Yeniliklər könül açır

Masallı şəhərinin girəcəyində o qədər də böyük olmayan yolayrıcı var. Bura Seybətin dairəsidir. Şəhərin baş küçəsi olan Heydər Əliyev prospekti buradan başlayır. "İstisu" sanatoriyasına, "Viləş", "Daşvənd" hotellərinə, habelə rayonun Qəriblər kəndi ərazilərində yerləşən digər istirahət və turizm mərkəzlərinə gedən yol da elə bu prospektdən keçir. Prospektin başlanğıcından şəhərin fonunda meşə örtüklü silsilə dağlar görünür. Vüqar, əzəmət rəmzi olan bu dağlar Masallıya xüsusi əzəmət verir.

Masallı özünün qədim tarixi, folkloru, adət-ənənəsi ilə sayılıb-seçilən bölgələrimizdəndir. Təsadüfi deyil ki, rayon 2012-ci ilin "Folklor paytaxtı" elan olunub və bu münasibətlə burada silsilə tədbir keçirilir. Respublikamızın ictimai-siyasi, iqtisadi həyatında da Masallının həmişə xüsusi payı olub.

Əhalisi 210 min nəfər olan Masallı insanların ən sıx yaşadığı rayonlar sırasındadır. Rayonda 1 şəhər, 3 qəsəbə və 106 kənd var. İqtisadiyyatının əsasını əkinçilik və heyvandarlıq təşkil edir. Bunlarla yanaşı, mebel sənayesi və digər sahələr də inkişaf etdirilir. "Embawood" fabrikinin istehsalı olan mebellər nəinki respublikamızda, xarici ölkələrdə də alıcılar tərəfindən həvəslə alınır.

Hazırda rayonda genişmiqyaslı tikinti-quruculuq, abadlıq işləri aparılır. Həyata keçirilən tədbirlər nəticəsində rayon mərkəzinin görkəmi gündən-günə dəyişir. İndi burada hər gün bir yenilik baş verir. Masallı şəhəri, demək olar ki, başdan-başa yenidən qurulur. Ən başlıcası, layihə əsasında kanalizasiya sistemi çəkilir. Müasir şəhəri isə bunsuz təsəvvür etmək çətindir. Eyni zamanda, rayonun bütün qəsəbə və kəndləri qazlaşdırılır. Qazçəkənlər gərgin iş qrafiki ilə yorulmaq bilmədən çalışırlar. Sözün əsl mənasında Masallı bu gün tikinti meydançasını xatırladır. Təkcə son vaxtlar şəhərin mərkəzində yerləşən mədəniyyət evi əsaslı şəkildə yenidən qurulmuş, Gənclər Mərkəzi tikilib istifadəyə verilmişdir. Tikilən, qurulan nə varsa, gələcək nəsillərə yadigar qalır. Bu baxımdan Masallıda da çox işlər görülür. Götürək şəhərin əyri-köndələn küçələrini. Onların bir çoxu fərdi həyət evlərinin hasarının dibindən keçdiyi üçün küçələr darısqal idi. Döngələri çox olan belə darısqal küçələr xüsusən sürücülərə çətinlik yaradırdı. Odur ki, həmin küçələr təmir edilməzdən qabaq rayon icra hakimiyyətinin başçısı Rafil Hüseynov fərdi evlərin sahibləri ilə görüşərək onlardan həyətyanı sahələrinin hasarlarını müəyyən qədər geri çəkməyi xahiş etmişdir. Camaat da RİH başçısının sözünü yerə salmamışdır. İndi həmin küçələr xeyli geniş və abaddır. Üstəlik, təzədən hörülən hasarlar daş laylarla üzlənib. Onu da qeyd edək ki, küçələrin abadlaşdırılması zamanı kommunikasiya xətlərinin çəkilişi yaddan çıxmır. Bu məsələ şəhərsalmada, tikinti, quruculuq, abadlıq işlərinin aparılmasında mühüm əhəmiyyətə malikdir. Belə olduqda asfaltlanmış küçələrin təkrar qazılmasına ehtiyac qalmır. Bu isə vəsaitə və vaxta qənaət, təsərrüfatçılıq prinsiplərinə əməl etmək deməkdir.

Əksər rayonlarda Heydər Əliyev mərkəzləri fəaliyyət göstərir. Ümummilli liderin adını daşıyan bu mərkəzlər gənclərin intellektual səviyyələrinin yüksəlməsində, onların vətənpərvərlik ruhunda tərbiyə olunmasında, habelə asudə vaxtlarının səmərəli təşkilində mühüm rol oynayır. Mərkəzlərdə müxtəlif dərnəklər də fəaliyyət göstərir. Masallıda da Heydər Əliyev Mərkəzi yenidən qurulur. Bundan əlavə, Böyük Vətən müharibəsində, 20 Yanvar hadisələrində, Qarabağ savaşı, Xocalı faciəsi zamanı həlak olanların xatirəsi Masallıda da əziz tutulur. Onların xatirəsinə hörmət əlaməti olaraq xatirə abidə kompleksi ucaldılır və ətrafında park salınır.

Masallı qonaqlı-qaralı yerdir. Bu səbəbdən Mənzil-Kommunal Təsərrüfatı İstehsalat Birliyinə qarşı tələbkarlıq daha çoxdur. Alınan yeni texnikaların köməyi və kollektivin səyi ilə sahədə müsbət irəliləyiş hiss edilir. Masallı şəhərindəki çoxmənzilli binaların istilik sistemlərinin bərpası, məktəblərin, uşaq bağçalarının tikilməsi, kənd yollarının abadlaşdırılması, sıradan çıxmış körpülərin yeniləri ilə əvəzlənməsi, elektrik dirəklərinin dəyişdirilməsi, su və təbii qaz təchizatı ilə bağlı ardıcıl işlər aparılır. Ərkivan rayonun ən iri yaşayış qəsəbəsidir. Buradakı Göllü, Həsənəküçə, Bağlaküçə, Pələnküştə və Abaslı məhəllələrinə asfalt döşənmiş, uşaq bağçasının su təminatını yaxşılaşdırmaq üçün artezian quyusu qazılmış, istirahət guşələri yaradılmış, səkilər çəkilmiş, ağac və gül kolları əkilmişdir. Təqdirəlayiq haldır ki, sakinlərin yaxından köməyi ilə qəsəbədəki stadion, eləcə də su xətləri təmir edilmiş, küçələrə məişət tullantıları üçün dəmirdən düzəldilmiş 450 qutu qoyulmuşdur.

Boradigah qəsəbəsində də son vaxtlar xeyli iş görülmüşdür. Bir çox küçələrə çınqıl və asfalt döşənmiş, İkinci dünya müharibəsi və Qarabağ savaşı zamanı həlak olanların xatirəsinə ucaldılan abidə əsaslı təmir edilmiş, həmin ərazilərdə istirahət guşələri tikilmiş, qəsəbədaxili küçələrdə suötürücü kanallar təmizlənmişdir. Həmçinin qış aylarında elektrik enerjisi verilməsinin keyfiyyətini yaxşılaşdırmaq məqsədi ilə 30-dan artıq dirək dəyişdirilmişdir. Hazırda qəsəbədə yeni qapalı idman zalı tikilir. Kubin kəndində isə orta məktəb binası inşa olunur. Sığdaş kəndində istirahət mərkəzi tikilməklə bərabər, kəndarası yollara çınqıl döşənir, suötürücü kanallar təmizlənir, Xanalın kəndində isə elektron ATS quraşdırılır.

Bəli, bu gün Masallının hər yerində qızğın iş gedir. Bütün bunlar isə deməyə əsas verir ki, Masallının sabahı daha abad olacaq.

Seyran CAVADOV

Azərbaycan.-2012.- 17 oktyabr.- S.10.