Türkiyənin nüfuzlu «Ekovitrin» jurnalı İqtisadi Əməkdaşlıq Təşkilatının Bakıda keçirilən XII zirvə toplantısına geniş yer ayırmışdır

Türkiyənin nüfuzlu "Ekovitrin" jurnalı İqtisadi Əməkdaşlıq Təşkilatının (ECO) oktyabrın 16-da Bakıda keçirilən XII zirvə toplantısını geniş işıqlandırmışdır.

AzərTAc xəbər verir ki, jurnalın əsas səhifəsində "Ekovitrin Bakıda zirvə toplantısını izləyir" sərlövhəsi altında yerləşdirilən xəbərdə bildirilmişdir ki, zirvə toplantısı Bakının rəmzlərindən sayılan binalardan birində - Heydər Əliyev Mərkəzində keçirilir.

Bakıdakı zirvə toplantısına qatılan "Ekovitrin" Media Qrupunun rəhbəri Kamuran Abacıoğlu, nəşrin sahibi Bilal Koçak və müxbir Əli Karabaş iki ildən çoxdur ki, quruma sədrlik edən Türkiyənin bu missiyanı Azərbaycana təhvil verdiyini vurğulamışlar.

"Ekovitrin" Baş nazir Rəcəb Tayyib Ərdoğanın zirvə toplantısı çərçivəsində Bakıda Azərbaycan Respublikasının Prezidenti İlham Əliyev və İran İslam Respublikasının Prezidenti Mahmud Əhmədinejad ilə görüşlər keçirdiyini diqqətə çatdırmışdır. Məqalədə qeyd edilmişdir ki, XI zirvə toplantısının sədri qismində XII toplantını açan Türkiyənin Baş naziri Rəcəb Tayyib Ərdoğan açılış çıxışında bölgə ölkələri arasında əməkdaşlığın gücləndirilməsi üçün müxtəlif sahələrdə atılması lazım olan addımlardan danışmışdır.

Bildirilmişdir ki, R.T.Ərdoğan çıxışında dünyada baş verən böhranın bölgədə həmrəyliyi və birlikdə hərəkət etmənin vacibliyini ortaya qoyduğunu vurğulamışdır. Türkiyənin Baş naziri, həmçinin bölgədə bütün sahələrdə əməkdaşlığın inkişaf etdirilməsinin, iqtisadi layihələrin dəstəklənməsinin, ticarət dövriyyəsinin artırılması üçün ticarəti asanlaşdıracaq addımların atılmasının, layihələrə fəal maliyyə dəstəyinin göstərilməsinin, kənd təsərrüfatı, nəqliyyat və digər sahələrdə əlaqələrin inkişaf etdirilməsinin vacibliyini vurğulamış, bu baxımdan Bakı-Tbilisi-Qars dəmir yolunun əhəmiyyətini yüksək qiymətləndirmişdir.

Qeyd olunmuşdur ki, Türkiyənin Baş naziri çıxışında ECO-nun əhatə etdiyi coğrafiyada son 20 ildə çox mühüm siyasi və iqtisadi dəyişikliklər baş verdiyini bildirmişdir. Bu proses hazırda davam edir ki, bu da bir sıra tələblər ortaya qoymaqdadır. Bu tələblər Afrikadan Latın Amerikasına və Asiyaya qədər dünyanın bir çox yerində ifadə edilir.

Rəcəb Tayyib Ərdoğanın çıxışında qız uşaqlarına qarşı törədilən təcavüzün qarşısının alınmasına da diqqət çəkdiyini vurğulayan "Ekovitrin" Türkiyənin təşəbbüsü ilə BMT tərəfindən 11 oktyabr tarixinin Dünya Qız Uşaqları Günü elan olunduğunu bildirmişdir. Diqqətə çatdırılmışdır ki, Türkiyənin Baş naziri bu təşəbbüsü BMT Təhlükəsizlik Şurasında dəstəklədiklərinə görə bu quruma qeyri-daimi üzv olan Azərbaycana, Pakistana və digər dost ölkələrə yaxından təşəkkür etmişdir.

Məqalədə vurğulanmışdır ki, Rəcəb Tayyib Ərdoğan çıxışında Azərbaycanın bu quruma sədrlik edəcəyi iki il ərzində təşkilata mühüm töhfələr verəcəyinə inandığını diqqətə çatdırmışdır.

Azərbaycan.-2012.- 17 oktyabr.- S.3.