Yanq CİEN: Azərbaycan və Çin xalqları arasında hər zaman dostluq münasibətləri olmuşdur

Azərbaycan və Çin xalqları arasında hər zaman dostluq münasibətləri olmuşdur. İnanıram ki, bu münasibətlər gələcəkdə daha da inkişaf etdiriləcəkdir.

Bu sözləri İkinci Bakı Beynəlxalq Humanitar Forumunda iştirak edən Çin Xalq Respublikasının "Peoble's Daily" qəzetinin şərhetmə şöbəsinin direktoru Yanq Cien AzərTAc-a müsahibəsində demişdir.

Azərbaycan ilə Çin arasında əlaqələrin yaranmasında ulu öndər Heydər Əliyevin xidmətlərindən danışan direktor bu münasibətlərin dərinləşməsində Prezident İlham Əliyevin rolunu xüsusi vurğulamışdır.

Azərbaycanda bütün sahələrdə gedən dinamik inkişafa heyran qaldığını bildirən Yanq Cien demişdir ki, Bakı şəhəri keçmişlə müasirliyin və Qərblə Şərqin qovuşduğu bir məkandır.

O qeyd etmişdir ki, gənc Azərbaycan Respublikasında senzuranın ləğv edilməsi, kütləvi informasiya vasitələrinin inkişafı, eləcə də jurnalistlərin sosial vəziyyətinin yaxşılaşdırılması üçün dövlət tərəfindən həyata keçirilən tədbirlər demokratiyanın və söz azadlığının təzahürüdür.

Çinli qonaq forumun yüksək səviyyədə təşkil edildiyini və mövzuların çox maraqlı olduğunu vurğulamışdır.

Azərbaycan.-2012.- 13 oktyabr.- S.7.