Azərbaycanın iqtisadi yüksəlişindən bəhs edən kitab

Akademik Asəf Nadirovun "Azərbaycan iqtisadiyyatının daima yüksələn müstəqillik dövrü" adlı yeni kitabı nəşr olunub. Kitabda müəllifin ölkədə çıxan qəzet və jurnallarda son illərdə dərc edilmiş məqalələrinin bir qismi toplanıb.

A.Nadirov bir daha vurğulayır ki, Azərbaycan iqtisadiyyatının müstəqillik illərindəki ardıcıl inkişafı ulu öndər Heydər Əliyevin hələ keçən əsrin 70-80-ci illərində müəyyən etdiyi düzgün və uzaqgörən iqtisadi siyasətdən qaynaqlanır. Xalqın israrlı tələbi ilə ikinci dəfə ölkə rəhbərliyinə qayıdan Heydər Əliyevin müstəqil ölkəmizdə başladığı yenidənqurma tədbirləri və iqtisadi-hüquqi islahatlar Azərbaycanın dünyada mövqeyini möhkəmləndirdi.

Ulu öndərə yaxşı məlum idi ki, Azərbaycan müxtəlif təbii sərvətlərlə son dərəcə zəngin olan ölkədir. Lakin uzun müddət onun bu imkanlardan səmərəli istifadə etməyə nə müstəqilliyi, nə hüququ, nə də kifayət qədər maliyyə vəsaiti olmuşdur. Kitabda müəllifi ümummilli lider Heydər Əliyev olan yeni neft strategiyasının, "Əsrin müqaviləsi"nin imzalanmasının Azərbaycan iqtisadiyyatının inkişafına böyük təkan verdiyi konkret fakt və rəqəmlərlə göstərilib.

A.Nadirov məqalələrində günün aktual məsələlərindən - dövlətin prioritet kimi qarşıya qoyduğu vəzifələrdən də ətraflı bəhs edir, ölkə Prezidenti İlham Əliyevin bu sözlərini misal gətirir: "Əsas məqsəd odur ki, biz kənd ilə şəhər arasındakı fərqi azaldaq, eyni zamanda, rayonlardan böyük şəhərlərə miqrasiya meyillərini də gərək azaldaq".

Bunun üçün isə bölgələrdə həyatı canlandırmaq, yerli xammaldan səmərəli istifadə etmək vacibdir. İqtisadçı alim qeyd edir ki, Azərbaycan torpağı təkcə neft və qaz deyil, digər təbii ehtiyatlarla da zəngindir. Məsələn, Abşeron iqtisadi rayonunun karbohidrogenlərdən əlavə, zəngin tikinti materialları, alternativ (külək, günəş) enerji mənbələri, müalicə və istirahət üçün təbii mühiti, kimya sənayesi üçün xammalı mövcuddur. Gəncə-Qazax iqtisadi rayonu müxtəlif təbii sərvətlərlə zəngin olduğu üçün bir zamanlar "Azərbaycanın Uralı" adını almışdı. Burada dəmir filizi, alüminium, qızıl, tikinti materialları, bentonit və digər təbii ehtiyatlar var. Lənkəran iqtisadi rayonu isə subtropik zona olduğu üçün burada kənd təsərrüfatının bir sıra istiqamətlərini, dənizkənarı istirahət və dağ turizmi imkanlarını daha da inkişaf etdirmək mümkündür. Azərbaycanın bütün bölgələrinin bu baxımdan özünəməxsus üstünlükləri var və müəllif bunların hər biri üzərində ayrı-ayrılıqda dayanır.

Kitabda Azərbaycanın öz müstəqilliyini bərpa etdikdən sonra keçən qısa bir vaxt kəsiyində - son 20 ildə qazandığı müvəffəqiyyətlər haqqında da ətraflı söhbət açılır. Bu baxımdan kitab həm iqtisadçılar, ölkəmizin nailiyyətləri haqqında ətraflı məlumat əldə etmək istəyən digər peşə sahibləri, həm də oxucular üçün dəyərli vəsaitdir.

Flora SADIQLI

Azərbaycan.-2012.- 16 oktyabr.- S. 10.