Azərbaycan Diplomatik Akademiyası Türkiyədə keçirilən beynəlxalq təhsil sərgisində uğurla iştirak etmişdir

Azərbaycan Diplomatik Akademiyası (ADA) İstanbuldakı "Hilton" otelində keçirilən beynəlxalq təhsil sərgisində uğurla iştirak etmişdir.

ADA-nın tələbə qəbulu şöbəsinin əməkdaşı Samirə Ağayeva sərgidə iştirak edən Türkiyə və digər ölkələrin nümayəndələrinə bu ali təhsil ocağında olan magistr və bakalavr proqramları haqqında ətraflı məlumat vermişdir.

Azərbaycan Diplomatik Akademiyasının nümayəndəsi ölkəmizin İstanbuldakı baş konsulluğunun əməkdaşlarının da iştirakı ilə Beykent Universitetində təhsil alan azərbaycanlı tələbələr və bu universitetin rəhbərliyi ilə görüşlərində də magistr və bakalavr proqramlarının geniş təqdimatını etmişdir. Beykent Universitetinin rektoru, professor Emin Karahan və xarici əlaqələr şöbəsinin müdiri Altuğ Ocak ADA-nın regionun ən nüfuzlu universitetlərindən birinə çevrildiyini vurğulamış, bu ali təhsil müəssisəsi ilə daha sıx əməkdaşlığa hazır olduqlarını bildirmişlər.

Ankaradakı Bilkend Universitetində və İzmirdə də ADA-nın magistr və bakalavr proqramlarının təqdimatı keçirilmişdir.

Oqtay BAYRAMOV

Azərbaycan.-2012.- 17 oktyabr.- S.11.