«Ölkədaxili turizm»in inkişafı layihəsinin növbəti turları həyata keçdi

Dünya Azərbaycanlı Gənclər Birliyi, Azərbaycan Respublikası Təhsil Nazirliyi, Respublika Gənc Turistlər və Diyarşünaslıq Mərkəzi və Gənclərin Həmrəyliyinə Dəstək İctimai Birliyinin "Ölkədaxili turizm"in inkişafı layihəsinin növbəti turları həyata keçdi.

Məqsəd gənc və yeniyetmələrdə Vətənə, xalqa, milli-mənəvi dəyərlərimizə hörmət və məhəbbət hisslərini daha da gücləndirmək, ekoloji tərbiyəni genişləndirmək, diyarşünaslığı, turizmi inkişaf etdirmək, gənc və yeniyetmələri azərbaycançılıq ruhunda tərbiyə etmək, onların bilik, bacarıq, ağıl və düşünmə qabiliyyətlərini üzə çıxarmaq, turizm ustalıqlarını artırmaq, asudə vaxtlarını səmərəli keçirmək və dövlətimizə layiqli vətəndaş yetişdirməkdir.

Azərbaycan Respublikası Mədəniyyət və Turizm Nazirliyinin Turizm şöbəsinin və "İçərişəhər" DTMQ idarəsi, Elmi-Mədəni Mərkəzin Kütləvi tədbirlər şöbəsi tərəfindən ekskursiyaların təşkilinə dəstək oldu.

Turda iki qrup iştirak etdi. Birinci qrupun turu 27 nəfərlik heyətlə İçərişəhərin tarixi abidələrindən başlanıb Qala qoruğunda yekunlaşdı. İkinci qrupun turu 35 nəfərlik heyətlə Qobustan qoruğunda oldular. İçərişəhər turu iki istiqamətdə aparıldı: Qız qalası və Şirvanşahlar sarayı. Layihə iştirakçıları Qız qalası və Şirvanşahlar sarayı ilə yaxından tanış olub tarixi abidələr haqqında məlumat əldə etdilər. Daha sonra isə tur Qala qoruğunda davam etdi. Burada layihə iştirakçıları Qala kəndinin mədəniyyəti, tarixi, adət-ənənələri, eləcə də qoruqda olan məzarla, muzeylə daha yaxından tanış oldular. İkinci qrupun turu Qobustan qoruğunda həyata keçdi. Layihə iştirakçıları Qobustan muzeyi ilə tanış olub Qobustanın tarixi, yaranması və qədim əcdadlarımız haqqında geniş məlumatlar əldə etdilər.

Layihə 2013-cü il sentyabr ayınadək davam edəcəkdir.

Azərbaycan.-2012.- 17 oktyabr.- S.11.