində olan yeni innovasiyalar və texnologiyalar haqqında məlumat əldə etmək baxımından hədsiz əhəmiyyətlidir. İnanıram ki, yaxın gələcəkdə dünyanın aktiv olan araşdırma laboratoriyaları Azərbaycanda da qurulmağa başlanacaqdır.

Le Gyun Mın,

Koreya Respublikasından olan iştirakcı:

- Bu mənim Azərbaycana birinci səfərimdir. Bakı çox gözəl şəhərdir. Burada olan müasir tikililər ölkənizin çox sürətli inkişaf etməsinə işarə edir. Bakı Beynəlxalq Humanitar Forumunun böyük əhəmiyyəti var. Azərbaycan müxtəlif ölkərdən olan elm nümayəndələrinin və siyasətçilərin bir araya toplaşmasına şərait yaradıb. Forumda baş tuta biləcək müxtəlif əməkdaşlıqlar isə hər bir cəmiyyətin inkisafina böyük töhfələr verə bilər.

Alfredo May,

Beynəlxalq Səhiyyə Xidmətləri Mərkəzinin sədri, Argentina nümayəndəsi:

- Bu foruma Azərbaycanın Argentinadakı səfirliyi tərəfindən dəvət olunduğum üçün cox sevinirəm. Mən Buenos-Ayresdə yerləşən Beynəlxalq Səhiyyə Xidmətləri Mərkəzinin sədriyəm. Deyə bilərəm ki, sizin səfirliyiniz Argentinada çox önəmli işlər görür. Çox qısa müddət - iki il öncə fəaliyyətə başlamasına baxmayaraq səfirliyiniz argentinalılara Azərbaycanı layiqincə tanıtmağa müvəffəq olmuşdur. Bundan öncə argentinalıların Azərbaycan haqqında, hətta onun harada yerləşməsi haqqında məlumatları yox idi. Bu forumda mən səhiyyə ilə bağli "dəyirmi masa"da istirak edirəm və müzakirə əsnasında Azərbaycandan və digər ölkələrdən olan həmkarlarımdan dəyərli məlumatlar əldə etməkdəyəm.

Adel Mahmoud,

Princeton Universitetinin professoru, Amerika Birləşmiş Ştatları:

- Belə bir forumun təşkili çox vacib bir hadisədir. Çünki müxtəlif peşəyə sahib insanlar bir araya gələrək təkcə Azərbaycanın gələcəyi üçün deyil, həm də dünya ictimaiyyəti üçun önəmli ola biləcək müzakirələrdə iştirak edirlər.

Vidadi Yusifov (ABŞ),

professor:

- Mən əslən Azərbaycandanam. ABŞ-da yaşayıram və neçə ildir orada elmi fəaliyyət göstərirəm. Bu gün ana Vətəndə olmaqdan və belə möhtəşəm bir forumda iştirak etməkdən qürur duyuram.

Qərib Mürşüdov

(Böyük Britaniya), professor:

- Mən bir neçə ildir Böyük Britaniyada yaşayıram və Kembric Universitetində dərs deyirəm, elmi araşdırmalarla məşğul oluram. Forumda iştirak eləməklə həm də öz doğmalarımla görüşmək, Vətənimizdəki dəyişiklikləri öz gözlərimizlə görmək imkanı qazandıq. Bu forumu təşkil edənlərə minnətdaram.

İsmayıl Zülfüqarov

(Cənubi Koreya), professor:

- On ildən artıqdır ki, Cənubi Koreyanın aparıcı ali məktəblərindən birində çalışıram. Bu gün köhnə həmkarlarımla görüşməkdən və fikir mübadiləsi aparmaqdan məmnunam. Elmimiz və iqtisadiyyatımız çox dəyişib. Bunu xarici qonaqların dilindən eşitmək çox xoşdur.

Bəxtiyar QARACA

Azərbaycan.-2012.- 13 oktyabr.- S.7.